الحلقة103
بقلم_لينا
مالك كيفاه على الخدمة كاش جديد _لا مازال المهم الملف تاعك راهو فالادارة عند بابا ماطلع ماهبط راح يخليه عندو يامات على الاقل ينساو عليك شوي فالخدمة واش درتي و بابا راه يقدر يغطي عليك ماتخافيش أنتي درك ريحي روحك وطدي لعرسنا وماكالاه لجهاز ليبزاف دار ليراح نسكنو فيها راهي فيها كلش خصيتيها غير نتي برك _بصح كيفاه قبلت تعيش بعيد على والديك _علاجالك قتلك نحارب ونقبل بكلشي المهم تكوني معايا ووالديا راهم قدامي نقدر نشوفهم يوميا وفي أي وقت _ايه عندك حق هيا نروحو هاداك هو _ايه هيا نوصلك وغدوا نجي نهدر مع خوك على جال العقد علابالي باباك راح _ايه انشاءالله _حقا منار كما وصيتك من قبل ماتجيبيش سيرة سندس وأحمد فدار ولو لباباك ديري روحك شغل ماتعرفيش ماش حاب ختي تبقى فضيحة _اكيد كما وعدتها نوعدك حكايتها مايسمع بيها حتا واحد _يعطيك الصحة _ركبنا ديمارا وصلني دخلت لدار جات ورايا آسيا بقينا نحكو وجبدت ستيلو وورقة بدينا نكتوبو واش نحتاجو فلجهاز زادت جات يما عاونتنا حتا تفاهمنا واش نديرو عشا هاداك نهار باسكو بابا خلا المسؤولية كامل علينا وعلى خويا فليل تولهت لمنى صوتها ماكانش ليوم رحت عندها لقيتها متكسلة وتتفرج _وشبيكي منى ليوم ماخرجتيش _سطر برك قاتلني من تحت كون نصيب نبقى متكسلة برك بصح حتا جنابي وطابو من رقاد _ايه تحبي نجيبلك حاجة تاكليها _لا ماكلاه ماش قادرا _كما تحبي وادا احتاجتي حاجة عيطلي _ايه تعيشي ختي _خرجت من عندها شافتني آسيا قتلي وشبيها منى ليوم ماشفتهاش _مريضة قالت عندا سطر _درك نقول لاسحاق يديها غدوا لطبيب _ايه خير وخير حتا وجها صفر _ايه الكرش تاعها جاتها صعيبة ربي يقدرها ويقدرنا _انشاءالله يامرت خويا لحنينة ولو هيا ضرتك وقلبك حنين عليها _الله غالب القلب لحمة طرية _ايه هيا تصبحي بخير _رحت ديراكت رقدت وفاتو شهر وسمانة وأنا ومالك كنا سمنة على العسل من غير الحب بيناتنا مشاكل ماكانش خدمتي مازال مافيها حتا خبر كلما نسقسيه بقولي مازال حتا ينساوك شوي واسحاق كينسقسيه يقولي عندهم الحق اصبري وآسيا وخويا علاقتهم عادت مليحة خير من الأول بصح هاجرها لمنى وهيا غير ساكتا عليه حتا عادت تغيضنا وأحمد حكمو عليه سنين حبس لازم يتعاقب ويماها مازالت مريضة من لفراش ماتنوضش وبابا رجع من خدمتو وعلاقتو بيما مؤة مليحة مرة غير تشناف _ ووصل نهار نروح نعقد فيه نضت صباح لبست وستيكيت روحي مليح ورحت مع بابا وخويا وآسيا وصلنا للبلدية عند دخلة تلاقينا بيه كيشفتو فرحت باسكو عندنا بزاف ماتلاقيناش تحرمت منو كان معاه باباه وزوج رجال ماعرفتهمش وسندس قرب سلم عليهم وانا تبسم معايا وجات سندس بقات في جنبي دخلنا كيجات دالتنا رحنا للبيرو قعدنا سقسانا شوي أسئلة ومضينا فالورقة وفيها بلي موافقين على هادا زواج وموافقين نكملو حياتنا مع بعض وهنا عدت مرتو بالقانون وغير المحكمة ليتفريها بيناتنا _غير كملنا خرجنا من صالة تصورنا شوي بصح بقيت حاشما من بابا وخويا ماكنتش آلاز وهو ولا علابالو يقول لسندس زيدي برك بسيف حبس وخرجنا هدرو مع بعض شوي وتفرقنا رحنا لدار زغتو عليا وباركولي دارتلنا يما غدا تلمينا عليه تغدينا وكملنا تجهيزات العرس من كلشي وفاتو يامات فيهم غير الظغط باسكو مزروبين ووصل نهار يدو جهازي بعد مانضت صباح كملتو وحطيناه بجيه وبداو لافامي يوصلو جات جدة مع عمي ومرتو وعمتي وبناتهم زادو وصلو خوالي ونساهم ولادعم تعاونا في كلش باسكو آسيا ماتقدرش تخدم كلشي ومنى حاكما غير بلاصتها طبيبة قالتلها حملك مازال ضعيف وبالاك راح دير سيركلاج _مع لعشية جاو غير رجال داو جهازي وراحو حتا لغدوا نهار فيونصاي وحنتي درناه نهار واحد وماحبيناش نعرضو لأنو كان وقت كورونا جاتني حفافة تعرفني لدار مشطتلي شعري ودارتلي مكياج شعري هزتو وخلات شوي ليبوكل على برا ومن قدام تاني وحطتلي اكسسوار ومكياج غمقتو شوي باه يخرجلي مع الحنة وتصديرتي ولبستلي لاغوب قماشها ساتان فالغوز كلار على لاطاي فيها شقة مع برنوس تاعو طويل لاصق مع لكتاف برك وعلى صدرها محجرة وحتا برنوس الحاشية تاعو محجر كيشفت روحي فلمرايا تخلعت ماعرفتش روحي وزيد من قبل سبغت شعري ودرتلو بالياج دخلت مرت جدي بقات تايها فيا حتا قالتلها الحفافة الله يبارك ياخالتي سمي بإسم الله راهي عروسة والعين حق باه فطنت بروحها سمات حتا يما ولبنات كامل عجبتهم وبقاو يتصورو معايا .
أنت تقرأ
ركام قلبي
General Fictionمنار بطلة القصة تعيش حياة هادئة حتا تدخل للجامعة باه تكمل دراستها فالدكتوراه واختصاصها بيولوجيا كانت تقرا وتخدم في نفس الوقت فالمستشفى وفي عامها الأخير من دراسة توقع في حب أستادها وتوقع في مشاكل كبيرة من الجيهتين مصير دراستها ومصير حبها .وتبقى المشا...
