خرجت من الحمام تتوجه لتسريحتها وناظرت انعكاسها بأبتسامة وسحبت اللوشن تمسح جسمها فيه ، وكملت تحط الميكب وتتجهز لأجل تخرج لدوامها سحبت نظارتها من جانبها وخرجت وعقدت حواجبها من شافت امها وابوها ينتظرونها ،
ورد : فيكم شيء ؟
هز راسه أبو طلال بالنفي وتكلمت أم طلال : متى بنطلع نجهز ؟
رفعت حاجبها ورد : نجهز لأيش !
أم طلال : لزواجك ولا نسيتي ؟
تنهّدت ورد تحاول تكتم غيضها : كم مره اقولكم زواج ما فيه ! والله اموت والله
قام أبو طلال يتوجه لورد : ما تفهمين انتي ؟ قسمًا بالله ياورد ان مارحتي اليوم مع امك لي تفاهم ثاني معاك
بلعت ريقها ورد من عصبية ابوها وتجاهلته تتوجه للباب وتوقفت من سمعت صوت ابوها اللي رفعه : وتتجاهليني بعد ؟ اصغر عيالك انا ؟ ، لفت عليه ورد تمسك الباب : انت اللي جبرتني يا بابا ، كملت تمشي للخارج تركب سيارتها متوجهه لدوامها ، وقفت سيارتها تنزل واستغربت من شافت اتصال رَعد ورفعت الجوال لأذنها ، رَعد : تو بدأ صباحي
ابتسمت ورد وبصوت خافت : صباح الخير
رَعد : يا صباح النور ، وصلتي ؟
ورد : ايوه بدخل الحين
رَعد : خذيتي قهوتك ؟
ورد : وإذا ما خذيتها ؟
رَعد بأبتسامة : توصلك الأن
ابتسمت ورد : لا معاي ماتقصّر ، سكتت من دخلت المكتب وعقدت حواجبها من الشخص الجالس امامها بلعت ريقها : رَعد اكلمك بعدين ، نزلت جوالها تتجه لكرسيّها تنزل شنطتها بجانبها
عقد حواجبه ياسر : تتكلمين مع ولد عمك وكأنه زوجك ، تشوفينه شيء طبيعي ؟
رفعت حاجبها ورد : خلّصني وش تبي !
ياسر : رَعد هذا لا اشوف اسمه على لسانك
ورد بسخرية : اوامر ثانية ؟
ابتسم ياسر من شاف سخرية ورد : جهزتي للزواج ؟
عقدت حواجبها ورد من سمعت الطاري : ما تفهم انت ؟ كم مره اقولك ما ابيك ؟
ياسر : هذي المره الثالثة ، وبأبتسامة ، صدقيني ماراح تقدرين تقولينها مره رابعة
ورد : على اي اساس ؟
ياسر : على اساس انك الجمعة بتصيرين زوجتي
نزلت ورد يدينها على الطاولة : لا حول ، وااشرت للباب ، عندي اشغال ومن غير مطرود
قام ياسر يناظرها بأبتسامه : لا تنسين تروحين مع امك اليوم وخرج من مكتبها ، ورد : يارب ساعدني على المريض ذا
•
عند رَعد اللي توجه لبيت جده مصرّ على الشيء اللي بيسويه ، تقدم من شاف البيت فاضي وهو يعرف ان جده وجدته بهالوقت يكونون خارج البيت ، توجه لمكتب جدّه وقفل الباب خلفه وبدأ يفتح الأدراج بسرعة وتوتر ، عقّد حواجبه من شاف اسم الشركة واسم جدّه وعبدالله ، رفع جواله يصور الورقة وكمّل يفتح باقي الأدراج وتنهّد من كانت فاضية ولا فيها اي شيء ممكن يساعد غير الورقة اللي صورها ، رفع عيونه على الباب وبلع ريقه من سمع صوت جده متوجه للمكتب ، شدّ على يده من شاف مقبض الباب يتحرك وتنفس براحة من سمع صوت عمّه عبدالرحمن ينادي جده ، تقدم بخطوات سريعة للباب وفتح نصّه يشوف عمه وجده يتوجهون للمجلس خرج وقفل الباب خلفه وتوجه للمجلس خلفهم ، عقد حواجبه من سمع كلام عمّه
أبو طلال : ياسر اليوم جاني بأوراق وحطّها قدام عيني
عقد حواجبه أبو سليمان : اي اوراق ؟
تنهّد أبو طلال : ابوي والله انك طيّحتنا بمصيبة جديدة
أبو سليمان : كمّل اي اوراق !
أبو طلال : اوراق تثبت تورطّك بالشركة اللي خسرتوها
بلع ريقه أبو سليمان : كيف جابها !
أبو طلال وهو يمدّ الأوراق لأبوه : حطّها عندي و قال ان عنده نسخة ثانية لو فكرت احرقها
أبو سليمان بتفكير : لازم ورد تتزوجه وتدخل بيته تجيب النسخة الثانية نحرقها ونتخلص من ياسر وأبوه هالمصيبة
هز راسه أبو طلال يأييد كلام ابوه ، مسك رَعد راسه من سمع خطط عمّه وجده على ورد اللي جاهلة الموضوع كله ، ورجع للباب يتوجه لسيارته يرفع جواله يتصل على ورد ضرب يده على الدركسون امامه من شاف ورد ما تردّ
عند ورد اللي كانت تمشي بملل جانب امها : ما خلصنا ؟
أم طلال : تعالي ندخل المحل هذا عندهم قطع حلوة
وقفت ورد امام أمها : ماما ! شفيك متحمسة
أم طلال بأبتسامة : وردتي ماما بتتزوجين اكيد بكون متحمسة
تنهّدت ورد ولحقت امها اللي دخلت المحل وعقدت حواجبها من شافت امها ماسكة فستان أبيض دانتيل : شرايك ورد ؟
ورد : ماما ! سكتت من شافت جوالها يرنّ للمرة الثانية وخرجت تترك امها بالمحل ورفعت جوالها لأذنها ، رَعد بأستغراب : وينك ؟
ورد بملل : بالمول
رَعد : ليه !
بلعت ريقها ورد : ماما جبرتني اروح معاها اجهز
رَعد : تجهزين لأيش
ورد : للزواج
وقف رَعد السيارة بقوة من سمع كلام ورد متجاهل اصوات السيارات خلفه : اي زواج !
تنهّدت ورد : الزواج المزعوم
رَعد بعصبية يحاول يكتمها : ما تتزوجين وانا حيّ والله ما اخليك لـ هالمعتوه
توترت ورد من سمعت اصوات السيارات اللي عند رَعد : رَعد ارجع للبيت وهدّ ، اذا رجعت بكلمك
هز راسه رَعد وبتفكير : تمام
قفلت ورد ورفعت حاجبها من شافت امها طالعة من المحل وبيدها كيس ، أم طلال : شريته لك
ورد بعصبية : مو معناته اني جيت معاك يعني وافقت على الزواج ، ريّحوني من هالسالفة الله يريحكم
عقدت حواجبها أم طلال من عصبية ورد وتوجهت تمشي خلفها خارجين من المول
أنت تقرأ
أنت الذي حطيت بالجوف رمحين
Romanceأنت الذي حطّيت بالجوف رمحين رمح العيون ورمح وَردي شفاتــك أحب فيك الحب ياجامع إثنين الزين وطبوعٍ تكمل حلاتــك وأحب فيك العطف واللطف واللين وأحب فيك رضاك عقب زعلاتــك - انستا itsmarvel8_
