العميد (حكاية شرطي )

الحلقة 49

سارة كانت تتفرج عليهم من فوق.. وتتبسم فرحانة
كلمت الطفل وقتلو يرد بالو خاطر أصيل ساهل ياسر يطلعو
روحت للفوايي.. ثنية كاملة وهي تبكي وسط التاكسي
الشوفور راجل كبير قعد يخزرلها : شبيك بنتي عندك مشكلة
خزرتلو تمسح في دموعها : لا لباس لباس
الشوفور : ماتحط شي في بالك.. تو ربي يحلها وراس بنتي
خزرتلو بعينين ذابلة وسكتت
وصلها قدام الفوايي.. ماحبش ياخو عليها حتى فرنك
حاولتو بش ياخو قلها لا وقعد يهدي فيهاا
تبسمتلو بوجيعة.. سلمت عليه وهبطت دخلت طول للفوايي.. لبيتها... ترمات على فرشها تبكي بحرقة بوجيعة بشوية كبيييرة عاللخر لين هزها النوم وهي مطيشة عالفرش بحوايج الخرجة وحتى من ساكها على كتفها
وصل أصيل للمركز دخل طول وخزر للعون : عيطلي لخليل
عون : حاضر عميد أصيل
مشا طول يعيطلو.. و خليل سيب كل شي ومشالو
دخل : تفضل عميد أصيل
أصيل : بش نعطيك نومرو نحبك تطلعلي متع شكون وفيسع زادا الحكاية ساهلة
خليل : أي عميد أصيل هات وشعليك
أصيل : ونحب تقرير عالنوامر اللي كلمهم وكلموه الكل
خليل : حاضر سيد العميد
مشا خليل يعمل فلي قلو عليه أصيل و أصيل قعد يخمم في سحر كان متأكد اللي هي في حالة ماتعجبش آما حب يخليها على راحتها لين يفهم الحكاية الكل وبعد يفسرلهاا
جات العشية.. دق خليل الباب على أصيل و أصيل قلو أدخل
دخل
أصيل : شفما جديد
خليل مدلو لوراق : هاذي الليستة متع النوامر اللي كلمها النومرو اللي تلوج عليه جمعة كاملة..
أصيل : شكونو
خليل : إسمو عصام.. عصام الورتاني.. يسكن في طريق أريانة
خزر لليستة.. يلقا سارة مكلمتو آخر مرة.. و كلم سحر وقت سارة كلمتو قتلو إيجااني
فهم اللعبة الكل.. خزر لخليل : الطحان هذا كي يبدا في كرش حوتة نحبو قدامي.. هز أعوان معاك.. وجيبوه مهما يصير
خليل : حاضر سيد العميد
عملو تحية وخرج طول هز معاه أعوان ومشاو
عمل تليفون مالفيكس يعيط لعون.. دقيقة بالضبط وجاه
العون : تعليماتك سيد العميد
أصيل : امشي توا لعمارة يقين الطابق الثاني أول appartement على يدك اليسار.. تلقا فيه طفلة إسمها سارة.. جيبها لهوني... ماتلقاهاش لوج عليها أخلقهاا نحبها في المركز اليوم قبل غدوا
العون : حااضر سيد العميد
عملو تحية.. وخرج
تكا راسو لتالي منرفز عاللخرر ويستنى وقتاش يجيو
روحت أحلام للبيت.. دخلت تلقا سحر مرمية على فرشها
تفجعت ومشات تجري تشوف فيهاا
حلت عينيها وخزرتلهاا
أحلام دخلت فيها غولة كي رات عينيها منفوخة عاللخر ووجهاا تاعب وحالتها ماتعجبش بالكل
أحلام : شفما سحر شبي وخيتي
عينيها دمعت.. وطول عنقتها تبكي بمرارة
قعدت أحلام تهدي فيها وهي مش فاهمة شي
أحلام : قلي شبيك سحر بالله شنوا صار
بعدت عليها شويا وبدات تحكيلها فلي صار
حلت فمها مذهووولة ملي تسمع فيه..
قعدت بحذااها مصدومة : impossible.. أصيل يعمل هكا
خزرتلهاا بمرارة
أحلام حطت قصتها ورا وذنيها : كي تجي تشوف سحر.. هاك ترا توا اللي عندو شويا زين يولي يلعب ببنات الناس.. فما بالك أصيل.. مالزين يقلك أنا.. مالفلوس يقلك أنا... مالخدمة والشهايد يقلك أنا... الراجل عميد وما أدراك... يعني كل شي تتوقعو منو
سحر مسحت دموعها : كنت نرا فيه حاجة أخرى.. كلمها قدامي الطفلة وقلي راو عديت بيها وقت وهي قابلة الشي هذا آما ماعاودش مشالها ملي حبني
أحلام : شكون قلك مامشاش المرات اللي تعدات.. كيما مشا ليوم.. ينجم يكون مشا قبل
سحر خزرتلها : عندك حق والله.. أنا غالطة ماللول..
عنقتها قعدت تهدي فيها وسحر تبكي
طاح الليل..
خرج من بيروه مشا لكرهبتو
عمل تليفون للأعوان قالولو اللي هوما مش موجودين وقاعدين يستناو فيهم يظهروا بش طول يشدوهم
قلهم باهي وديمارا ومشا لدارو