ركام قلبي

الجزء الأول

#ركام_قلبي💗
الحلقة الأولى         ممنوع النقل بدون إذن❎❎
#بقلم الكاتبة Lina_sabrina  
     
والآن أطلب من الطالبة منار *** التقدم الى منصة التكريم بعد تفوقها بإمتياز في شهادة البكالوريا  _بعد ماسمعت إسمي وقفت ومشيت هادوك الخطوات للمنصة ومقابلني الوزير الاول بتصفيقات حارة من الناس الحاضرة فالقاعة كانو خطوات افتخار واعتزاز بنفسي الحمدلله تعبي ماراحش خسارة سهرت وتعبت وفالاخير نجحت وكنت من الأوائل .وصلت عند الوزير وكلشي فيا يترعد توتر ملكني هزيت يدي خمست عليه بوجه بشوش وقفت قدامو وعطاني تكريم  في يدي وقالي مبروك عليك بنتي رانا فخورين بيك انك شرفتي عايلتك وشرفتي الجزائر ونتمنالك المزيد من النجاحات _انشاءالله شكرا وربي يحفظك وقابلنا الكاميرا وخداتلنا صورة تذكارية راح تبقا في تاريخ مسيرتي الناجحة .كانو ناس قاعدين مقابليني يصفقو عليا وفرحانين من بينهم وزير التربية ووجوه من اطارات التربية و طلاب ووالديهم كان شعور هايل لا يوصف ويستحق كلام بزاف  .شفت في والديا الفرحة في عينيهم  حمدت ربي وشكرتو  على هادي النعمة .وفهمت بلي من ليوم هيا بداية لمسيرتي الصعبة ولحقيقية .
بعد الباك قريت 5 سنين  فالجامعة في ولاية خلاف بعيدة على دارنا واجهت شوي صعوبات من قرايتي وعايلتي بصح حمدلله كنت من لقراية للإقامة ماعنديش طريق ثالثة من غير المكتبة وزدت قريت لغات أجنبية أما طريق خلاف ماكانتش في بالي نهائيا ولامرة تعديت حدودو معا اي شخص كنت حاكما قدري لنفسي ومحافظة على روحي وقبل مانخاف من والديا نخاف من ربي والحمد لله  .بعد ماخلصت ماستر رجعت لولايتي ودرت سطاج ونجحت فيه  دخلت كملت دكتوراه فالجامعة وفي نفس الوقت نخدم فسبيطار وختارت تخصص علم البكتيريا والفيروسات يعني خدمتي فالمخبر هيا صح خدمة صعيبة وفيها تركيز وتعب ومثابرة بصح حبيتها ومتمنيا نوصل لبعيد  في هادا التخصص و المركز تاعي فسبيطار لاباس بيه متقدمة على الكل وهادا بفضل ربي سبحانو وبفضل اجتهادي وتعبي ليشهد عليه ليل و نهار وماش نشكر في روحي وإنما ثقة في نفسي.
نضت صباح  غسلت ودخلت للكوزينة صبحت على يما لقيتها حطا يدها على راسها وقاعدا فالكرسي .يما غير الخير مريضة _ايه ماش قادرا المصران دار فيا حالا _ماعليش درك نديرلك تيزانة تاع زعتر و تريحي بإدن الله _نضت طيبتها ومديتلها تشرب _يعطيك الصحة بنتي _بشفاء الله _زدت سخنت ليا لحليب وفطرت غير كملنا هزيت الكيسان غسلتهم  وبديت في شغل تاع دار شفت واش ندير لغدا ليوم كلشي يحصل فيا .يما واش ندير لغدا _ اقلي بطاطا وخلاص ماكالاه تطيبي وتحرقيلي لبصل . خسارة عليك يما ياك لازم نحرق باه نتعلم . كيتحرقي نتي غسلي القدرة ماش تخليهالي وتهربي _ خلاص بطلت درك نقلي بطاطا علاه ليا تكسار راس انا على قد مامجتهدة في قرايتي بصح طياب لاعلاقة بيه وماعنديش اصلا وقت باه نتعلم _قليت البطاطا ودرت شوي سلاطة ورحت لبست بزربة وهبطت شريت الخبز ورجعت حطينا تغدينا قاتلي خوك وصاني على المطلوع ديريه نتي  وانا نطيبهولك  .