العميد (حكاية شرطي )

الحلقة 13

الحلقة الثالثة عشر
أصيل : وشبيك ماتكلمتش قتلو يبعدك.. ولا اللي يجي يقلك نحكيو تسمعو فاش يحكي
سحر : واللهي سي أصيل يظهرلي ماريتنيش محلقة معاه نركركواا في التاي
أصيل : زيد طول لسانك زيد
خزرتلو وسكتت
جبد تليفونها ومدهولهاا : شد تليفونك.. Pour la deuxième fois نجي لهوني ونعاود نعطيك تليفونك.. الله و أعلم المصيبة الجاية شنيا وتليفونك عند شكون نلقاه
سحر خزرت لتليفونها فرحاانة وخذاتو تقلب فيه : يااا تليفوني رجعلي.. تهنى تهنى بقدرة ربي نستحفظ عليه عيشك سي أصيل وسامحني في تعبك
تبسم : واجبي
خزرتلو تتبسم و عملتلو بوجها grimace متع فرحة
أصيل : شعندك تعمل تواا
سحر : شي.. يمكن نرجع للفوايي.. ويمكن نخرج نعمل دورة
أصيل : أنا ليوما ماعينيش نخدم .. تحب نمشيو نعملوا قهوة
سحر خزرتلو : مانقلقكشي ؟؟
أصيل : ماتقلقنيش يزي بلا هبال
سحر تبسمت : باهي
قلها هياا... وتمشاو للكرهبة.. طلعهاا وطلع بحذاها وديمارا ومشا
في الكرهبة
أصيل : فين تحب نمشيو
سحر : ماانعرش
أصيل : تسكن هوني إنت
سحر : بعيدة شويا هاكا علاش خذيت فوايي
أصيل : بوك و أمك شيعملوا
سحر : pa معلم تعليم إبتدائي و ما أستاذة عربية
أصيل : عندك خوات
سحر : عندي خويا كهو ساجد مزال صغير
أصيل : و إنت شنوا تقراا
سحر : قانون
أصيل : c'est bien
سحر : ملا تحقيق
أصيل ضحك بالصوت : لا تحقيق لا شي أسألة عادية
سحر : و إنت تسكن هوني
أصيل : دارنا بعيدة.. آما عندي داري قريبة للخدمة
سحر : بوك وأمك شيعملوا
ضحك : بابا عندو شركة.. وأمي في الدار وساعات تمشي مع بابا للشركة
سحر : عندك خوات
أصيل : عندي زوز.. طفة وطفل.. أصالة تقرا هندسة و أصلان مزال في الليسي
سحر : أيا باهي..
قعدوا يهروا في الثنية لين وصلوا لبلاصة مضخمة عاللخر
هبطوا يتمشاو ودخلواا.. خذاو كوان مزيان عاللخر وقعدوا
برشا عباد في القهوة ركزوا معاهم و مشا لبالهم بطبيعة الحال اللي هوما كوبل.. خاصة و إنهم لابسين براسك كيف كيف
جا السيرفور وهبط أصيل petit déj
خزرت على جنب تدور في عينيها عالبلاصة اللي عجبتها عاللخر
سحر : قداش محلاااها هالبلاصة وقداش ترتح
أصيل : عجبتك
سحر : عاللخر
تبسم وجبد تليفونو كي سمعو يصوني
يلقاهاا سارة تطلب.. ضيق عينيه... وعلق عليها التليفون
سحر خزرتلو : علاش علقت
أصيل : تليفون مش مهم
سحر : تكونشي المجيرة
خزرلها وضحك : هههه شنواا.. أنا مجيرة و أنا كوال متاعك أسكت بالله أسكت
ضحكت وسكتت
درج بالضبط وجا ال petit déj
وبداو يفطرواا.. وسحر عادي تتصرف على طبيعتها وماهياش تتصنع.. الحاجة اللي خلات أصيل يفرح وهي معاه
قعدوا راكشين مدة باهية في الكافي.. يحكيو و يتناقشوا أمور قراية.. أمور عيشة وبرشا حاجات
يحكيو تقول يعرفوا بعضهم عندهم أشهرة