أنت الذي حطيت بالجوف رمحين

16

صحت من سمعت صوت رَعد اللي يكلّم ورفعت نظرها تشوفه واقف ومعطيها ظهره
هز راسه رَعد : تمام ان شاء الله بعد المغرب اجيك
قفّل ولف لورد اللي سمع صوتها تتحرك
رَعد : صحيتي ؟
هزت راسها ورد وهي تعدل طرحتها وقامت من مكانها تتوجه لباب الغرفة تخرج
رَعد : على وين ؟
ااشرت ورد لباب الحمام اللي امام غرفة رَعد
رَعد بأبتسامة يأشر على اللي موجود بغرفته : في هنا واحد
عقدت حواجبها ورد تناظره : خلّه لك
ابتسم رَعد من شاف انحراجها وهي تخرج ، دخلت تغسل وجهها وتناظر انعكاسها بالمرايا امامها ملامحها اللي صار يبين فيها الحزن من الوضع اللي هي فيه ، وضّت وخرجت تصلي الصلوات اللي فاتتها ، رفعت يدينها تدعي ربها من سلّمت وبصوت مسموع : يارب وكلّتك جميع اموري ، قامت من السجادة تتوجه لرَعد اللي واقف بالصالة ينتظرها
رفع نظره لورد اللي تنزل من الدرج ، ورد : نمشي ؟
هز راسه رعد وكملوا يخرجون للسيارة ، وبخطوات سريعة سبق ورد يفتح لها الباب وابتسمت ورد له من ركبت وقفل الباب خلفها ويمشي يتجه لبابه ويركب هو ، مدّ يده للشاشة يشغل اغنية وابتسموا من اشتغلت اغنيتهم نفسها بيوم حادث ورد وتكررت عليهم مشاعر التوتر
' كيف نخفي حُبنا والشوق فاضح
وفي ملامحنا من اللهفة ملامح '
شدّت ورد على يدها من شافت ابتسامة رَعد اللي تذكر موقفهم بنفس اليوم ، ورفعت جوالها تردّ على اتصال رنا
ورد : هلا
رنا بعصبية : وينكم نايمين بالعسل انتوا !
ورد : جايين
رنا : لا تتأخرون ، ترا بدوا يشكّون ومن اليوم يسألوني
ورد : خلاص بالطريق احنا شوي ونوصل
هزت راسها رنا تقفل الجوال وتناظر طلال المبتسم امامها ، رنا بأستغراب : شفيك ؟
طلال بأبتسامة يتأملها : حتى وانتي معصبة حلوة
ضحكت رنا من طلال واقتربت منه تمسك كفّه : تتوقع الوضع بيطوّل ؟
هز راسه طلال بالنفي : ما اعتقد مستحيل ابوي يخلّي رَعد ويقبل ياسر اللي ما نعرف حتى اصله
رفعت كتوفها رنا : والله ما ظنتي ، شفت ردة فعل جدي من سمَع اسمه ! حتى اايّد عمي بدون ما يفكر
طلال : الله ييّسرها ، قرّب طلال لخد رنـا واستغرب من تراجعت رنا للخلف
رنا بأبتسامة : مو هنا
طلال : وين اجل ؟
رنا : ببيتنا ، الحين هنا الوضع ما يسمح
قام طلال وقامت رنا من سحبها طلال معاه : اجل مشينا نرجع بيتنا
ضحكت رنا من حركة طلال وهزت راسها بالنفي : لا مانقدر نخلي رَعد وورد ونروح ، بالليل نرجع
رفع كتوفه طلال يبتعد وبأبتسامة : خسرتي
رنا بأستغراب : ايش خسرت ؟ ، لف طلال لها يرسل لها بوسة بالهواء ، ابتسمت رنا ورجعت تتوجه للبنات اللي جالسين بالحديقة
ريما : رنا وينهم ورد ورَعد
رنا : قالوا لي بالطريق
ااشرت عهد على سيارة رَعد : جو
لفو البنات نظرهم لسيارة رَعد وشافوه يتقدم بخطوات سريعة يفتح الباب لورد ونزلت ورد تبتسم له ويبادلها الأبتسامة ، سمر : احلى يالحبّيبة
كملت ورد تمشي للبنات ومن وصلت لهم : وينهم عماني وابوي وجدي؟
رنا : مدري كلهم خرجوا من البيت
ورد : مع بعض ؟
هزت راسها رنا : ايوه بسيارة وحدة
ورد بتساؤل : غريبة
ريما بأبتسامة : بنات سمر بتقوم الحين تسوي لنا احلى شاي وانا جبت معاي اونو نلعب ؟
جلست ورد بأبتسامة : خاطري والله
قامت سمر تتوجه للمطبخ تسوي الشاي وماهي إلا دقايق ورجعت للبنات وشايلة الصينية بيّدها ، طلّعت ريما علبة الأونو من جانبها وسحبت منه كم ورقة توزعها للبنات وابتدوا يلعبون
ورد بصراخ : خلصت
رفعت راسها ريما لها : كذابه قومي من مكانك اشوف
قامت ورد من مكانها وهي تضحك وفعلًا ما كان في شيء تحتها وفازت ورد ، ولفت من شافت عهد اللي فازت بعدها وقاموا يرقصون سوا يقهرونهم
رمت سمر الأوراق اللي معاها بالأرض : مو حالة ذي كل مالعبنا فازت
ريما بتفكير : صح لازم نحرم ورد من الألعاب
رمت ورد الورقة اللي كانت معاها على ريما : الله يحرمنا من الأفكار هذي
•
عند رَعد اللي توجه للمكان يقابل صاحبه من تواعدوا من الصباح ، ابتسم من شافه يقوم من الكرسي وقرّب يسلم عليه
رَعد : الأخبار ؟
مشعل : كل شيء يسرّك
رَعد : الحمدلله ، جبت المعلومات ؟
هز راسه مشعل : ايوه
رَعد بأنتباه ينتظر مشعل يكمل : هذا الله يسلمك ياسر بن عبدالله ، وعبدالله نفسه اللي كان داخل بشراكة مع جدّك قبل عشرين سنة ويُقال انها كانت واجهة للشغل اللي كانوا يشتغلونه
رَعد بتساؤل : و وش شغلهم ! وين راحت الشركة ؟
مشعل : للأن محد كشف وش كان شغلهم عنه ، لكن الشركة قفلوها من خسروا
رَعد : غريبة !
مشعل : و بعد عبدالله هذا عليه ملاحظات لكن المباحث ماقدروا يمسكون عليه شيء
رَعد : وياسر ؟
هز راسه مشعل بالنفي : ياسر ماسك كل شركات ابوه وهو اللي يدير كل شيء الحين 
رَعد : طيب واذا جبت لكم معلومات تطيّحهم تقدرون عليهم ؟
رفع يده مشعل لكتف رَعد : ابد لا كان عندك معلومات بأدلة اعتبر موضوعك عندي
قام رَعد : يعطيك العافية ما قصرّت ، كمل يمشي لسيارته يحاول يفهم الموضوع وقرر انّه يحل الوضع بـ صمت عشان يقدر يجيب المعلومات الصحيحة ، واصرّ على فكرته اللي بباله