⛓️🏹الـــمـــنـــــتـــقــــم 🏹⛓️
🚬أنا ابن الحرام، وفي روحي تشتعل شرارة الانتقام..💣
🚬 فليس لي أمام الظالمين سوى تراتيل العدالة وصدى العدل يعمر سهول الظلام..💣
____الجزء 42____
دوزو نهارهم هو غارق فخدمتو مرة ينزل عند الخدامة مرة يخرج يجاوب على مكالماتو و هي الداخل كتخدم وفينما كتحصل كتعيط عليه يجي يعاونها ... حتى طاح الظلام ووقفات كتكسل ماحساتش كاع بالوقت معاه ...
سيمو كان واقف حداها كيجمع ليها ادواتها فشكارتها حتى سمع صوت تليفونو و سد شكارتها هزها وزاد خارج كيجبد تليفونو من جيبو ... تلفت عندها شاد تيليفون لي باقي كيصوني فايديه ...
سيمو : تسالي سدي الباب بالساروت ونزلي تسنايني حدا الباب دالموطور
جهينة: ماتعطلش عليا راه مشا الحال
حرك راسو بهدوء و خرج كيشوف فداك الرقم لي كيصوني ليه عاقد حواجبو بعدم ارتياح لهاد المكالمة ... دخل لبيت فين كيحطو السلعة وسد عليه تما عاد جاوب ...
سيمو: ياك لاباس؟
_ ناس كيقولو السلام هو اللول اولد الحنش
عض سيمو على لسانو كيتنهد بضيق ... ونطق بفقدان صبر كاتم عصبيتو بزز
سيمو: سمع اسي نقولك انا مابيني وبينك والو عاونتيني وعاونتك باش تهنى من داك خونا ودابا قلب ستة تسعوود وخليني زوين! حسن ليا وليك (حس بيه غايقاطعو وعلا صوتو كارز على الهضرة) الخدمة معاك ماباغييهاش و ماغاديش نخدمها رزقي ماباغيهش حرام !!
_ ماتسرعش فقرارك اسي سكامبا حيت حتى باك كان هاكا و فلخر جابها فراسو! ودير فبالك بلي الراس الكبير ماكيخرجش خاسر من شي صفقة والا مشا خسر كيخسر معاه كلشي اولد الحنش
قطع عليه الخط ماحاملش يزيد يطول معاه فالهضرة وياله غايخرج وصلاتو رسالة فالواتس على شكل صورة ... دخلو الشك لراسو ودخل حلها بفضول حتى كتبان ليه صورتها واقفة جنب الموطور شادة تليفونها ومن موراها مباشرة واحد ملتم وجهو ولابس كلشي كحل ماكيبان منو والوو ... وفيديه شي حاجة كتلمع ماحتاجش سيمو كثر من ثانية باش يفهم البلان ورجع كيتاصل بالرقم كيعطيه طافي!
وجهو هرب منو اللون ... الد.م جمد فشراينيو ... و حتى هو بقا فبلاصتو كيرمش فصورتها فتيليفون بصدمة شلات حركتو لثواني!! حتى طاح ليه من يدو بالخلعة ... عاد جاتو لحظة استعاب انه خاصو يمشي يعتقها بلاصة مايبقا كيسمع لدقات قلبو لي شوية وغيوقف من الخوف عليها ...
شد على البواني دالباب و حلو بالجههد حتى قرب يقلعو وتخطاه مخلي صوت الباب بقا كيتردد صداه من زدحة لي دار ليه ... الصورة لي وصلاتو باقا فعقلو وكيطيحو عليه اسوء الاحتمالات فهاد الثواني القليلة لي كتفرقو عليها ... نزل مع الدروج كيجري ماكيشوفش قدامو بمرة بحال شي ضباب فعينيه كيخليه يشوفو غير وجها... قبضة يديه مزير عليهم حتى العروق زادو برزو فيهم كثر ... لون فوجهو بدا كيحمار وحتى عينيه ووذنيه لي شعلات فيهم العافية وهو كارز على سنانو بقوة وكيزفر بصعوبة ...
طريق فجاة حس بيها طويلة بزااف واخا هو كيمشي كي ريح ... وكيتحلف تحت سنانو مغدد ...
وصل لباب مصوب نظراتو ناحية الموطور لي كان فباصتو وهي لا اثر ليها لا هي لا الشخص لي كان فالصورة ... ضرب يدو بجهد مع لحيط وزاد كيقلب فالارجاء وكيعيط باسمها بصوت عالي .. عقلو مرفوع ماعارفش شنو خاصو بالخوف
أنت تقرأ
⛓️🏹الـــمـــنـــــتـــقــــم 🏹⛓️
Rastgele⛓️🏹الـــمـــنـــــتـــقــــم 🏹⛓️ 🍂 بقلم 🍂 ❤️🩹shahd bs and riham dy ❤️🩹 🥂 الســـكـــامـــبــا🥂: 🌸أنا ابن الحرام، وفي روحي تشتعل شرارة الانتقام، فليس لي أمام الظالمين سوى تراتيل العدا...
