ركام قلبي

الجزء 89

الحلقة 89
بقلم_لينا
نضت ليها علاسلامتك عاش من شافك يسلمك تعيشي بقينا نحكو شوي وبدينا نخدمو وحسيتها حابا تهدر ومبعد تتراجع حتا لعشية قاتلي عندي هدرة معاك قبل ماتروحي _ايه هيا نخرجو للجاردا نقعدو ونهدرو _خرجنا بقات مدة ساكتا وتهزز في رجليها وتحرك في يديها _سندس ادا ماش حابا تهدري خلاص مانحتمش عليك _لا لازم نهدر باه تعرفي نتي ماعندك حتا دنب ومام عبد المالك ماعندوش دنب ليصرا كامل فيك علاجالي _كيفاه اشرحيلي وانا واش علاقتي بيك _ايه شوفي راح نبدالك تنهدت تنهيدة طويلة وقاتلي أنا ماشي طفلة _واش يعني _حكايتي عندها سنين من صراتلي كنت مع واحد نحبو ونموت عليه وسلمتلو نفسي دار عملتو فيا وتفارقنا يعني انا طفلة مكسرة ماش بنت _وسعت عينيا فيها ماكنتش نستنا حكايتها هكدا _علابالي تقولي هادي طفلة ماتحشمش بصح الله غالب شيطان لعبلي براسي ودرتها والله يلعن هاداك نهار وساعتو _شكون هادا ليدار فيك هكدا وتخلى عليك _قبل ماتعرفيه حابا نقولك بلي أنا والديا كانو متبريين مني سنين هادي وماش غير والديا حتا عمي وخالتي وعمتي وبنتها وخواتات مالك  كامل ماهدروش معايا مدة طويلة من غير مالك هو صح ضربني كسرني وصلني لسبيطار بصح ماتخلاش عليا وقف معايا وقفة أخ لأختو وأكتر بيه كنت نتفس ونعرف واش معناتها الحياة عطاني فرصة نصحح فيها غلطتي وقف معايا في أوقاتي صعيبة وين ناس كامل عادو يشوفي فيا طفلة رخسية ومانسواش هو كان معايا وماسمحش فيا كرالي دار وكان مايخطينيش يجيبلي كلشي مايخصني والو حتا في قرايتي هو ليشعني باه نكمل وفالاخير هو ليرجعني لدارنا وخلا والديا يسامحوني فهمتي درك علاه نقولو هو حياتي _هززت براسي ايه وانا مشوكية من كلامها كل هادا فات عليها وهيا ساكتا سندس بصح قوليلي ليدار فيك هكدا علاه ماتزوجش بيك _لأنو قالي ماش محتم عليا ندي وحدا رخيسة كما نتي كما سلمتيلي روحك قادرا تكوني مع غيري فهمتي درك الغلطة ماش تاعو أنا ليسلمتلو نفسي في لحضة ضعف مني _بصح هو شاف دم عذريتك وعرف بلي هو أول واحد قاسك _ايه شافو وعيشني فالحب والاحلام ومبعد دار عليا _هادا ليدار فيك هكدا ماش راجل  وكيفاه فاقو بيك _مور ماتخلى عليا جاني انهيار عصبي وعدت نهدر وحدي نهدر برك وسمعو كلشي يعني استعرفت وحدي ماحملتش الخدلان ليكنت فيه _حضنتها وقلتلها ياحبيبتي شحال تعدبتي اكيد كاين بنات بزاف كما نتي يغلطو بصح لازم تصححي غلطتك بأي طريقة وربي يغفلك فيها _انشاءالله راني ندعي ليل ونهار باه ربي يغفلي على هادي الغلطة _انشاءالله بقات تشوف معايا وقاتلي علابالك حكايتي ماش هكدا برك _وكيفاه واش صاير تاني _الانسان ليدار فيا هكدا تعرفيه _هنا قلبي تزير عليا شكون سندس ماتخلعينيش _أحمد اخ آسيا مرت خوك _حليت فمي ووقفت وفهمت هاداك نهار علاه كانت ردة فعل تاعها كان هكدا _علاه ماهدرتيش من الاول _كنت حابا ننسا هادي لحكاية بصح كيشفتو في وجهي ومقابلني هاداك نهار وحتا ماش عارفا واش يكون ليك بصح فهمت وكيهدرت مع  مالك قالي واش يقربلك مليح والمشكل ماش هكدا برك _واش تاني راح نطيح _باباك عندو دخل فالموضوع تاعي وانا حكاية باباك عرفتها غير هاداك نهار حكاهالي مالك _قعدت قدامها واش دخل بابا ثاني _هاداك الوقت كيعرفو بلي غلطت معاه مالك راح شكا بيه بصح باباك وقف مع أحمد وعاونو عليها مالك كان يحقد عليك فهمتي درك _هبطت راسي وحكمتو بيديا لزوج حسيتها صاعقة وطاحت على راسي رجع كلام مالك كامل يدور في راسي وفهمتو قاتلي منار انا والله مانكرهك ولو عرفت بلي عندك صلة بيه تبقاي عزيزة عندي ونحبك بصح خليها تبقا بيناتنا أحسن ماتخبريش ليفدار ولا ختو الغلطة انا غلطتها وانا نتحمل المسؤولية _لا انا حاجة كما هادي مانقدرش نسكت عليها بصح كيفاه قدرتي تحبي واحد كما هاداك علابالك بلي يشرب وساكارجي _هاداك الوقت مافقتلوش حتا لخر _قوليلي حتا نتي الحب وزينو ليعماو عينيك _نضت زربت للمخبر بدلت قشي وخرجت من سبيطار لازم نفهم ونهدر مع آسيا ادا كانت تعرف وغطات على خوها لقيت كلاكسو ورايا دورت لقيتو مالك منار اصبري وين رايحا اصبري نهدر معاك _حبست وستنيتو قارا وجاء وين وين جاريا هكدا وثلفونك علاه ماتهزيش عليا _علاه ماخبرتنيش من الاول _واش نخبرك نقولك ختي غلطت مع راجل _بصح راجل نعرفو وحتا ليستر عليه بابا _منار ماتجهلينيش قتلك ختي غلطت وكون ماجاتش غالطا موحال نخلي هاداك رخيس عايش يعني بإراضتها ماش راح نحط اللوم عليه ولا على باباك خلاص هاداك الموضوع سكرتو ونتي مادابيك ماتفتحيهش لأنو هادا شرف ختي ماكالاه تزيدي تفضحيها .