ركام قلبي

الجزء 147

الحلقة 147
بقلم لينا
فاهماتك بصح تبرير تاعك مايقنعش لدرجة انك تلعن نهار ليحبيتني فيه وتزوجتي نتا ليخليت حبنا وثقتنا يتزلزلو ويبقا فيهم غير الركام وخليت يوم عرسنا هو ندامة عمرك رجعتلي هاداك نهار بالنسبة ليك يوم تعيس قولي نتا شكون كانت راح تقبل تسمع هاداك لكلام وتقعد تم خلاص مابقات لا محبة ولا قدر كلشي تعكس _لقيتو راح قعد وبدا يمسح في وجهو وشعرو بيدو طلع راسو شاف معايا ووقف شوفي حكاية أنك خرجتي من دار بلا علمي ماش راح نغفرلك فيها بصح كلامي ليك هاديك ليلة عارف بلي كان قاسي وجرحك لهادا سامحيني فيه وخلينا نرجعو لدارنا ونخلقو جو جديد وننساو واش ليفات _انا ماش راح ننسى ماتعدبش روحك ومازلت مصرة على طلاق لأنو انا ونتا مشاعرنا رجعت من الماضي برك وباه نرجعو نحيوها مستحيل لانو قلوبنا تكسرت وادا تكسر الشئ مايرجعش كما كان _والحل _الحل هو طلاق _لقيتو بدا يعيط بأعلى صوتو نتي ماتفهميش ماش راح نطلقك  ياربي سيدي راح تجهليني _رفعت صوتي وقتلو ماتجهل ماوالو هادا القرار قراري ومافيهش رجوع ياولوكان تهبط سماء للأرض ماكانش ليبدلي رايي _صااار تبانيلي متأكدة اوك نتي جبتيها روحك وتحبي القوة نستعملها معاك _جبدت روحي بعيد عليه مالك ماتغلطش والله كون ترفد يدك عليا مانسامحك _اصلا ماكيش مسامحتيني نكمل عليك وخلاص بصح بطريقة ليتعجبني نتي شعلتي نار وأنا نبردها كما نبغي شفتو نحا لافاست ونحا سبتة تاع سروال حكمها في يدو وانا حكمتني الخلعة عاد كلشي فيا يترعد حطيت يديا على راسي وغطيت عينيا ونبكي مالك ربي يخليك ماتقربليش من غير ضرب لالا كون تقيسني عمري ولا نغفرلك في حياتي _شوي وحسيت بيه واقف قدامي هبطلي يديا وحكمني من مسلاني حشرني فيه  _أفتحي عينيك أفتحييييي _فتحت عينيا جاء وجهي مقابل كتفو بصح لقيتو ماش لابس تريكو شغل فهمت مقصودو بصح حبيت نتأكد _طلعت راسي ليه _واش قصدك نتا _تبسم وحط يدو على خدي ويمشي فيه في رقبتي وهمسلي في وذني حاب ندي حقي من مرتي ليعندي شهور وأما بعيد عليها_بعدت وجهي منو لاني قريب نضعف قدامو بصح بقا محشرني فيه بالقوة مالك ماعندك حتا حق عني وبعد عليا _ماش نسقسي فيك راني راح نفد كما يقولي راسي ندير _دفن راسو في رقبتي وزاد همسلي قوليلي علاه سمنتي بصح خرجت عليك عدتي حلوة تقتلي رجعتي فتنة عينيا ماش قادر نبعدهم منك ولا نقا م نفسي عليك_حسيتو راح فيها وماش مستوعب نفسو من مزاجو ليبدلو كل دقيقة بصح درك حاساتو دايب بقيت غير نبعد فيه من صدرو بالقوة ونكمش في روحي حتا طلقني وطبعني للحيط تخبطت حسيت بظهري تكسرت حطيت يدي في كرشي وخايفا ربي يستر برك _قرب ليا وخبط الحيط بيدو وطلعلي راسي ليه شفت ملامح وجهو تبدلت وقالي نتي ماتستاهليش الضرب وزيد أنا ماش راح ندي حقي بالقوة نديه برضايتك بصح لهاداك الوقت راح تبقاي هنا ووحدك نخليك ترجعي تخافيني من أول وجديد لتم نقدر كيفاه نتحكم فيك كما بكري _بعد مني وراح يلبس رحت ليه كيفاه من صحك راح تخليني هنا وحدي _ايه وإدا على باباك درك نعيطلو نقولو بنتك راهي معايا يعني مع راجلها وماعندو حتا حق يحاسبني _مالك ماديرهاش راك غير تتمسخر ياك ؟_كيطيح عليك الليل تعرفي بلي راني من صحي ومانكدبش _كمل لبس وانا بقيت نتفرج ومفجوعة منو شاف ليا وهز لافاست ومفاتحو ومشا للباب تاع برا كان راح يفتح فهمت بلي منو صح راح يخليني هنا _مالك تعيش ماتخلينيش وحدي راك تعرف نخاف وزيد نتا ماش خايف عليا وحدي في وسط غابة وحيوانات وناس غراب _ماش راح نشرحلك بصح نتي ليجبتيها روحك تفهمي غير بالتهديد _كمل فتح لباب وكان خارج حكمتو من دراعو وهبطو دموعي واستسلمت مالك إدا ماخفتش عليا خاف علىوليدك_عقد حواجبو ورجعت ملامح وجهو فيها كل علامات الإستفهام والإستغراب_دور ليا مليح وبقا يشوف فيا عاودي واش قلتي _هززت براسي ايه راني بالحمل وخبيت عليك _دور قفل الباب بالقوة وحط راسو عليه مدة من زمان ودور ليا حكمني من دراعي شحال عندك درك ؟__
راني دخلت فالرابع _وسع عينيه هادي المدة كامل مخبية عليا منار منك بصح _ايه كنت مجبورة _نحا يدو وبدا يعيط كيفاه مجبورة ونتي تعرفي بلي حلمي نعود أب ونسمع هاد لخبر كل مرة تخرجيلي بحاجة جديدة وهاد المرة حرمتيني من وليدي علاه سكتي ؟_حبيت نعرف مشاعرك الحقيقية ليا حبيت نتأكد منك ماكنتش حاباتك تسمع باه ماتجيش ترجعني على جالو _منك بصح خممتي هكدا علاه نتي نكارة عشرة علاه مشاعري وتضحياتي مايهموكش كيفاه خبر كما هادا مانسمعوش راح للحيط ويخبط بيدو ورجلو هبل_مالك حبس راح ضر روحك _دور ليا اسمعي ياك هادا ماش قالب باه تسلكي من يدي _لالا والله العظيم راني بالحمل وعليها راك تشوف فيا سمانت _دمعو عينيه وقالي كيفاه عطاك قلبك تخبي عليا _سامحني ماقصدتش نحرمك كنت راح نخبرك بصح مالقيتش فرصة _هزز براسو لالا ماش مالقيتيش فرصة راكي ديريلي في امتحانات تعجيزية راكي تجربي فيا بصح برافو عليك نجحتي نتي وانا بقيت الخاسر نقولو جربتيني فالاول كيهجرتك بصح عندي شحال وانا موراك كيلكلب المصعور علاه ماخبرتينيش علااااه مناااار _هبطت راسي ومالقيت مانقولو ورحت دخلت للبيت قعدت على الكانابي.