العميد (حكاية شرطي )

الحلقة 2

حطت تليفونها في جيبها وكملت ثنيتها منرفزة عاللخر مالتكبر متاعو
َوصلت للفاك.. دخلت قعدت في بلاصتهاا
نحات الكابيش وعدات يدها على شعرها تركح فيه
شويا وقت و بدا الكور.. ركزت مع الكور وفهمت وتعدا الوقت وجات ال 11
خرجت مالفاك و ماشية طول للمركز
َوقفت تاكسي و طلعت
سحر : مركز الشرطة بربي
قلها بااهي و ديمارا ومشا
شويا وقت ووصلت قدام المركز... خلصت التاكسي وهبطت وطول دخلت
عون في الإستقبال : تفضل مادموازال
سحر : نحب نقدم شكاية
العون : شنيا الحكاية
سحر : فما واحد قريب يضربني في الكياس اليوما الصباح وماحاولش حتى ياقف يشوفني لباس ولا لا.. خذيت سيري كرهبتو جاية نشكي بيه
العون : البيرو الأول على يدك اليسار تدخل للعميد أصيل تحكيلو مشكلتك
قتلو ماغسي و دخلت
وصلت للبيرو.. دقت الباب وتستنى فيه يرجع
تسمع في صوت قال أدخل
حلت الباب ودخلت.. هزت عينيها تلقا راجل عاطي بالظهر ولابس لبسة الخدمة
أصيل : تفضل شنوا تحب
سحر : جيت نحب نشكي
أصيل : بشكون
سحر : بواحد الصباح قريب يضربني بكرهبتو... هاني صورت سيري الكرهبة و جيت بش نشكي بيه
أصيل تبسم وعرفهاا طوول وحتى الخزران ماشافهاش
أصيل : 217 تونس 5430
جبدت تليفونها وخزرت للسيري لقاتها هي بيدهااا
سحر : أي هااذي هي السيري منين تعرفو السخطة مولا الكرهبة.. وعلاش عاطيني بالظهر ماو أخزرلي كي نحكي معاك
دار بالكرسي متاعو يتبسم وخزرلهاا.. خزرتلوو
وجاات العين في العين
حلت عينيهاا و فمها مصدومة
السيد اللي جاية تشكي بيه طلع هو العميد أصيل
بقات ساكتة مدة قصيرة قرابة الدقيقة تخزرلو و يخزرلهاا
هو يتبسم في تبسيمة متع بلادة وهي مصدومة
كسر السكوت هذا أصيل كي بدا يتمقصص عليها : السيد اللي قريب يقتلك يلزمناا نشدوه عندك حق مايجيش منو
وسحر ساكتة وتخزرلو
قاام يتبسم وقدم وقف قدامها
هبط عينيه يخزرلها وهي هزت راسهاا تخزرلو
سحر : صاارا هو إنت
أصيل تبسم
سحر : معناها خاطر تخدم هوني تغلط وماتطلبش السماح ؟
أصيل : يا بنتي شبيك مهبولة.. تي هاك لباس عليك كالعفريت فاش قام نطلب في السماح
سحر : خاطر غلطت في حقي و فجعتني
أصيل : يااااي سملا عليك
سحر : معناهااا أنا ماعنديش الحق نشكي بيك
أصيل : تنجم بالطبيعة.. هاني قدامك إشكي
سحر بدات تفد : باهي يا سي العميد مش لازم نطالب بحقي
أصيل تبسم : كملت كلامك
سحر : أي.. بالسلامة
هي جات خارجة وهو وقفهاا