⛓️🏹الـــمـــنـــــتـــقــــم 🏹⛓️

____الجزء 5____

⛓️🏹الـــمـــنـــــتـــقــــم 🏹⛓️

           🚬أنا ابن الحرام، وفي روحي تشتعل شرارة الانتقام..💣
           🚬 فليس لي أمام الظالمين سوى تراتيل العدالة وصدى العدل يعمر سهول الظلام..💣

            ____الجزء 5____

            🍂يـــوم الــولــادة🍂

       فليلة سوداء سمائها مغيمة وصوت الرعد كيتردد فيها فكل دقيقة موازي صرخات قوية صادرة من احد المنازل لي كيتواجد فقمة الجبل
مستلقية فوق سرير قاصح وكتغوت بأقصى جهدها حتى كيترسمو عروق منفوخين فعنقها وجبينها لي فازكين بقطرات عرقها يديها شادين فجناب السرير كدفع بكامل قواها حتى كيتضغط الدم فوجها لي زراق كتحس بالنفس كتقرب تخرج ليها وترجع تستاقر فيها كتنهج بقوة وعينيها ولاو منابع دالدموع لي ماحبسوش ليها شعرها الاسود كسواد لياليها منتور وراها كلو كيقطر بالعرق مرة مرة كتهز يديها وتنتف فراسها بقوة الحريق لي لولا رجوى كانت ممكن تطير شعرها كامل بحر الوجع

رجوى: صبري اعفاك زيدي غير شوية مابقا والو

عضات على شفايفها لي دازين بالدم بقوة ماضغطات عليهم وشافت فيها كتنهج
نورة(بصوت متقطع خافت): غانمــــــ وت ار..جوى روحي غاتزهـــ..ق

رجوى شدات فيديها كطبطب عليها وعينيها على القابلة لي كتحاول تعاونها
القابلة: زيدي زحميي ابنتي الراس بدا يبان

ضورات راسها جهة رجوى وعينيها بداو كيتقلبو ونطقات بصوت ضعيف ولكن كان واصل لرجوى لي بقات غير كتشوف فيها وكتبكي بصمت

نورة: إلا وقعات ليا شي حاجة ولدي أمانة عندك حتى يوصل عند واليديا (تبسمات بانكسار) أنا عارفة واخا ساخطين عليا غايبغيوه حيت هما حنان

رجوى حركات راسها بالايجاب كتبكي ونورة غمضات عينيها بقوة الألم لي هلكها واخا هكاك باقا كتقاوم وتزحم على قد جهدها وفداخلها كدعي ان واليديها يسمحو ليها ويرضاو عليها..
ثواني قليلة وصوت بكاء طفل صغير عوض غواتها و بكاءها وابتسامة صغيرة شتققات على تغرها كانت اشبه باشعة شمس شرقات وسط غيوم سوداء

القابلة لي كانت جالسة قدامها وقفات هازة طفل رضيع بين يديها لعامرين تجاعيد دليل على شحال دوزات فالدنيا و شحال من طفل تزاد على يديها ،كان مزال زرق و ملطخ ببعض الدماء مقيد بالمشيمة قرباتو ببطئ منها و حطاتو ليها على صدرها كاتبارك ليها بصوتها المرتجف

تنهدات تنهيدة خافتة و شافت فرضيعها لي حل عينيه على عالم جديد باش يعيش لي كتب ليه الله.. ابتسامة حب صادقة باستو فراسو بحدر و شافت فسقف المنزل ،دمعة متمردة نزلات جنب عيونها لي تغمضو إلى الابد فلحظة لي تزاد فيها شخص اخر للدنيا ترفعات روح عند خالقها روح شابة كانت ضحية زمنا المظلم.. ضحية اغتـ//صاب و ضحية واليدين تبراو منها بسبب خطأ ماعندهاش يد فيه..روح رجعات لخالقها و كوية الحرمان من والديها مزال مضيقة قلبها بدوم ماتحقق احلامها و لي هو تسامح معاهم و تعنقهم ولو لاخر مرة