' أنت الذي حطيت بالجوف رمحين '

20

خذت قهوتها من المطبخ وخرجت بخطوات خفيفة تدعي ان محد يكشفها ، تقدمت للباب تفتحه ووقفت من سمعت صوت امها تنهّدت تلف لأمها اللي بدت تتكلم
أم طلال : على وين ؟
ورد : بروح لديم
أم طلال : تستهبلين ورد ؟ تشوفينه وقت مناسب تروحين لديم ؟ المفروض هي اللي تجيك
ورد : ماما لا تناقشيني بروح وارجع ماراح اتأخر
تقدمت أم طلال : ورد ماما ادري ان الموضوع صعب عليك ولسى ما تقبّلتيه
هزت راسها ورد بالنفي : خلاص ماما مابي اسمع ولا كلمة عن الموضوع
مسكت أم طلال كفّ ورد : بتجين بدري ؟
ورد : ما اوعدك
هزت راسها أم طلال وخرجت ورد تركب سيارتها وكل تفكيرها برَعد اللي حاله ما تحسّن من امس ، عقدت حواجبها من سمعت رنّة جوالها وسحبته امامها تشوف رقم غريب وتجاهلته تحطه صامت ووقفت بالباركينق تنزل من سيارتها وتاخذ قهوتها متجهه لرَعد ، مشت تدوّر على مكتب الدكتور لأجل يساعدها تدخل على رَعد ، فتحت الباب من سمعت الدكتور يسمح لها تدخل
ابتسم الدكتور يناظرها : جيتي عشان اساعدك تدخلين صح ؟
هزت راسها ورد ، وكمّل الدكتور : الموضوع صعب بس بحاول
ورد : ماتقصر
مشى الدكتور يخرج من غرفته ولحقته ورد وتوقفت من شافته يكلم الممرضة امامه ولفت الممرضه تنادي ورد وابتسمت من عرفت انه دبّر لها الموضوع ، تقدمت تمشي بجانب الممرضة وتشرب قهوتها
الممرضة بأبتسامة : زوجك ؟
بلعت ريقها ورد تهز راسها ، الممرضة : الدكتور يقول حالته صعبة لكن بيتخطّاها دامك كل يوم تجينه
ابتسمت لها ورد بهدوء ورمت قهوتها تدخل عند رَعد ، تقدمت تشوف حالته اللي ما تغيّر فيها اي شيء من اخر مره شافته
ورد : الى متى رَعد ؟ الى متى بتستمر حالتك هذي ؟ رَعد حاول تقوم اليوم آخر فرصة ، ما ابي اتزوجه رَعد انا ابيك انت مو هو
ناظرت ساعتها وتنهّدت من شافت الوقت : لازم اروح ، بس تأكد اني ماراح اخلّيك مهما كانت الظروف
سكتت للحظات وبلعت ريقها تكمّل : ماراح اتخلى عن حُبنا
خرجت من عند رَعد وهي تحاول تكتم عبرتها ، ركبت سيارتها وسندت راسها على الدركسون امامها ، هي قبل كان رَعد بجانبها يساعدها تتحمل سوء ايامها ، الحين رَعد مو قادر يسوي اي شيء ، رفعت راسها من شافت جوالها يرنّ للمرة الثانيه من نفس الرقم الغريب ، رفعت جوالها لأذنها وبعصبية : نعم ؟
ابتسم ياسر من سمع صوتها : مابغيتي تردّين ؟
سكتت ورد من عرفت انه ياسر
ياسر : مشغولة بالتجهيزات ؟
ورد بسخرية : جدًا
ياسر : شكله ما قالك ابوك
رفعت حاجبها ورد : ايش يقول لي ؟
ياسر : انك بتروحين معاي اليوم
ورد بأستغراب : وين اروح !
