العميد (حكاية شرطي )

الحلقة 62

صبااح جديد
فاقت تحضر في روحها ماشين يتضيفوا عند سي محمود
قامت دخلت للدوش.. غسلت وجهاا و سنونهاا وخرجت عملت لشعرها ضربة خفيفة بلاك هبط حرير
جبدت لبست سروال نوار فيه تقطيعات صغار و سبادري أبيض مضخم و فاست كوير سكرتهاا.. مكيجت مكياج خفيف وعملت أكسسواراتها وعملت برفان و خرجت هبطت اللوطا
تلقا ليلى فاقت هي و سي عصام و ساجد و الفطور حاضر
قعدوا يفطرواا ويحكيو شويا شوياا
فاق أصيل زادا من نومو.. شاف الوقت و طول قام للدوش ريڨل أمورو لبس سبور شيك.. شيح شعرو هزو لتالي.. لبس منڨالتو و شركتو.. برفن و خرج لكرهبتو
شويا وقت ووصل لدارهم يلقا الفطور مزال كي تحط عالطاولة
تبسموا كي راوه داخل من باب الجنينة
جودة : عسلامة بابا
أصيل : صباحو أمي
سلم عالجماعة.. وتلموا على طاولة الفطور
تعدا الوقت وجات ال 11 متع الصباح
خرجوا عايلة سي عصام ركبوا في الكرهبة و طول مشااو و سحر بقات تدل فيهم عالدار خاطر هي كهو تعرفها
وصلواا قدام باب الدار.. هبطواا مدام حنان شادة ساشي ڨازوز و غلة و سحر شادة بوكي نوار
قدموا قدام الباب و ضربوا الناقوز
سمعوا الناقوز ضرب عرفوا اللي هوما جااو..
تبسم أصيل وطول قاام للباب هو وسي محمود وجودة
حلوا و استقبلهم سي محمود : مرحباا نورتووونا
سي عصام : النور نورك الله يفضلك
جودة : مرحباا بيكم مرحبا
حنان : عيشك يالا جودة الله يخليك
أصيل تبسم و هو يخزرلهاا و هي كيفو غارقين في بعضهم
ضربتو أمو على صدرو بالشوية : سلم على أنسابك سي العميد
خزر لأمو يضحك و بعد خزر لسي عصام وحنان مد يدو سلم عليهم باليد.. وهبط باس جاد وجا زادا باسو
خزر لسحر يتبسم و سلم عليها باليد وهي تخزرلو و مانجمش يبعد يدو على يدها إلا ماعاودت ضربتو جودة على صدرو بمرفقهاا
ضحك بالصوت وغرس يدو في شعرو هزو لتالي
وسحر تضحك تحت حس مس
جودة : ووه شبينا في الباب.. تفضلوا أدخلوا مرحبااا
دخلوا وعطات حنان الساشي لجودة و سحر عطات الورد لأصالة اللي هبطت وقفت في أول الصالة... سلمت عليهاا وعنقتها وعطاتها البوكي
جبدت ولدهاا من يدو وبدات تحكي بصوت ضعيف : حلبت راك
أصيل حل عينيه و إطرشق بالضحك : آه شومي أمي تحكي هكاا ؟؟ شنيا حلبت هاذي
جودة ضحكت : معناها مشلق قدام بوك و بوها تي إحشم
أصيل بدا يترومز عليهاا : آآه يااا دجدح كي توصل لعمري تو تعرف ولدك شقاعد يحس مع الطفلة اللي يحبهاا
جودة تضحك : نووصل لعمرك يااا رمز آه.. براا شد بلاصة و معادش تلعب عينيك عالطفلة
أصيل : الطفلة خطشيبتي و bientôt مرتي و كنتك يااا دجدج
جودة : يا ولدي أسكت بوك يسمع
أصيل : تو بابا خذاك بالغمزة إنت ؟؟ مااو بالفازات زاداا
جودة : لااا هبل هذاا سايي معادش فيه
ضحك و عنقهاا وهي تضحك وعنقتو
وسحر تخزرلهم من بعيد و تتبسم
دخلت جودة مع أصالة للكوجينة
و أصيل مشا قعد في الصالة بحذا سحر..
في الصالة كان قاعد سي محمود وسي عصام
حنان بحذاها سحر و سحر بحذاهاا أصيل
و أصلان و ساجد قاعدين كل حد في كرسي بعاد على بعضهم شوياا
خرجت أصالة مالكوجينة هازة طبق كبيير فيه كيساان مضخمين عاللخر عصير فرشك مزالت كي عملتو جودة معاه زوز أصحنة متوسطين فيهم حلو ظاهر من شكلو بنين يقتل
بدات بسي عصام و سي محمود و بعد تعدات لأصيل
أصيل وخر شويا وخزرلهاا : ladies first
تبسمت : بااهي يا سيدي أمرك
حنان و سحر ضحكواا
خذاو من عندهاا... ورجعت لأصيل عطاتو.. غمزهاا وهو ياخو
وبعد عطات لأصلان و ساجد.. حطت الطبق فوق الطاولة و رجعت للكوجينة مع أمها
قعد سي عصام و سي محمود و أصيل يتبادلوا في الحديث لين حضر الفطور.. كسكسي بلحم العلوش.. معاه طجين سبناخ.. سلاطة مشوية.. فريت فوقو مايوناز... وعملت صحنين كمونية
مع الغلة والما و العصير.. الطاولة كانت مزيانة تهبل
تلموا الجماعة فوق الطاولة.. وبدا الفطور
برشا ضحك على الطاولة.. برشا حديث.. وبرشا فرحة
كملوا فطورهم.. وركشوا في الجنينة على قهاوي عربي ريحتهم خارجة تعشق من يديات جودة
أصيل حط قهوتو فوق الطاولة... شبك يديه في بعضهم وخزر لبوه وسي عصام اللي يحكيو على العلم و برشا حاجات أخرى
أصيل : بابا.. عم عصام تتلهاو بيا شويا يخليكم.. عندي موضوع نحب نحكي فيه معاكم
سي محمود : أحكي ولدي نسمعو فيك
الجماعة الكل سكتت وسحر قعدت تخزرلو
و أصيل بدا يحكي : حكيت أنا وسحر بخصوص العرس .. وماذابيناا الصيف هذا نعرسوا... منو هي بطبيعتها مصلعة وبطبيعة الحال تكمل قراايتها كيما تحب هي أنا ماناقفلهاش بالكل ... ومنو أنا عندي كونجي طويل في الصيف نلقا معاها الوقت لل voyage de nos
سي عصام حط قهوتو فوق الطاولة :واللهي شبش نقلك... مش بكري شويا وهي مازالت صغيرة
سحر خزرتلو وخزرت لأمها