العميد (حكاية شرطي )

الحلقة 26

الحلقة السادسة والعشرون
فاق الصباح.. حضر روحو و فطر وخرج لخدمتو
وسحر زادا فاقت هي وبينومتها حضروا رواحهم و خرجوا كالعادة خذااو قهاوي وكرواسون و تمشاو للفاك يحكيو
عدا أصيل نهارو في الخدمة وسحر قراية
وكيما تعدا النهار هذاا.. تعداو خمسة أيامات مافيهم شي جديد كان الخدمة على أصيل.. و قراية على سحر
لا هو كلمها ولا هي كلمتو
تفكرتو وكانت محسوب كل يوم تتفكرو خاطر عمل معاها حاجات مش متع انسان يتنسى
أصيل زادا كانت ديما تجي على بالو خاصة الأيامات لولة وبعد تلها في الخدمة مخو معادش مشغشب
صباح نهار سبت
فاقت كالعادة حضرت روحها.. لبست سروال دجين و مريول صوف نوار معاه بوني نوار و هبطت شعرها على أكتافها
مكيجت.. لبست البورتكان متاعها.. هزت ساكها وخرجت
أصيل زادا فاق الصباح
حضر روحو.. لبس لبسة الخدمة.. فطر و هز تليفونو ومفاتحو وخرج
ركب كرهبتو و ديمارا ومشا
خرجت مالفوايي تتمشى كالعادة.. خذات قهوتها وكملت ثنيتها
في الثنية...
تعدا أصيل مالكياس اللي المرة لولة تعاركوا فيه
خزرلها تمشي على حافة الكياس.. وقف الكرهبة
فرح برشا كي راهاا بعد جمعة
طول عمل marche arrière ورجعلهاا
هزت راسها الي كان غاطس في التليفون وشافتو وقف بالكرهبة
تبسمت ووقفت من شيرتو هو : سي أصيل صباح الخير
أصيل : صبااحوو
سحر : هاك هوني
أصيل : ماشي نخدم
سحر : أيا باهي
أصيل : و إنت هاك هوني
سحر تبسمت : ماشية نقراا
أصيل : إطلع نوصلك
سحر : لا ماتقلقش روحك سي أصيل هاي هوني نوصللها في درجين à pied
أصيل : إطلع
ضمت شفايفها لبعضهم ودارت من غادي وطلعت بجنبو..
خزرلها و ديمارا ومشا
في الثنية
أصيل : شنوا تعمل اليوما
سحر خزرتلو : نكمل نص النهار وبش نخرج نعمل دورة
أصيل : دورة كيف السبت اللي فات ؟ وتروح مخر وترصيلك في المشاكل
سحر عدات يدها على شعرها : فازة صارت مرة بالغالط مش بش تبقى تتعاود
خزرلها و سكت
دقيقتين ووصلوا قدام الفاك
جات شتهبط وقفها : ستنى سحر
سحر خزرتلو : وي سي أصيل
أصيل : عيد ميلاد أصالة أختي غدوا.. نحب ناخولها كادوات وماعنديش برشا أفكار.. و إنت هاك خارجة تحوس نخرجوا مع بعضنا وفرد مرة تعاوني على الكادوات
حطت قصتها ورا شعرها : باهي مافما حتى مشكل
تبسملها : بو زينك.. وقتاش نتعدالك مالا
سحر : أنا نص النهار تلقاني هوني قدام الفاك
أصيل : باهي بيناتنا التليفون حاسيلو
قتلو باهي.. وهبطت
ديمارا و مشا لخدمتو.. وهي دخلت للفاك