ياسر : بيتنا
بلعت ريقها ورد من سمعت كلمة ' بيتنا ' وتذكرت رَعد من قال لها ' الله يطوّل بعمري لين اسمع كلمة بيتنا منك ' ، تنهّدت ورد وقفلت الجوال بوجهه وشغّلت سيارتها ترجع لبيتهم ، عقدت حواجبها من شافت السيارات اللي امام بيتهم ونزلت تدخل ،
ورد : ماما ايش قاعدين يسوون ؟
أم طلال بأبتسامة وهي تناظر من الشباك : ياسر يقول تجهيزات الملكة
ورد بعصبية : انتم شفيكم ؟ ليه مو مستوعبين اني ما ابيه لهدرجة صعبة عليكم الكلمة ؟
لفت من سمعت صوت أبوها خلفها يناديها ، ومشت بعصبية تتجه للحديقة وغمّضت عيونها من شافت الورد والتجهيزات بالحديقة ، وقفت بجانب ابوها اللي بدا يتكلّم : ورد ادري اني جبرتك على شيء انتي ما تبينه ، واعرف انا قلبك ايش يبي ، لكن الدنيا ما تمشي على كيفنا
ورد : بابا كيف قلبك قدر يقسى عليّ كذا ؟
لف أبو طلال يمسك كفوف ورد : ورد ، ياسر مو هيّن وانتي اكيد انك عرفتي ايش قادر يسوي
ناظرت ورد ابوها تنتظره يكمّل ،
أبو طلال : من جيتي بيت جدّك وشافك ياسر انا عرفت انه بتصير مصيبة ، بس ماتوقعت يتجرأ ويجي يخطبك
تنهّد أبو طلال يكمّل : ورد الموضوع اكبر مني ومنك بكثير ، لا تحاولين تستفزين ياسر هالشهور لين يجي الوقت المُناسب واعلمك كل شيء
عقدت حواجبها ورد تسمع كلام ابوها اللي كلّه بالنسبه لها الغاز ، التفتت تناظر امها اللي تناديها تدخل سحبت كفوفها من ابوها ورجعت تمشي للداخل
أم طلال بأبتسامة : روحي لغرفتك عشان تتجهزين
مشت متوجهه لغرفتها ورفعت حاجبها من شافت الميكب ارتست واقفه تنتظرها : اهلين ياعروسة
جلست ورد بتعب على السرير وهي مو قادرة تتحمّل كل هذي الأحداث ، كل شيء كان اكبر من قدرة تحمّلها ، تقدمت الميكب ارتست تتكلم : ايش حابه ميكب ؟ في شيء معيّن ببالك ؟
هزّت راسها ورد بالنفي وهي تتذكر كلام ابوها وكيف يطلب منها تساير ياسر هالشهور ، ابتسمت الميكب ارتست : انا بسوي لك على ذوقي ، هو اساسًا انتي ما تحتاجين الا اشياء بسيطة عشان تبرز جمالك
هزت راسها ورد تحاول تسكّت الميكب ارتست اللي بدت تجهز اغراضها ،
دخلت أم طلال وعقدت حواجبها من ناظرت ورد : تستهبلين لابسة فستان اسود بيوم زواجك ؟
ورد بسخرية : تسمّينه يوم زواج ؟ قولي يوم وفاتي مثلًا
أم طلال : ورد لا تستهبلين فوق راسي ، بتطلعين للضيوف بشكلك هذا !
ورد : ومين قالك اني بطلع ؟
تنهدت أم طلال : بتتعبيني انتي بتتعبيني ، خرجت أم طلال تسكر الباب خلفها ومشت للحديقة تشرف على التجهيزات
مسكت ورد جوالها وغمضت عيونها بتعب من شافت الوقت ، دخلت رنا الغرفة وتقدمت لورد اللي كانت بعالم ثاني
لفت ورد تناظر رنا اللي جلست بجانبها
رنا : رحت لرَعد اليوم
هزت راسها ورد تنتظر رنا تكمّل ، رنا : حالته بدت تتحسن كثير والدكتور يقول ممكن يصحى خلال هذا الشهر
ابتسمت ورد من سمعت كلام رنا ، رنا : ورد لا تحسبيني مو منتبهه لـ وضعك انتي ورَعد ، اعرف ان بينكم شيء
ابتسمت ورد تتذكر كلام رَعد من قال لها ' احنا بيننا اشياء مو شيء ' كمّلت ترد على رنا : بيننا اشياء مو شيء
ابتسمت رنا تناظر ورد : ادري صعب الوضع عليك ولا قدرتي تتقبّلينه ، وادري رَعد من يصحى ويعرف انك تزوجتي بيقلب الدنيا كلها علينا ، ورد حاولي تسايرين الوضع لين يقوم رَعد ويحلّها ، رَعد مستحيل يخلّيك
هزت راسها ورد لرنا ، والتفتت للشباك تسمع صوت الأغاني وغمّضت عيونها بتعب ، قامت رنا تخرج من الغرفة : ورد خلّيك قوية مثل ما عهدناك ، خرجت وقفلت الباب خلفها ، قامت ورد للشباك تناظر الضيوف والأحتفال اللي ياسر سوّاه غصب