العميد (حكاية شرطي )

الحلقة 14

ترشف من قهوتوو.. وشاف الوقت لقاه ال 11:30
مزال نص ساعة عالفطور وحب إنو يكمل نهارو معاها ويهزها يفطروا
أصيل : تحب نمشيو نفطروا
سحر : خلي والله مانحبش نقلقك
أصيل : معادش تقولها نقلقك سحر شبيك ياخي
سحر : باهي مالا
حط فلوس فطور الصباح عالطاولة.. هز مفاتحو و تليفونو وخرجوا يتمشاو مع بعضهم للكرهبة
قبل مايوصلوا للكرهبة بشوية.. صونا تليفون سحر
جبدتو لقاتها صاحبتها ميساء تقرا معاها
وقفت و أصيل وقف هو زادا يستنى فيها
هزت : وي ميساء
ميساء : أهلا سحر وينك
سحر : هاني وينك إنت
ميساء : ماجيتش للفاك اليوم
سحر : لا البرا أنا توا
ميساء : باهي أسمعني توا قاعدين يعلقوا في ال affichage متع المعدلات و النوطات
سحر : ياا بجدك شوفلي المعدل ميساء يعيش أختي
ميساء : ستنى مني ميساج دقيقة بركا
علقت التليفون وخزرت لأصيل اللي كان يخزرلها
أصيل : هبطولكم les moyens ؟
سحر : أي هاي بش تشوفلي صاحبتي
دقيقة بالضبط ووصلها الميساج
طول حلتو و تبسمت تبسيمة عريضة
أصيل : نورني تره
سحر خزرتلو فرحاانة عاللخر و طول ترمات عليه عنقتو
ضحك وعنقها يربت على ظهرها بحنية
سحر : semestre validée avec mention très bien
أصيل : مبروووك يا صغرونة صحيت صحيت
بعدت عليه شوية حاشمة وفرحانة : سامحني من قوة الفرحة عملت أكاكا
قربلها وجبدها من خشمها
تبسمت وركبوا في الكرهبة..
ثنية كاملة وهي تتبسم فرحانة.. وصلها ميساج آخر من ميساء حلتو تقراا قالتلها اللي هي لولة في الكلاس
زاادت فرحت أكثر
خزرلها أصيل : فما خبر آخر يفرح ؟
سحر خزرتلو : جيت لولة في الكلاس
أصيل تبسم : أووو حالة معاااك إنت.. هاك طلعت قراية برشا
تبسمت مالحشمة : وجهك مبروك عليا
أصيل ضحك.. سكت شويا وبعد تكلم : صحيت سحرورة.. كمل هكاا ماتفيدك كان قرايتك
خزرتلو ورجع بيها الوقت لستة شهور لتالي
كانت مصوحبة طفل كان ديما يبعد فيها على قرايتها ويقلها كلمة كهو '' المراة آخرتها دار راجلها و القضية ''
الحاجة اللي خلاتها تقصها معااه وتختار قرايتها ونجاحها
تنرفزت كي تفكرت كلامو المشوم ومخو المحدود
وخزرت للفرق الكبير بين كلامو و كلام أصيل
وصلواا لرستو مضخم يهبل متع ناس قماقم
هبطوا مالكرهبة.. خزرت للضخامة من براا عجبتها عاللخر
نفض الفاست متاعو.. وقلها هيا
دخلوا يتمشااو.. عرضهم مولا الرستو صحاب هو و أصيل
فرح كي شافو و سلم عليه : أصيلو حبيبييي
أصيل : بوو العز وينك
معز : هاني صديقي وينك إنت.. مرحبا بيك بحذاي
أصيل : يعيش خويا
معز : أنست بيهااا البنوتة
سحر تبسمت
أصيل : يحفظك عيش خويا
معز : أيا تفضلواا دقيقة بركا و يجيك ال personnel
أصيل : يحييك
ودخل هو و سحر خذاو كوان كالم بعيد عالحس و على كل شي
قعدوا.. حط مفتاح الكرهبة و تليفونو عالطاولة
جا ال personnel وهبطواا فطور يفتق عاللخر
قعدوا يفطروا ويحكيو ويضحكواا عاملين جو قريب الساعتين
وزادوا هبطوا زوز jus وقعدوا يحكيو على برشا حاجات
كملوا الفطور وقامواا
مشا بش يخلص معز ماخلوش يخلص حتى فرنك
سلم عليه.. وخرج هو وسحر يتمشاو للكرهبة
ركبواا في الكرهبة
خزرلهاا : تفرهدت؟
سحر تبسمت : برشااا.. عيشك سي أصيل
أصيل : فين نمشيو توا
سحر : نروح للفوايي
أصيل تبسم وديماراا ومشااا طول للفوايي