العميد (حكاية شرطي )

الحلقة 47

الحلقة السابعة و الأربعون
سارة كانت قاعدة في ال appartement متاعها.. تخمم في أصيل وتخمم في سحر اللي فكتو منهااا ودموعها يجريو
قررت إنها تحارب وتبعدهم على بعضهم رغملي تعرف اللي اللعب مع أصيل خطر صافي وينجم يعيفها في حياتها آما حبها ليه عماها
تعدات الأيامات وحب أصيل و سحر كل يوم يزيد يكبر وكل يوم يمشيلها للفاك
و في الويكاند مرة يخرجوا وحدهم و مرة يهزها لدار امو وبوه
تعرفت عليهم الكل بالباهي.. وولت قريبة ليهم ياسر وخااصة أصالة اللي ولاو صاحبات عاللخرر وديما يحكيو
روحت أيامات لدارهم.. توحشتهم برشاا وتوحشت خوها الصغير .. وعاودت رجعت للفوايي
عشية خميس... خارج مالمركز.. بكل وهرة.. لابس لبسة الخدمة.. حط lunettes de soleil متاعو.. ركب في كرهبتو وطول ديمارا ومشا لدارو
سارة خزرت للتاكسي اللي واقفة قدام المركز : تبع الكرهبة هاذيكا عيشك
قلها باهي وخدم ومشا
بقات مركزة في الكياس تبع فيه ماغابش على عينيها جملا
شويا وقت ووصل أصيل لدارو وهي وراه
خزرت لدارو قداش مزيانة ومضخمة..
هبطت مالتاكسي بعد ماخلصتو.. وقدمت لباب الدار وضربت الناقوز
مشا بش يحل... حل يلقاها سارة في وجهو
ضيق عينيه : تفضل... شتعمل هوني
سارة : توحشتك برشااا أصيل والله
أصيل : قتلك شتعمل هووني.. ومنين تعرفها الدار
سارة : عرفتها وحدي.. نجم ندخل نحكيو شوياا
أصيل : ماعندك ماتحكي معايا.. برا روح
سارة : أمان أصيل تحب تقتلني.. نحبك رااني هبلت كي معادش تجيني
أصيل : أنا بش نخطب على قريب.. إفهمهاا هاذي
سارة : فاش خير مني هي بش تفضلهاا عليا
أصيل : نظيفة.. هي نظيفة.. تفكر روحك إنت أول نهار فين ريتك.. تحب نفكرك.. في ديسكو.. العريان أكثر مالمغطي...الشرب والدخان و الرجال اللي دايرة بيك.. هاذي حاجات ماتخلي حتى حد يحبك.. وزيد نفكرك اللي سيادتك راقدة مع قداش من واحد قبلي أنا بالطبيعة... دونك سكر فمك.. وبرا روح
سارة تبكي : صحيح عملت أذوماا الكل... آما تبت وتربيت أصيل
نفخ فاادد منها : مازلت موسع بالي معاك راني سارة.. برا روح ومعادش تحط ساقك هووني جملا
دخل وسكر الباب يتأفف ومكرز خاطر تبعتو لدارو
طلع لبيتو... عمل دوش خفيف... ولبس شورط وكلمها 
كانت قاعدة في فرشهاا حالة انستڨرام
رات إسمو ظهر عالإيكرون.. تبسمت وهزت طول
أصيل : سحرووورتي
سحر : أصيلووو يا روحي وينك
أصيل : هاني عزيزتي.. روحت توا للدار و إنت
سحر : هاني في الفوايي
قعدوا يحكيو شويا وعلق
روحت سارة للدار.. جبدت تليفونها.. ودخلت تلوج على سحر في الفايس.. و الأنستا.. تلوج على نومروهاا
طاحت بيه في الفيس.. قيدتو عندها وطلبتها بش تتأكد
راكشة في فرشها تقرا في كتاب.. شافت تليفونها يشعل.. خزرت لقات نومرو يطلب ماتعرفوش
حطت قصتها ورا وذنيها وهزت : ألو
سارة سكتت و تبسمت
سحر : ألوووو
وسارة تتبسم..
كي ماجاوب حد علقت
أحلام : شكون
سحر : نعرش ماتكلمش
أحلام : تلقاه غالط
سحر : يمكن أي
جاا آخر الليل.. حكات شويا ميساجات أنستا مع أصيل
تبسمت ورقدت..وهو دخل في فرشو رقد