مادريت أن اللي يحبني يبي حزني

سالفة محسن

في المجلس
-يامرحبا ب..
-نايف اسمي نايف
ابتسم الشايب بفرح
-انت نايف ماشاء الله حياك الله
وهو مستحي ومو عارف من هذا اصلا
-الله يحيك ياعم
-متى جيت لديره؟
-قبل اسبوع
-انت لحالك
-لا معي ابوي واخواني
-كم صار عمره اخر اخوانك
-الحين قده 11 سنه
-ماشاء الله
دقت حور الباب فقام الشايب وجاب القهوه كانوا يتهامسون وباين على الشايب انه معصب نزل راسه نايف عشان يبين لشايب انه ماشافه دخل وحط القهوه صب له قهوه واعطاه نايف وجلس معه قال نايف
-ياعم ممكن اسألك؟
ببتسامه
-وحد يقول لولد ضي لا
-الله يسعدك ياعم بس من وين تعرف امي الله يرحمها؟
-امك لها فضل علي ما أنساه طول عمري
استغرب نايف وتحمس عشان يعرف حط شماغه اللي على كتفه على راسه وزبط جلسته
-وشهو ياعم المعروف؟
باين على وجهه الحزن
-ماقالك ابوك؟
انصدم ان ابوه يعرف هذا الرجال بس سوا نفسه عادي وابتسم
-لا والله ماقالي
حرك الشايب يده بتعجب وقال في نفسه
-غريبه قاسم ماقالهم شكله فيه شيء ماني مخرب عليه
غمض عينه شوي وطالع في نايف اللي واضح عليه الهفه مايصدق يسمع شيء عن امه ووده يطير من الفرحه حك الشايب دقنه وهو يهوجس مل نايف من انه ينتظره وقال
-ياعم شفيك؟
طالع فيه وقال بضحكه
-لالا بس كل ماتذكر ادعيلها
-طيب ياعم تكفى قولي وش سوت امي؟
وهو في نفسه يقول
-شكلي بقوله سالفة البير وبس
تنهد وهو يتكلم
-هيييه ياجعلك الجنه يا أم نايف بقولك السالفه من الأول
عدل جلسته مره ثانيه وشرب قهوته اللي بردت بسرعه والحماس على وجهه
-انا بدوي ورحال في يوم رحلت مع زوجتي الحامل بشهر السابع وتعبت من طول الطريق وطاحت من التعب فكان فيه بير قدامي رحت عنده أركض واعبي لزوجتي من الماء واسقيها بعد ماسقيتها طلبتني نجلس شوي نريح وافقت وجلست وعاد بيت الشعر على ظهر الحمار ( الله يكرم القارئ) جلسنا نسولف شوي الا نسمع صوت بزر يضحك جاء لمنا انا وزوجتي ولما شافنا استغرب كان باين عليه ان عمره سنتين او ثلاث قام التفت وكان يقول ماما ويأشر علينا نزلت راسي خوف أن تجي حرمه سمعت بعدها صوت حرمه تقول مين انتو؟ ردت عليها زوجتي
حنا من رحاله بنجلس هنا شوي وبنروح
فقالت
-حياكم الله لبيت ابوي
طالعت فيني زوجتي وقلت بصوت واطي
-قولي لا
فرفضت زوجتي
حركة راسها وقالت
-اللي يريحكم
ونادت البزر الصغير وهي تقول
-نايف هيا مشينا
فز نايف وقلبه فز معه
-انا البزر؟
حرك راسه ب أي وهو مبتسم
شقت وجهه الابتسامه
-كمل ياعم
ضحك وقال
-المهم بعدها انت  رحت ورى امك جلسنا شوي الا يجي شايب يرحب فينا قمت انا وسلمت عليه فطلع جدك سلمان
قالي
-اقلط حياك الله
فكنت مستحي ورفضت الا يلزم علي ورمى شماغه علي عشان ارضي فماحبيت ارده ودخلت عند مجلس الرجال مع جدك وخوالك وزوجتي مع الحريم فجات الغيبه فشفت جدك يغمز لخالك علي نط علي وخرج عرفت انه يبي يجب ذبيحه فلما قمت عشان احلف نط جدك
-والله ماتردني ياضيف
وافقت مع اني متفشل جاء الليل وجابوا العشاء تعشينا ووقتها حلف جدك الا امسي عندهم امسيت مع العيال في غرفة وزوجتي مع الحريم في غرفة ثانيه المهم من بكره كنت ناوي اروح افطرت عندهم الصباح ويوم صرنا تسع الصبح قلت بروح خذيت زوجتي اول مابعدنا شويه فطاحت زوجتي تعبانه وماعاد قدرت تتحرك المهم ورجعت عندهم واللي اهتم بزوجتي هي امك الله يرحمها فزوجتي وقتها جاها نزيف وتعبت فوديتها المستشفى وضي كل يوم تروح عندها وانا استحيت اجلس عند خوالك فقلت بروح  اترزق الله خذيت رقم خالك علي وطلبت منه اذا ولدت زوجتي بسلامه يكلمني رحت وجلست شهرين وصار معي خير صح مو كثير بس قدني اقدر ابني ولو طوبه فكلمني علي يبشرني ان زوجتي ولدت وجابت بنت انا الارض ماعاد شالتني من الوناسه ولما جيت للديار ورحت للمستشفى خذيت بنتي وزوجتي ورايح اتشكر خوالك اصدموني بخبر وفاة جدك شلت بخاطري ليش ماقالوا لي  ويوم سألت متى مات كان بعد مارحت بأسبوع عزيتهم ويوم قدني بروح لحقتني امك وقالت لي-معك فلوس؟
فرديت-اي الحمد الله
فقالت لي وقتها شيء ماعرف كيف اجازيها عليه قالت-ابوي بعد مامات الله يرحمه ورثنا الأرض انا واخواني وانا طلع لي هذيك الارض مع البير فطلبتك لا تروح انا عارفه حالتكم اللي بتبنيه ابنه في هذي الارض وبروح للمحكمه واسجلها بأسمك
انصدمت وقتها وقلت-وانتي هذي ارضك؟!
فقالت لي-انا جايه هنا عشان زوجي مسافر وانا ثقيله في حملي بعدها بروح لما ولدت بسلامه مع زوجي لديرته وانا ما أجي اهلي الا في الاجازات والبيت كبير وقد فيه الشيء اللي بيوسعني انا وعيالي
رفضت بالبدايه بس مع لح زوجتي وام نايف وافقت وحطت الارض بأسمي والله يدخلها جنات النعيم
عين نايف لمعت وهو ماسك الدمعه نزل راسه وتنهد يقول-الله يرحمك يمه
مشكور انك علمتني ياعم
-والله انا اللي لو امك عايشه كان شكرتها في اليوم مليون مره بس طلبتك ياولدي ناد اخوك الصغير ابي اشوفه
-ابشر ياعم بس وش اسمك؟
ابتسم
-اسمي محسن
الاسم ماكان غريب عليه بس ماهتم وطلع ويشوف حور وهي تلمس رعد بأعجاب تحمحم فلفت عليه وبسرعه حطت شليتها عليها ورجعت بيتهم اخذ نايف رعد وهو بس يفكر بحور وقلبه يدق.