نزل من سيارته يتوّجه للبيت ، تقدم يفتح الباب وعقد حواجبه من حس بهدوء البيت الغريب والظلام اللي يملي البيت
تحرك بخطوات سريعة يمشي مع الدرج وبداخله خوف ان ورد فيها شيء ، فتح الباب يدخل ورفع حاجبه يشوف ورد جالسه امامه بالسرير وبجانبها شنطة السفر
ابتسم يناظرها : خلصتي ؟
هزت راسها ورد ، كمّل ياسر : بنمشي الفجر ان شاء الله
مشى يتجه للدولاب يبدّل ثوبه لتيشيرت اسود وشورت بنفس لون التيشيرت ، قفل باب الدولاب ولف يناظر ورد
عقد حواجبه يشوف هدوءها تقدم يوقف امامها : فيك شيء ؟
ميّلت شفايفها ورد تناظره وهزت راسها بالنفي
ياسر : ما انتي طبيعية اليوم شفيك !
قامت ورد توقف امامه وعقد حواجبه من شاف دموعها تنزل بصمت
ورد بنبرة هادية : طلّقني
جمد وجهه يسمع ورد : كيف !
تكتفت ورد تناظره : اللي سمعته
ياسر : ورد انتي حامل كيف تقولين طلقني !
ورد : سو اللي تبيه بس انا ما عاد لي قعدة بهالبيت
عقد حواجبه يتقدم لها ويمسك ذراعها : اللهم اجعله خير شفيك ورد ؟
رفعت عيونها ورد تحطّها بعين ياسر اللي امامها : يا تطلّقني يا ارجع بيت اهلي
ترك ياسر ذراعها يتراجع للخلف وبعصبية : ورد لا تستهبلين فوق راسي لا تستهبلين !
كمّل ياسر يشوف دموع ورد اللي تنزل بصمت وعيونها بعينه : كيف لك الجرأة تجين وتقولين طلقني كيف ؟ من يوم حملتي زانت اطباعك لكن اليوم شفيك انقلبتي ؟
رفعت اكتافها ورد تناظره بتحدّي : قلت لك اللي عندي ، لفت تاخذ شنطتها وتتجه لعبايتها تسحبها
تقدم ياسر يمنعها وبصراخ : ورد !
لفت ورد له ترمي الشنطة على الأرض بعصبية وجلست على الأرض تفتح شنطتها وترمي كل ملابسها بالأرض بعصبية ، عقد حواجبه ياسر يشوف انهيارها امامه
تقدم يجلس امامها : ورد تكفين فيك شيء ؟ لا تقولين طلقني وتسكتين كذا ورد كيف اطلقك انتي حامل بطفلنا ؟
بدت تبكي بشكل هستيري من سمعت كلمة ' طفلنا ' ناظرته تردّ عليه بصراخ : ما ابيك انا ما ابيك
ناظرت وجهه اللي حرفيًا مصدوم من كلام ورد امامه ، كمّلت تتكلم من بين دموعها : اكرهك انت جيت ودمرّت حياتي
نزلت راسها تبكي بشكل هستيري ويدينها على الأرض تقدّم ياسر يحضنها يهدّيها وكل ماشدّ ياسر عليها زاد بكاها
•
سحبت عبايتها تلبسها وخرجت من الغرفة ، ابتسمت من شافت فهد جالس على الكنبة امامها
رفع عيونه من حسّ بخروجها وابتسم يناظرها : خلصتي ؟
هزت راسها ريما : ايوه ، نمشي ؟
قام فهد من مكانه يتقدم لها ويمسك كفّها يشد عليه ، خرجوا من الفندق يركبون السيارة ، مدّ فهد يده للشاشة يشغل الأغنية ولف يناظر ريما بأبتسامة
عقدت حواجبها ريما من سمعت الأغنية اللي تعرفها زين ولفت تناظر فهد المبتسم
مدّ يده فهد لكفّ ريما يمسكها ويشد عليها : اكثر اغنية احبها ، واكيد تعرفين السبب
ابتسمت تناظره وكملت تدندن مع الأغنية و من وصلت البارت المفضل رفعت صوتها تغني ' أنتِ نفسك كنتي حلم في يوم حلمتُه ، فضلت أعافر في الحياة لغاية ما طُلته '
ابتسم يشوف حماس ريما على الأغنية ، وقف السيارة ولفت ريما تناظره : على وين ؟
ناظرها فهد بأبتسامة : ماراح اطول بجيك
هزت راسها ريما ونزلت نظرها لجوالها
