ركام قلبي

الجزء 53

#ركام_قلبي
الحلقة 53      #بقلم_لينا
كيقالت هكدا جات في بالي آسيا لبارح كيقاتلي دخلتي لداري وحياتي سوسة تما صح منى راهي مع خويا _ رحت قعدت على درجة تاع برا وقلتبها الله لاتربحها انشاءالله واش خداها حتا تهدر مع خويا _ مانعرف بصح راني متأكدة من واش قتلك _وليت زربت نوضت سندس قبل مانلومها ولا نضلمها لازم نسمعها قبل ماش حابا نتسرع درك نخرج ونتي بمعرفتك غطي على غيابي _ايه روحي برك من صباح وانت نغطي درك نكمل _طلعت جريا لفوق دخلت فتحت لخزانة جبدت قشي شميت ريحة خانزة بصح ماحطيتش بالي معاها كملت بدلت وهزيت صاكي وهبطت خرجت من سبيطار جبدت ثلفون عيطتلها هزت عليا منى متي وينك _راني فدار وين راح نكون لا خدمة لا زدمة ماش كما نتي دبرتيها بوسط _اوك درك نجيك _جتيا عندي لدار؟ ايه عندك _تيه ترواحي راني نستنا كوبيت وحكمت البيس ورحت مكدبا وقتاه نوصل غير وصلت هبطت لازم عليا نمشي شوي برجلي باه نوصل لدارهم عارفا بلي شيئ ليراني ندير فيه غالط ومن عاداتنا وتقاليدنا وبتحديد في ولايتنا لعروسة ماتدخلش لدار راجلها قبل زواج ولو كانت دار جدو بصح تحتمت عليا لازم نعرف الحقيقة من لكدب غير وصلت لقيت فايز خارج من دارهم كيشافني عقد حواجبو وطاء عندي نتي واش ديري هنا _حتاجت منى برك _علته ماعيطتيليش وقلتيلي _ماعليش كنت مزروبة برك ومادريتكش تكون هنا  _منار تعرفي بلي نتواحشك ودقيقة برك لينشوفك فيها ترجعلي روح وننسى تعبي تاع نهار _مالا المرة الطاية كل فرصة نقولك عليها _ايه مادام بديتي تخدمي لازم نعود نشوفك يوميا ياولوكان خمس دقايق نصبر روحي بيهم حتا نجيبك لداري وتنوريها بوجهك _انشاءالله مابقاش بزاف نصبرو _ايه ربي يعطيني صبر عليك هادا ماكان هيا ادخلي وانا راني هنا نسناك حتا تخرجي ونوصلك _ادا ماش قاعد ماعليش روح _لا قتلك نسناك _اوك و  دورت طبطبت لقيتها فتحتلي الباب بابتسامة عريضة وتسلم وتعاود ورحبت بيا ودخلتني هيا ارواحي من زهرك جدي وجدة راهم غي دار عمي يعني راني وحدي كون جاو هنا اكيد كون سمعتي منهم محاضرة بقيت نشوف غير معاها كيفاه تتعامل معايا في لحظة تراجعت وكدبت واش سمعتو عليها _منى ارواحي قعدي قدامي عندي هدرة معاك _قعدت هيه واش كاين _نتي وخويا واش بيناتكم ؟ شفت وجها تخطف _مابيناتنا والو منين جبتي هادي الهدرة _منى بركاي ماتلعبي بيا راني فقت بكلشي وحتا آسيا فاقت اهدري ماكالاه تكدبي _بقات تنكر وتنكر وانا فوق راسها غير نعيط ونستجوب ونضغط عليها لقيتها وقفت وقاتلي ايه انا وخوك نحبو بعض _حليت فمي راكي مستعوبة واش راكي تهدري تحبي راجل متزوج _ايه الله غالب حبيتو ومام هو بادلني وحبني ومادام عرفتي وكشفتنيني ماش راح نزيد نخبي هادي شهور وانا وهو بيناتنا علاقة وماش نادما _الله لاتربحك يامنى واش خداك لراجل متزوج وزيد خويا مالقيتي حتا واحد نتي من عقلك صح _سمعت صوت فايز ورانا قال واش كاين منار علاه صوتك عالي نسمع فيه من برا _ارواح تسمع اخر الاخبار _لالا منار اسكتي _ماش راح تسكتيني ظهرتي وحدا خداعة وسوسة كما قالت آسيا _قولولي واش كاين انطقو _بنت عمك لعزيزة دخلت لدار خويا وخربتها يعني مصاحبا إسحاق مصاحبة راجل متزوج _شفتو وسع عينيه فيها منى صح واش راهي تقول _هززت براسها _قرب ليها ويعطيها كف حتا طاحت .