⛓️🏹الـــمـــنـــــتـــقــــم 🏹⛓️

____الجزء 54____

⛓️🏹الـــمـــنـــــتـــقــــم 🏹⛓️

           🚬أنا ابن الحرام، وفي روحي تشتعل شرارة الانتقام..💣
           🚬 فليس لي أمام الظالمين سوى تراتيل العدالة وصدى العدل يعمر سهول الظلام..💣

            ____الجزء 54____

بعد ثلاث ساعات .. مرو بسرعة البرق على جهينة لي ماهزاتش راسها من على ورقتها كانت حاطة قدامها هدف وكيما كانت كتدرب على السرعة فالامتحانات التجريبية لقات راسها كتخدم بنفس الطريقة محاولة ما امكن ماتوترش مع الاسئلة لي تلفات فيهم ..
بعدما رن تاجرس معلن على نهاية الامتحان قدمات ورقتها راضية عليها و راضية بالنتيجة كيفما كانت .. جمعات ادواتها وخرجات كتمشى فاتجاه باب الليسي بخطوات ثقيلة منهكة..

علات عينيها مع الناس لي مجوقين قدام الباب كتقلب على شي واحد من واليديها بعيون ملهفة ورجعات نزلاتهم بتنهيدة طويلة.. كيبانو ليها بزاف دالامهات والاباء جاو عند ولادهم وبناتهم خيفانين .. كتشوف فالدراري لي فالقنت طانزين على الوضع والبنات فجهة اخرى كيبكيو وكيواسيو فيهم قلبات عينيها لجنب كتقاد الشكارة فكتفها وشافت لجهة فين ركنات الموطور الصباح ..
وجها المنطفئ و كأنه انشرق بابتسامتها البريئة .. الراحة زحفات مع اطرافها تمشات عندو بخطوات سريييعة وبدون سابق انذار تلاحت فحضنو بحثا على الراحة لي فقداتها فهاد الثلاث ساعات لي نهكات كل طاقتها

سيمو بدورو بادلها العناق بيدو السليمة و باسها فراسها بحنان
سيمو: كي دوزات جهنامتي ؟ مزيان!

حركات راسها ببطئ شديد وغمضات عينيها كتزيد تزير عليه
جهينة: همم دابا داز وصافي بغيت نسااه عياني

نزل يديها لخصرها هزها و كلسها فوق الموطور بلا مايقصل العناق
سيمو: صافي نسايه دابا و رتاحي

هزات فيه راسها مبتاسمة وعينيها تغمضو تحتهم كيبان كلو هالات سوداء بسبب السهير لي كانت كتسهر رغم التوصيات المستمرة من واليديها ومنو هو كذلك

سيمو: نتحركو عاوتاني بالموطور ولا عيانة نشدو طاكسي ?

حركات راسها بالسلب بسرعة نافية الفكرة: لا لاا الموطور ماكيعينيش

ضحك و مد يديه خربق ليها شعرها فوق وجهها و ضار هز لكاسك مخليها كتقاد شعرها باش يركب ليها لكاسك
سيمو: فين باغا نمشيو؟

جهينة(هزات كتافها بلامبالاة): فينما بغيتي المهم بعد من هاد الباب جابت ليا الشؤم

ركب ليها الكاسك مخليها تقادو و طلع موراها معاونها بينما هي كسيرات تحت دهول صحابها وكاع لي كيعرفوها .. مامسوقة لحتى واحد همها الوحيد هو تعيش اللحظة ناسية المخلفات ..
مرات بأحد المطاعم خداو غداهم جامعين فطور وغدا واتجهات هاد المرة لأكثر مكان كيرتاحو فيه بعيد على المدينة وصخبها ..

دوزو تما ديك المدة مرة يهضرو مرة يراجع معاها ويفكرها فالقواعد لي غاتحتاج فامتحان اللغة الانجليزية حتى قرب الوقت ورجعو لليسي باش دوز امتحانها الثاني ..