العميد (حكاية شرطي )

الحلقة 11

جات العشية و أصيل في الخدمة حتى مالفطور عمل تليفون جاه للبيرو.. الخدمة مكدسة ومانجمش يخرج
روحت آخر العشية للفوايي هي وبينومتها.. تعداو للرستو تعشاو وبعد دخلوا للبيت بدلوا حوايجهم وقعدوا
مع السبعة متع العشية.. الدنيا ظلمة
قام من بيروه بعد ماكمل الخدمة.. غرس يديه في شعرو
وهز مفاتحو بش يروح
دق الباب.. قال أدخل
دخل عليه خليل
أصيل : آ خليل شفما جديد
خليل قدم وعطاه التليفون : لقيناه
أصيل تبسم : يعطيك الصحة يا خشين... والفرخ وينو
خليل : خليناه في قسم التحقيق
أصيل : باهي هاني ماشيلو...
خذا من عندو التليفون شافو لقاه لباس عليه.. وخذا من عندو الورقة اللي فيها النومرو اللي بش يكلم عليه سحر
حطهم في جيبو وخرج هو وخليل
سكر بيروه.. ودخل لقسم التحقيق
يلقا الطفل قاعد على كرسي وظاهر خايف
دخل وسكر الباب
هز الطفل راسو وخزرلو.. وبدا يرعش.. خاصة كي را أصيل ينحي في الفاست من فوق
أصيل : قداش عمرك إنت
الطفل : عشر... عشرين
أصيل : و شيقلك مخك تخطف تليفون بنية و تفصع
الطفل خايف : غلطة.. غلطة ومعادش تتعاود نوعدك
أصيل عيط للعون.. دخل العون : نعم عميد أصيل
أصيل : إيجا هز ضيفو الليلة.. وغدوا تو نشوف معاه..
وقام هز الفاست متاعو وخرج
والطفل عينيه بالدموع خايف عاللخر لايشدوه عندهم برشا
طلع في كرهبتو.. طيش مفاتحو عالتابلو د بورد.. والفاست ع الكرسي اللي بحذاه
جبد تليفونو والورقة اللي عليها النومرو وطلبها
كانوا في البيت.. سحر قاعدة تبدل في الفرني.. و أحلام متكية تكونكتي
صونا تليفونها في يدها.. خزرت للنومرو ماعرفتوش
أحلام : شكون هاالي يطلب زعما
خزرتلها ونسات اللي هي عطات نومروها لأصيل.. يعني ماجابتش بال اللي أصيل يطلب
هزت : ألو
أصيل : ألو oui..
أحلام : شكون معايا
أصيل : تعديلي سحر
أحلام : شكون نقلها
أصيل : أعطيها تو هي تعرف
قامت عطاتها التليفون : سحر فما شكون حاجتو بيك
سحر : بيا أناا ؟؟ شكون زعما
أحلام : نعرش ماقالش
خذات التليفون : ألو
أصيل : وي سحر
سحر : شكون معايا
أصيل : العميد أصيل
سحر : آآ سي أصيل تفضل
أصيل : غدوا وين نلقاك
سحر : علاش
أصيل نحا التليفون من وذنو : ياا ربي تعاوني عالبهلولة اللي نقاسي فيهاا
عقدت حواجبهاا : فاش تحكي ياخي
رجع التليفون لوذنو : يا بنتي التبهليل يجري في دمك ولا شنيا حكايتك؟؟ مش جيتني البارح قلت تليفونك تسرق ؟
سحر : أي صحيح
أصيل : دونك وقتاش نراك بش نعطيك الصفاااا متاعك
سحر تبسمت : يااا سي أصيل لقيتهولي
أصيل : أي.. قلي غدوا وين نلقاك
سحر فرحت : باهي تحب نتقابلوا فين تقابلنا آخر مرة
أصيل : أوكي مع وقتاش
سحر : العشرة متع الصباح سافا
أصيل : أوكي
سحر : باهي مالا باي باي
أصيل : باي
علق و غرس يدو في شعرو : ملا مهبووولة يا زحي