⛓️🏹الـــمـــنـــــتـــقــــم 🏹⛓️

____الجزء 51____

⛓️🏹الـــمـــنـــــتـــقــــم 🏹⛓️

           🚬أنا ابن الحرام، وفي روحي تشتعل شرارة الانتقام..💣
           🚬 فليس لي أمام الظالمين سوى تراتيل العدالة وصدى العدل يعمر سهول الظلام..💣

            ____الجزء 51____

الساعة 07:44 صباحا ..
الشمس ماشي مدة طويلة باش شرقات .. الشي لي مخلي أشعتها باردة و محطورة بين الغيام المنتشر فسماء داك اليوم .. الجو كان يعمه الضباب مخلط مع حبات الندى الدافئة .. ريحة التراب و الهوا المنعش ..

الحي هادئ على غير عادتو فلياليه و الازقة خالية شيئا ما مرعبة نفس رعب لياليها .. تكسر الهدوء بصوت باب منزل جهينة لي تحل و خطات جهينة أول خطوة ليها بعد ما يقارب اسبوع دوزاتو سادة على راسها فعرفتها ..
سبرديلة بيضة كيبان جزء صغير منها والباقي مغطي بالدجين الواسع لي لابسة ، لونو فاتح مقانة بالقبية الزيتية الغامقة لي مغطية بقبها راسها .. كيبانو خصلات قلال من لافخونش ديالها القصيرة من القدام ..
سدات الباب وضارت كتقاد فشكارتها على كتفها .. رجعات قادات القب فراسها وهزات عينيها فالدرب كتشوف بالضبط فالمكان لي ولفاتو يتسناها فيه .. عيونها السود الغارقين فدوامة الهالات بانت فيهم لمعة الحزن ورجعات قلباتهم كتأكد لأخر مرة من تواجدو أو تواجد طيفو .. ربما صوت موطورو من بعيد ! اي حاجة ممكن تطمئنها بمجيئو
ولكن .. ماكانش!
تنهدات بضيق وزادت مع الدرب كتركب الكيت فودنيها وكل ما فلت القب من راسها كاشف على ملامحها الذابلة كترجع تقادو على راسها ..

خطواتها كانو متسارعين بحكم المسافة لي بينها وبين الليسي لي بعيدة شيئا ما رغم انها خارجة بكري الا انها باغا توصلي دغيا و تلاقا بصحابتها ولي كيقراو معاها وتحاول تحيد السطريس لي مخلي الخوف يتراقص فأمعائها ..أطرافها كانو كيرعشو الشي لي خلاها تخبي يديها بجوج فالجيب القدامي ديال القبية .. كتمشى منزلة راسها محاولة تندامج مع الاغاني لي طالقة

خطوة مور خطوة بكثرة تحسسها كانت قادرة تسمع صوت خطواتها مخلط مع صوت الموسيقى .. صوت السوارت لي فجيبها كيتحركو مع الصرف لي هزات باش تفطر فاش تخرج .. صوت الريح الصباحي لي كيضرب فوجها ، كان منعش ولكن ماشي لدرجة يخليها تنساجم معاه ..

فجأة! كاع الاصوات حبسو .. مع دقات قلبها لي رقصو داخل قفصها الصدري .. معزوفة الخوف بين امعائها حبسات ورجعات عبارة على فراشات محلقة بفرحة .. حيدات الكيت بسرعة والتفت وراها فور ما لمحات موطورو تسمعات رنة ضحكتها اللطيفة لي مادامتش ثواني وتجمعات فاش لمحات جسد غير جسدو فوق موطورو .. حجبانها تعقدو كتحاول تميز الشخص لي فالموطور واش شي واحد من صحاب سيمو ..