يما وانا وين نعرف _ علاه يديك مكسرين أتعلمي وديري كما موالفا تشوفيني _ايه ماعليش درك نخلطها تصفا .غير كملنا غسلت لماعن وهيا جبدت قصعة حطتلي سميد وكلشي وقاتلي درك ماعليك غير تصبي الماء بالشوي كما ندير انا وراحت وخلاتني حاصلا فلعجينة سمعت آسيا تعيطلي منااار _ راني هنا .دخلت قاتلي هااه راكي هنا واش من داب مات حتا راكي تعجني فالكسرة . لواحد زوجناه ومازال طامع في ختو تخدملو . يااا  راكي تمعني بلي ماش قايما براجلي . ماش معنيتلك قلتهالك مباشرة ماش قادرا عليه ماتقرايش _قربت ليا وحطت راسها على كتفي علابالي ختي منار تحس بيا كما نتي حلمك تتخرجي وتعودي خريجة دوكتوراه انا نفس شيئ  حابة نرجع طبيبة _دخلت علينا ماما شافت معانا قالتها شغل كيراكي تكملي في قرايتك راح يخليك تخدمي _علاه يايما وسيلة ياك خدمتي مع لولاد واش فيها وعارفا راح يقبل _تعبو في رواحكم برك بيك بيها نتي على الاقل تزوجتي وحكمتي راجل ودار ماش كما ليقدامك حاكما غير في قرايتها وخدمتها واصلا وجعني قلبي على هاد لعجينة ليفيدها شوفي كيفاه لصقتها كامل فالقصعة وتلعب بيها  كمليهالها نتي _شافت معايا آسيا وضحكت قاتلي عندها حق نحي لعجينة من يدك وغسلي يديك وزيديلي شوي فرينة لبزتيها بالدرت واش قاتلي لقينا بورطابل تاع يما يصوني هزت وقالت علاسلامة عليلو ومشات خرجت _شفنا مع بعض وضحكنا قاتلي يماك وباياك شحال عندهم زواج _قد عمر راجلك _والله مرات نغير منهم معاملتهم لبعض شغل عشاق جدد _ايه مدللين بعضهم بزاف وزيد بابا طول عمرو من جبل لجبل مانشوفوهش بزاف عليها حبهم بقا جديد لهادا الوقت _ايه ربي يدوم محبتهم ومحبتنا _انشاءالله _قاتلي حقا نتي ماش عندك ليوم كور فالجامعة _ايه كيشفت يما ماش قادرا مارحتش غدوا نقل من عند كنزة وخلاص _ايه بصح معجزة ماش موالفا تغيبي _ايه حبيت نحضر بصح الله غالب تحتمت مارحتش  _طلعت راسها ليا وتبسمت منار علابالي عقلك راهو هنا وقلبك راهو لهيه عندو _وسعت عينيا فيها آسيا بركاينا من هاد الهدرات شيئ ليفيبالك ماكانش منو _ضحكت وقاتلي اكدبي على الغاشي بصح عليا وعلا روحك ماتقدريش نتي اصلا غير تشوفيه تعودي تترعدي وحدك وخدودك يرجعو حومر _آسيا نديروها صح قلبي راهو معاه بصح هو موحال يشوف ليا يخلي رميسة زين ولاطاي ويقرب ليا موحال هادي _ايه الجنية هاديك دايما لاصقا فيه باطيكس  _مام هو ماش قليل عينو دايما يتبعو فيها اصلا سكتينا من الموضوع تاعو قوليلي مذكرة تاعك شكون راح يشرف عليها _هدرت لبارح مع الاستادة الفلانية قبلت  _تهنيتي مام انا لازم نشوف كاش استادة ولا استاد _شافت معايا وقاتلي كاين الاستاد فايز وراحت غسلت يديها _والله ياآسيا غير مرقتيها بسيرتو واش داني ليه انا اصلا كاين الف استاد قادرا نخدم معاه المدكرة _براحتك حبيبة ديري ليخرج عليك كنت غير نضحك معاك برك _هيا بقات تكمل فالمطلوع وغطاتو وانا حطيت طاجين فوق طابونة سمعنا تطبطيب شفت يما راحت فتحت جانا صوت جدي جاء _قاتلي كنت معولا نطيبهم بصح مادام جدك جاء هربا تسلك ماش قادرا نسمع نفس الموال منو .
            صفحتي الرسمية على فيسبوك بإسم (قصص لينا صبرينة Lina sabrina)