العميد (حكاية شرطي )

الحلقة 54

روحت سحر لدارهم تعدي نهارين وتقلهم عالحكاية
وصلت.. سلمت على أمها وخوهاا ساجد جا يجري يبوس فيها توحشها
قعدوا في الصالة هي و أمها
حنان : هاك روحت يا وحيدة على غفلة ماتقولش
سحر : توحشتكم هاني جيت.. وزيد ما عندي مانحكيلك
حنان : أحكي عزيزتي نسمع فيك
سحر : ما فما شكون يحب يجي يخطبني
حنان هزت حواجبها : يخطبك ؟؟ شكون
سحر : عميد شرطة إسمو أصيل نعرفو عندي مدة ونحبوا بعضنا ويحب يجي يخطبني في راس العام
حنان : واللهي شباش نقلك عزيزتي
سحر : ما أصيل باهي عاللخر والله تو كي تراه وتحكي معاه تعرف قداش يعز... وزيد عندو كلمة و قادر يعمل اللي يحب عليه..
حنان : أي و بوك شباش تقلو
سحر حكت شعرها تتبسم : المهمة هاذي عااد تابعة الحراير اللي كيفك
حنان ضحكت : يااا وحيدة كولني بالهف كولني
سحر ضحكت : تو ما الراجل راجلك وتعرفو أكثر مني.. وتعرف كيفاش تجبدلو الموضوع
حنان : باهي سحرورتي الليلة نكلمو تهنا
باستهااا و قامت تعاون فيها في أمها عالعشا
مع الستة دخل سي عصام.. وعيط لحنان
سمعتو سحر يعيط خرجتلو تتبسم
ضحك : سحرورتي روحت
سحر : عسلامة pa توحشتكم هاني جيت نطل عليكم
عصام : مرحبا ببنتي
سلمت عليه و عنقتو.. ورجعت للكوجينة مع أمها وعصام طلع لبيتو يدوش و يبدل حوايجو
أصيل كمل خدمتو.. كلم سحر إطمن عليها وخرج ركب في كرهبتو ومشا لدارو ركح أمورو وعاود خرج مشا يعدي الليلة في دار أمو وبوه
طاح الليل.. حضرت حنان الطاولة هي و سحر... ساجد في بيتو يراجع و سي عصام يصلح في الإمتحانات متع التلامذة متاعو
طلعت سحر عيطت لساجد.. و حنان خرجت للجنينة تعيط لعصام
شويا وقت... وتلموا الأربعة على طاولة العشا
تعشاااو و هوما يحكيو ويفدلكواا وعاملين جو
كملوا العشا.. رجع سي عصام يخدم يصلح في الأورااق.. و حنان مشات تحضر في قهاوي ليها و لراجلها ويقعدوا في الجنينة
وسحر دخلت لبيت ساجد تقري فيه وتفسرلو في حاجات
حضرت حنان القهاوي وخرجت قعدت بحذا راجلهااا
حنان : عصام
عصام : وي عزيزتي
حنان : تتفكر وقت جيت خطبتني
هبط لينات النظر متاعو شويا وخزرلهاا : نتفكر بالطبيعة
حنان : و شقولك
عصام هز حواجبو : قولي في شنواا
حنان : في الخطبة
عصام : مصروف زايد... كان ڨدحت عليك طول وعرسناا خير
حنان ضحكت : تي لا عاد لازم منها الخطبة.. بش هكيكا نعريلك راسك بالمصروف و الخرجات قبل مانعرسواا
ضحك عليهاااا : يعطيك الصحة ما قصرتش... قلي إنت علاش جبدت موضوع الخطبة
حنان خزرتلو : فماا موضوع ونحب نحكي فيه معاك
عصام نحا اللينات و حط الأوراق عالطاولة و خزرلها : أحكي نسمع فيك
حنان : فما شكون.. يحب.. يحب يجي يخطب سحر
شبك يديه في بعضهم.. : شكوون
حنان : إسمو أصيل... يخدم عميد شرطة.. يحب يجي راس العام ويخطب بنتناا
عصام سكت
حنان : شرايك علاش سكتت
عصام : نحب نحكي مع سحر لول
حنان : باهي تو نعيطلهاا
وقامت تعيط لبنتها
سحر خافت : علاش ماا شبيه شقال
حنان : ماتخافش ماقال شي.. قلي نحكي مع سحر لول.. و إنت أحكي اللي عندك الكل.. هذا بوك صارحو بكل شي وتو ترا كي مايعاكسكش
هبطت هي و أمها ومشااو بحذا سي عصام