العميد (حكاية شرطي )

الحلقة 36

الحلقة السادسة والثلاثون
بدات أجواء عيد الميلاد.. قصت أصالة الڨاتو و فرقوا عالضياف الكل وعملوا برشااا جو.. و غنا و شطيح و الشجرات يشعلوا بالضو و النفافخ في القاعة وفي البيسين
أصيل وسحر كانوا قاعدين في الطاولة وبرشا عينين عليهم
جات الثمنية والحفلة وفاات
سحر خزرت لأصيل.. طبس عليها شويا
سحر : الفوايي يسكر توا سي أصيل
أصيل : ماتخافش تو نتصرف.. ونحيها سي مافماش حبيبة تقول لحبيبها سي رااو
عملتلو ڨريماس بوجها وكتفت يديهاا : بربيي
أصيل ضحك وحط يدو على كتفهاا
بداو الضياف يروحواا.. شويا وقت و روحواا الكل
قعدت كاان جودة.. راجلها.. أصيل.. سحر.. أصالة.. و أصلان
دخلوا للصالة الكل وسحر وجها أحمر.. مش عارفة شنوا بش تعمل
أصالة جات شتطلع لبيتهاا.. خزرت لسحر : سحرورة تجي معايا لبيتي نتعرف عليك أكثر
سحر تبسمت : أي بالطبيعة
طلعوا في الدروج.. و أصيل يخزرلهاا
جودة : أيا إيجا بابا أحكيلي أي
أصيل :. شبش نحكيلك
جودة : كيفاش تعرفت عليها البنية
أصيل قعد : تقرا في فاك بحذا خدمتي.. نعرفها عندي مدة
جودة : شتعمل في حياتها
أصيل : نديدة أصالة.. تقرا قانون..
جودة : ماشالله.. و فين تسكن و شنوا أهلهاا
أصيل غرس يدو في شعرو : تسكن في cité قريبة من هوني.. و أهلها ناس طيبين كيفكم إنتوماا
جودة : محلاهاا عجبتني مصرارة و فينو
محمود : أي وقتاش نخطبولك مالا
أصيل : بابا الحاجة هاذي مش في وقتها.. سحر تقرا.. والديها يقريو.. أنا نخدم وكل واحد لاهي.. كي نتفاهم معاها تو نقلكم
قعدوا يحكيو.. وجودة فرحت لولدهاا برشاا
أصيل كان يحكي كايني سحر بالحق حبيبتو... حس معاها ببرشا حاجات ومش بالساهل أصيل يدخل لدارو اللي يجي وخاصة داار أمو و بوه
البنات الفوق قعدوا يحكيو ويهروا أمور قراية وبرشا حاجات
أصالة فرحت بيها عاللخر و لقات بنية تخمم كيفها ولقات روحها ياسر متناسقة معاهاا
شاف منڨالتو لقاها التسعة
قام و طلع لبيت أصالة
دق الباب قالت أصالة أدخل
دخل وخزر لسحر : هياا سحر نمشيو
أصالة : أقعدوا باتوا هوني خويا
أصيل : لا عزيزتي.. أنا نخدم بكري و سحر الفوايي متاعها قريب يسكر
سحر ضيقت عينيها وخزرتلو.. خاطر علمتو من بكري اللي الفوايي سكر
سلمت على أصالة وقالتلها نتقابلو قريب.. وهبطت سلمت على بو أصيل و أمو
جودة : مرحبا ببنتي نورت الدار.. المرة الجاية تجي تعدي معاناا نهار كامل
سحر تبسمت : نشالله طاطا يخليك
محمود : ربي يصونك و يحمييك و ينجحك بنتي الغالية
سحر : عيشك عمي محمود ربي يفضلك
سلمت عليهم الكل وباست أصلان.. وطول خرجوا ركبوا في الكرهبة وديمارا ومشا
تكات راسها لتالي.. وقعدت تخزر للكياس تبع في الخطوط سارحة
كسر الصمت أصيل
أصيل : شبيك سحر
سحر خزرتلو : عملنا حاجة غالطة اليوم سي أصيل
أصيل : كيفاش
سحر : أمك وبوك فرحانين اللي إنت عندك شكون في حياتك.. وصدقوا اللي أحنا في علاقة.. في وقت اللي أحنا مابيناتنا شي
كلمة قالتها حس روحوو توجع عاللخر كلمة مابيناتنا شي
خزرلها : تو تتحل سحر ماتخممش..
عدات يدها على شعرها وسكتت شوية وعاودت تكلمت : فين هازني توا
أصيل :ماحبيتش نبقاو نتعشاو غادي.. وجهك أحمر كالطماطم تو تذوب في وسطناا.. نتعشاو البرا وبعد تو نروحوا لداري وغدوا عالصباح نوصلك للفوايي
قتلو باهي وسكتت