⛓️🏹الـــمـــنـــــتـــقــــم 🏹⛓️

____الجزء 20____

⛓️🏹الـــمـــنـــــتـــقــــم 🏹⛓️

           🚬أنا ابن الحرام، وفي روحي تشتعل شرارة الانتقام..💣
           🚬 فليس لي أمام الظالمين سوى تراتيل العدالة وصدى العدل يعمر سهول الظلام..💣

            ____الجزء 20____

#فــلـاش بــاك🌿 قـبـل أربـع سـنـواتــ🍂

بعد المرات الزمن  كيخلينا نعيشو مواقف باش نحسو بشي واحد إذا شفناه كيتعرض لنفس الموقف ... ولكن مرات اخرى كنحسو بشي حد ولو مانكونوش محطوطين فنفس الموقف قبل .. يمكن نفرحو معاه ويمكن نحزنو معاه!!
بالنهاية الحياة عبارة عن مجموعة من المشاعر كتوزع على مختلف الظروف.. والانسان مجبور يحس ولو يكون حاط فقلبو حجرة حيت حتى الحجر كيجي وقت وكيتقصح ويتهرس...

نفس الشي كان كيطرا مع رجوى وسيمو وهوما كيتمشاو بين دروب الحي لي خرجات منو نورة قبل 18 لسنة مقهورة.. كان كيضور راسو مع كاع الأركان ويتفحصهم كأنو كيشوف طيف طفلة كتعلم تمشي ومرة كتعلم تشد توازنها على البيكالة، ومراهقة خارجة تقرا ، ومرة شابة كتقلب على مستقبلها لي فجأة اصطدم بوحش حرمها حنان ودفئ واليديها وخلاه يحس بنفس إحساسها..

بدون شعور منو قلبو تزيير .. وبان كاع شنو كيحس على وجهو .. لدرجة عينيه دمعو وزاد نزل على راسو الكاسكيط كيتنفس بالجهد ماحاسش براسو بمرة غايقدر على هاد الخطوة لي خدات من رجوى ايام طويلة باش تقنعو..  حس بيديها على دراعو ونزل عينيه عندها كيشوف فيها كتشير ليه ناحية الباب..
راسو استنتج بلي هداك الباب هو باب دار الناس لي ولدو ورباو ماماه باش فلخر يطردوها بلاما يعطيوها فرصة ! غمض عينيه مزير علييهم .. ماحاملش يتخيل فكرة أنه مو تطردات من ديك الدار... لي كاره ناسها قبل حتى مايشوفهم..

بلع الريق بصعوبة وهز راسو لسما كياخد طاقتو من لونها الاسود كسواد مشاعرو على كل من تسبب فضياعو هو والانسانة لي بغاتو وبغاها فثواني قلال تلاقاو فيها!!

رجوى تقدمات دقات فالباب مخلياه هو حتى يتهدن.. دقائق قليلة وتحل قدامهم الباب وبانت قدامهم مرا فأواخر ستينياتها.. خدا منها الزمن كثر ما عطاها.. ملامحها دابلين بالمرض والتعب النفسي إلا أن نور طيبوبتها وحنانها كان واضح من بشاشتها..

بمجرد ماشافت رجوى عينيها ضياقو وهزات النظاظر لي كانو معلقين فسنسلة رقيقة ذهبية وطايحين على صدرها.. دارتهم فعينيها وقربات منها كترمش فيها والابتسامة كتشق على شفايفها بشوية بشوية..

سعاد(نطقات برجفة فصوتها): بب..بنتي.. رجوى!

رجوى حركات راسها بآه وقبل ماتنطق جراتها سعاد معنقاها بقوة.. بجوجهم فديك اللحظة نزلو دموعهم على شكل دموع حزن وقهرة من شنو مر عليهم .. سعاد كتبكي كاتمة اسئلتها ورجوى كاتمة اجوبتها ..

فصلو العناق كيمسحو فدموعهم وسعاد بعدات خاوية لرجوى الطريق كتحاول تبسم ليها وتغطي حزنها لي كاشفاه نبرتها الباكية
سعاد: فين هاد الغبور ابنيتي؟ لا حس لا خبر

رجوى: الوقت اخالتي سعاد غير الوقت!!

وقف وراها سيمو وسعاد هزات راسها فيه عاقدة حواجبها بإستغراب ماكانتش رادة ليه البال بلي مع رجوى..
سعاد: خاصك شي حاجة اولدي ؟

شاف فيها بعدما كان منزل راسو وقوس حجبانو بازعاج من الكلمة باش ناداتو! حيت بالنسبة ليه تاحد ماكيستاحق يناديه بداك الاسم من غير المرا لي تعدبات على قبلو..