العميد (حكاية شرطي )

الحلقة 35

الحلقة الخامسة و الثلاثون
ضيق عينيه يخزرلها شنوا جايبة في يدها
طلعت بحذاه.. خزرلها : شنوا هذاكا
سحر : كادو بسيط لأختك
خزرلها و سكت.. وديمارا ومشا
مع الخسمة بالضبط.. وصلوا
خزرلها : هاذي دارنا
تبسمت.. وسكتت
هبطوا الزوز م الكرهبة.. هي شادة الباكو.. وهو حل الباب من تالي وجبد الباكوات
سكر الكرهبة.. وخزر لسحر
حط يدو على كتفها وقلها هياا
الأجواء لداخل كانت مزيانة وحس الغناا مسموع
أصالة خرجت للجنينة فرحوا بيها البنات وداروا بيهاا يغنيو ويشتحواا
بين البنات كانت فما طفلة تقرا مع أصالة في الجامعة
مضروبة في أصيل عاللخر.. شافتو برشا مرات قدام الفاك يوصل أصالة... تدور في عينيها تلوج عليه وهو مافماش
دخل أصيل و معاه سحر
العينين الكل تنطرت جات عليهم
بما فيهم جودة و راجلها محمود
جودة طول خزرت لمحمود : شكوني اللي مع أصيل هاكي
محمود : منين نعرف.. يمكن زميلتو في الخدمة
البنات الكل خزرولهم بما فيهم يمنى البنية اللي قلنا تقرى مع أصالة
حلت عينيها وفمهااا عاللخر... وهي تخزرلهم جايين
شدها من يدهاا ودخل طول هو وياها وسط البنات
قرب لأختو و طول حملهااا الفوق وهي تضحك
وسحر تخزرلهم و تتبسم والبنات بحذاها شويا يخزرولهاا وشويا يركزوا مع أصيل
أصيل : كل عام و أختي نوارتي بخير.. joyeux anniversaire ma petite sœur d'amour
هبطها شويا وعنقهااا عاللخر وهي كيفو
باسها بوستين من خدودها.. و بوسة من جبينهاا
أصالة تضحك فرحانة : عيشك حبيبي الغالي ربي يفضلك ليااا يا أعز خو في الدنيااا
خزر لسحر.. وضمها لصدرو... وهي وجها حمار عاللخر مالحشمة
أصيل : نعرفك بسحر حبيبة ألبي
سحر تبسمت ومن داخل بش تدوخ بالحشمة
برشاااا بنات تصدمواا.. بما فيهم يمنى اللي طيحت الكاس من يدها من قوة الصدمة
أصالة تبسمت تبسيمة عريضة : ياااا مرحبا سحرورة عسلامة
سحر تبسمت : عسلامة أصالة.. وكل عام و إنت بخير وصحة إن شالله
أصالة : يخليك بو زينك عيشلي أختي
أصيل شد يد سحر اللي فيها الكادوات وخزر لأصالة : أذوماا كادوات لعزيزتي من عندي أنا و سحر
أصالة فرحت عاللخر  : يااا عيشك أصيلو يخليك ليااا.. و إنت سحرورة يخليك عزيزتي
وقربت عنقتهم و باستهم برشااا بوسات
حفل الجو ورجعوا البنات يشتحواا
وفما بنات قاعدين يخزروا لأصيل و سحر ماهبطوش عينيهم عليهم جملا
شد أصيل سحر من يدها ومشا لأمو وبوه
سلمت عليهم سحر و هي بش تموت بالحشمة على الوضعية اللي حطها فيها أصيل
جودة : شكوني هالمزيانة أصيل
أصيل : هاذي سحر أمي.. الطفلة اللي نحبهاا
جودة و محمود خزروا لبعضهم وتبسمواا
جودة تبسمت : مرحبا ببنتي مرحبااا.. محلاك و ماعزك
سحر تبسمت : عيشك تا
خزرت لأصيل : و أنا نقول شبيه ماخلانيش نشوفلو بنية.. ماو قلي عندك شكون يا وحيد
غرس يدو في شعرو.. وسكت
محمود : مرحبا ببنتي و نشالله ربي يوصلكم لبعضكم سالمين غانمين و يألف مابيناتكم
بلعت ريقها كلامو حبسها و أصيل حس بحاجة في قلبو
سحر : عيشك عمي ربي يخليك
جودة عدات يدها على شعر سحر : ماشالله على بنتي زين و عين..
خزرت لأصيل : هزها بابا و اقعدوا في طاولة.. وتوا تجيكم البنية تضيفكم
شدها من يدها.. و مشاو قعدوا في الطاولة
خزرلها.. حس بحاجة تجاهها وهي مش منجمة حتى تهز عينيها فيه
جودة لمحمود : محلاها البنية يااسر مصرارة وخير ملي جاو الكل
محمود : أي تبارك الله عليها.. منين زعما و شتعمل في حياتها
جودة : تو يحكيلي أصيل
جات خبزة الڨاتو مزيانة عاللخر وعلات الأغاني و التصفيق
جا أصلان لأصيل وقعد بحذاه قدمو أصيل لسحر
سلم عليها وقعد بحذاهم شويا و مشا
تعدا الوقت محلاه لين طاح الليل