قفّل فهد باب السيارة وماهي إلا دقايق ورجع للسيارة وبيده كوبين قهوة ، رفعت عيونها ريما من سمعت صوت الباب ينفتح وابتسمت تشوف فهد وبيده القهوة
جلس فهد بجانبها يحط الأكواب بمكانهم وابتسم يناظرها : اعرفك تحبين القهوة ، قلت لازم اذوّقك احلى قهوة عندي بالرياض
ابتسمت ريما تناظره : احبّ اللي يهتمون بالتفاصيل الدقيقة
ابتسم فهد : يعني تحبيني ؟
هزت راسها ريما تناظره بأبتسامة
رفع حاجبه فهد : قوليها لي ما ارضى ترا
تكلمت ريما تحاول تضيّع الموضوع : فهد ترا بنتأخر
هز راسه فهد بالنفي : ماراح اتحرك لين تقولينها
ريما بأستغباء : وش اقول ؟
رفع اكتافه فهد يناظرها : بكيفك
عقدت حواجبها من شافت فهد يمسك جواله : من جد ماراح تتحرك ؟
هز راسه فهد وعينه على جواله ، ناظرته ريما لِلحظات : فهد
رفع راسه فهد يناظرها : ياعيون فهد
ابتسمت ريما تناظره وبتوتر : أحبّك
ابتسم فهد من سمع الكلمه وتقدم يقبّل خدها : اي والله اني اموت واحيا بحبّك
نزلت راسها ريما بخجل من فهد ، وحرّك فهد يتجه للمطار
•
رفعت راسها خلود من شافت عهد لابسة عبايتها ورفعت حاجبها تناظرها : على وين ؟
عهد : ماما بالزواج نسيت سماعتي وقلت لرنا تاخذها بروح اجيبها منها
خلود : بتطولين عندها ؟
هزت راسها عهد بالنفي : لا اصلًا هي ببيت عمي محمد بروح اجيب السماعة واجي ماراح اطول
نزلت راسها خلود لجوالها وخرجت عهد للسواق اللي كان ينتظرها ، رفعت راسها من شافت بيت عمها امامها ونزلت تعقد حواجبها من شافت سيارة مو غريبة عليها امام البيت
تقدمت توقف امام الباب ترفع جوالها لأذنها تتصل على رنا ،
عهد : رنا انا برا تعالي
عند رنا اللي كانت بالمطبخ تسوي لها حلا وجوالها على الطاولة وفاتحة السبيكر : قاعدة اطبخ تعالي ادخلي انتي خذيه
هزت راسها عهد : تمام ، قفلت جوالها تدخل البيت ونزلت راسها تدخل جوالها بالشنطة وشهقت من صدمت بالشخص اللي امامها
رفعت راسها بعصبية : اعمى انت
ابتسم مشعل يناظرها : ما انتبهت ، انتي ليش معصبة ؟
عقدت حواجبها من شافت مشعل امامها : انت كل يوم بشوفك ناشب لي كذا ؟
ضحك مشعل : محور الكون انتي ؟
تكتفت عهد تناظره : يمكن
ابتسم مشعل وبسخرية : شكلك نسيتي ان رَعد ولد عمّك يصير صاحبي ، ماني مهووس اقعد الاحقك من مكان لمكان
رفعت حاجبها تناظر كلام مشعل : على حركاتك ذي بتصير مهووس والله
مشت من جانبه تتركه ما انتظرت تسمع ردّه ، مشى يضحك من تصرفات عهد الطفولية
دخلت عهد للبيت ومشت تتجه للمطبخ وشافت رنا معطيه ظهرها الباب ، تقدمت عهد : رنا مين ذا اللي كل شوي ناشب عندكم
لفت رنا تناظر عهد : تستهبلين عهد ما تعرفينه
عقدت حواجبها عهد وكمّلت رنا : هذا صاحب رَعد من ايام الكلّية والحين يقول عندهم قضية يشتغلون عليها سوا
هزت راسها عهد وتقدمت تاخذ سماعاتها وخرجت من البيت تركب السيارة
أنت تقرأ
' أنت الذي حطيت بالجوف رمحين '
Romanceأنت الذي حطّيت بالجوف رمحين رمح العيون ورمح وَردي شفاتــك أحب فيك الحب ياجامع إثنين الزين وطبوعٍ تكمل حلاتــك وأحب فيك العطف واللطف واللين وأحب فيك رضاك عقب زعلاتــك - انستا itsmarvel8_
