⛓️🏹الـــمـــنـــــتـــقــــم 🏹⛓️
🚬أنا ابن الحرام، وفي روحي تشتعل شرارة الانتقام..💣
🚬 فليس لي أمام الظالمين سوى تراتيل العدالة وصدى العدل يعمر سهول الظلام..💣
____الجزء 35____
بعد مدة قصيرة تنهدات جهينة ومسحات دموعها كتشوف فيه وقربات محيدة ليه يديه من على وجهو. ووقفات كتجرو منها
جهينة: صافي باركة نوض نمشيو
تنهد سيمو بالجهد و شاف فيها كيرمش بتقالة كلشي رجع عليه بالعيا..
سيمو(بنبرة هادئة): غا خليني هنا و رجعي نتي بحالك مزال تابهاك القراية
جهينة حركات راسها بالسلب بسرعة وزيرات على يديه كتشوف فيه عاقدة حواجبها بعناد..
جهينة: لا غانمشي معاك (بابتسامة حماسية) عند ماماك
تقاد فجلستو كيشوف فيها مطولا.. فلخر تنهد ووقف كايسوس فحوايجو و مد ليها يديه
سيمو: يالاه نيت نعرفها على مرات ولدها المستقبلية
شدات فيديه وقربات عندو هازة فيه راسها ورسمات على شفايفها ابتسامة زائفة محاولة تخفف عليه بيها
جهينة: ونعجبها زعما؟
نزل راسو عندها مبتاسم وحط يديه على خدودها كيمسح منهم دموعها بآسف.. عارف بلي امتصت غضبو ودابا كتمتص حزنو بالشوية بالشوية.. ةهة بدورو واجب عليه يخفف عليها ويراعي لسنها والفترة لي كدوز منها باش مايرهقهاش..
سيمو(تبسم ليها بثقة): ختارك سكامبا من بين لبنات واقفة معاه وماتعجبيهاش؟؟ تال هادي ومامتافقش معاك.. انا متأكد غادي تعجبيها وتفوتيها لهيه اجهنامتي
ضحكات بفرحة لي قدرات تلمح ابتسامتو وضورات يديها على خصرو خاشبة راسها فصدرو معنقاه ونطقات بصوت خافت مبحوح بالبكى
جهينة: ولكن تواعدني ماتبكيش لامشينا
سيمو(بهدوء): داكشي علاش ماكنتش كانمشي باش مانضعافش
جهينة(وهي كتشوف فيه مبتاسمة بدفئ): إذا كنتي غاترتاح غير بكي
باسها فراسها و ميل راسو كيطل عليها
سيمو(بابتسامة منكسرة): الراحة؟! ماكانعرفش شنو هادي اصلا
جهينة: خاصك تقلب عليها (بابتسامة خفيفة) وتقدر تلقاها فقبر ماماك
هز يديها نقربها لفمو باسها و شاف فلموطور لي جات بيه هاز ححبانو مخنزر ورجع شاف فيها بنفس التخنزيرة
سيمو: اش وصلك لموطور عاوتاني ؟
عضات على شفايفها حابسة الضحكة ورجعات خطوة لور ناوية تهرب منو..
جهينة: نسيت بالتلفة بان قدامي هزيتو وجيت
ضربها لجبهتها بصبعو بشوية باقي مخنزر فيها بحدة ماكيحملش يشوفها مقربة الخطر خاصة وانها وصلات ليه بسببو
سيمو: كاتقلبي عليا نخياب معاك يمكن .. ياك اجهينة
جهينة حركات راسها بالسلب بسرعة وقربات شدات فيديه كتشوف فيه مسبلة عينيها و كترمش ببرائة
جهينة: والله تاخفت عليك فاش قلتي ليا فين مشيتي ومابقيتش كاع كنفكر بعقلي
بلاما يحس تبسم دايب فبرائتها ورجع تحنحن فثانية متدارك الموقف
سيمو(بحدة): هدد ندوزها ليك دابا المرة الجايا ماغانهضرش!
جهينة: غادوزها ولا كتبتني باش ضربني من بعد؟
جرها من يديها غادي جيهة لموطور كيحرك راسو بلاحولة
جهينة: الموطور غانخليه هنا؟ لا نتابهات ماما بلي ماكاينش غاتجري عليا فخبارك
شاف فيه ورجع شاف قدامو و جبد تيليفونو كيكتب ميساج ويتنهد على شنة كتخرج ليه كل مرة مشكل فشكل خاصو يحلو ليها بتفكيرها الهارب
سيمو: هانا قلتها لدراري واحد فيهم غايدوز ياخدو و يحطو حدا باب داركم غير تهناي
تعلات باستو جنب شفايفو وبعدات بسرعة خاشية يديها فجياب قبيتها كتزرب جهة الموطور وعاضة على شفايفها حابسة صوت ضحكتها.. بينما هو ابتسامة خفيفة تشققات على شفتيه وزاد تابعها كيشوف فيها بعيون لامعة..
قرب و طلع فوق الموطور وجابها قدامو محاوطها بصدرو و ضخامة درعانو.. حط راسو على كتفها و مال بجسدو لقدام كيديماري
جهينة(بصوت هادئ وبدلع): تخليني نصوك احبيبي
سيمو: بلعقل؟
حركات راسها بالايجاب وهو بعد يدو مخلي ليهة فين تحط يديها جنب يديه على الكيدون وكسيرات بسرعة متوسطة متبعة الاتجاهات لي كيعطيها فاتجاه المقبرة
أنت تقرأ
⛓️🏹الـــمـــنـــــتـــقــــم 🏹⛓️
عشوائي⛓️🏹الـــمـــنـــــتـــقــــم 🏹⛓️ 🍂 بقلم 🍂 ❤️🩹shahd bs and riham dy ❤️🩹 🥂 الســـكـــامـــبــا🥂: 🌸أنا ابن الحرام، وفي روحي تشتعل شرارة الانتقام، فليس لي أمام الظالمين سوى تراتيل العدا...
