⛓️🏹الـــمـــنـــــتـــقــــم 🏹⛓️

____الجزء 2____

⛓️🏹الـــمـــنـــــتـــقــــم 🏹⛓️

           🚬أنا ابن الحرام، وفي روحي تشتعل شرارة الانتقام..💣
           🚬 فليس لي أمام الظالمين سوى تراتيل العدالة وصدى العدل يعمر سهول الظلام..💣

            ____الجزء 2____

علي رجع خطوة لور نافضها من رجلو حتى طاحت قدامو وضور راسو هارب من نضراتها لي كيحرقوه ، كيحرقو فقلب أب سهر وتعب على راحتها باش تجازيه بخيانة بحال هادي قهراتو ونزلات ليه راسو قدام كاع لخلق لي كايحشمو يهزو الرأس حداه ولا هو لي يستحي يهز راسو حداهم..
شاف فالمرا لي واقفة وراه وجها فالارض وواضح من حركة كتافها أنها كتبكي من قلة حيلتها فإنقاد فلدة كبدها..

       نتر من يديها الصاك لي جمعات ليها فيه البعض من ملابسها وقبل مايضور عند البنت شداتو من يديه كتبكي وتشهق بالجهد وجها كلو عامر دموع ألم حزن على الحالة لي وصلات ليها بنتها

    سعاد: هالعار الحاج دخل البنت راه ليل هدا ماعندها لمن غاتعطي الرأس وهي ماكتعرف تاحد هنا

ضرب ليها يديها حتى تزدحات مع الحيط منرفز بصوت بكاهم لي مخلط كيزيد يزير على قلبو والاعصاب بداو كيغليو فدمو، غوت فوجها حتى قفزات كشاكشو خارجين والغضب مغيم على عينيه عاميهم

      الحاج علي: لابقات فيك تبعيها انا ماكندخلش بنات الزنقة لداري

سعاد جمعات يديها عندها طالقة ليه الصاك وهو ضار لاحو على البنت حتى تشتت نصو فالارض ونطق بنبرة جافة

     الحاج علي: سيري عليا بحالك سيري عندو يتكفل بداك الحرام لي فكرشك سيري أنا سااخط علييك

ورا آخر كلمة صفع الباب بقوة فوجها رافض يزيد يضعف قدام بكائها لي ولا كيجيه كلو تمثيل بعد كاع شنو سمع وعرف كان مخبي ورا قناع برائتها

بينما هي نزلات راسها للارض كاتبكي بحرقة، وجرات صاكها كاتجمع فيه حوايجها لي تشتتو فالارض ووقفات بصعوبة مسندة على لحيط.. العيالات لي كانو ورا البياني حلوهم وخرجو لعندها وهي مامسوقاش ليهم باقي عينيها على باب الدار لي كبرات فيها وكانو فيها أسعد أيام حياتها كتسنى فيها تحل قدامها وترجع تحضنها كيف ولفات

الناس غير شافوها ساكتة وساهية ماكتجاوبش رجعو أدراجهم باش يحضيوها من بعيد وهي كتشوف فديك الباب كأنها أخر مرة غاتقدر تشوفها وإحساس غريب تمكن منها هالك كيانها الضعيف كنحس بنفسها ضاقت كل مارجعات خطوة لور مبعدة عليها وكأن حيوط ديك الدار هما أوكسيجينها ،عيونها شلال ماحبسوش من الدموع رغم أن ملامحها غالبة عليهم الدهشة من شنو راه صاري معاها مزال ماقادة تستوعب بلي بين الدقيقة والتانية ولات متشردة بدون عائلة وبدون حماية كتافها باردين ماتقدرش حتى دافع على راسها إذا تعرض ليها شي حد وهاد المرة ماغاتكونش ضحية بوحدها غانكون هي وولدها ضحايا مجتمع قاسي..