ركام قلبي

الجزء 111

الحلقة111
بقلم_لينا
رحت حطيت راسي على صدرو ورقدت كول حتا لغدوا نضنا بكري هزينا قشنا وهبطنا رجعنا لمفتاح
ورحنا ديمارينا لولاية ثانية طول طريق ومرة يهدر معايا مرة بالو مشغول نحسو تايه وضايع في افكارو حتا وصلنا للولاية وديراكت لدار ليكراها طلعنا حطينا الفاليزة وريحنا شوي ومبعد رحنا تغدينا وحوسنا فيها لليل تعشينا وطلعنا لدار دوشنا وحكمنا بلايصنا  قرب ليا  ونفس شيئ يطول معايا حتا يشبع شهواتو باه يحبس غير يكمل يطلب مني سماح ويجيبلي الف عذر ونسامحو بقينا سمانة في هاديك الولاية درناها كامل لغدوا زدنا رحنا لولاية خلاف وهو قالي نبقاو عشرين يوم نجيبوها غير تحواس راسي راسك برك وانا عجبتني الفكرة هاديك ليلة حنا ساهرين فدار ليكريناها عيطولو فثلفون خرج يهدر فالبالكون سمعتو كيقال حتا لنص تاع شهر ونجو بصح راح نرجع لداري مانجوش لتم سكت شوي وزاد قال يما راكي عارفا مانقدرش نجيبها لتم من الاحسن نتوما تجو خير ومنا لهاداك الوقت نزيدو نهدرو مازال الوقت زاد هدر شوي وكوبا ورجع قعد قدامي وجبدني ليه وحاوطني بيدو مالك علاه قلت ليماك ماتقدرش تديني _واش كنتي تتسمعي في هدرتي _لالا بصح سمعتك ماراكش بعيد عليا _ايه حابا ديرلك صبوحي تاعك أنا قلتلها ماكالاه قاتلي لازم لافامي يشوفوك وديري صبحية تاعك _ايه عادة برك نمشيو عليها ولو روطار _ايه قاتلي نديروها في دار العايلة وانا ماقبلتش ديريها فدارك خير ويجو عندك _طلعت راسي ليه قولي نتا والديك ماش قابليني ؟_ولو ماش قابلينك مع الوقت يقبلوك _بعدت عليه وتقعدت تما صح ماش قابليني بصح علاه واش درتلهم _منار تعيشي ماتسقسيش هادو الأسئلة خليها لوقت خلاف ونحكيلك انا وباباك بصح ماش درك _لوقتاه نبقا هكدا نخمم وعايشا وماش فاهما هاد النقطة  _أنا ليعارف وقتاه نهار لينحكيلك وعارف بلي إدا وصل هاداك نهار نتي راح تبقاي معلقة بيا طول لعمر _واش من نهار تهدر عليه؟_مابقاش بزاف ولتم كينحكيلك مانندم انا لا نتي _علابالك حاسا روحي عايشا معاك فالمجهول _منار واش من مجهول تهدري عليه ياك رانا تزوجنا فلحلال ورانا في فواياج نضحكو ونفرحو ياك يسموه شهر العسل وانا صح درتو شهر غير باه نتقربو من بعض ونزيدو نعرفو بعض مليح وحبنا يزيد وننساو لهموم ولمشاكل تعيشي خلينا نعيشو الحاضر تاع درك وننساو واش راح يجينا فالمستقبل _هززت براسي ورجعت حطيت راسي على كتفو شفتو هز ثلفون شعلو وقالي شوفي هادو هوما يما وبابا شفت معاهم مليح بانولي كبار يماه موالفا نشوفها بصح كانت بالكمامة قالي هادي تصويرة كيراحو للحج وانا نعيطلهم الحاج والحاجة وقليل وين نقولهم يما وبابا _ومايزعفوش منك _لا نورمال والفو _مالك قولي علاه مدوك لعمك وخالتك يربوك _باسكو كانو خاوتي عايشين وزيد معاهم زوج بنات ويما ماجابتش ولاد عليها مدتني لهادي يما وبعدها ربي رزقها بسندس _ااا فهمت يعني من كنت صغير عايش معاهم _ايه اصلا بعد وفاة خاوتي هبطنا كامل لطاج لتحت وعشنا مع بعض وبقا طاج ليلفوق مغلوق _مالك خاوتك كيفاه ماتو ؟_بقا ساكت ومبعد قالي موتهم باشع من الأحسن ماذكرينيش في هاداك الوقت لقيتو ناض من قدامي وخرج من البالكون _غاضني بانت عليه بلي يتحسس بزاف من موت خاوتو بقا مدة فالبالكون يتكيف بعدها دخل قرب ليا عطاني ثلفون شفت معاه لقيت تصويرة فيها 3 تاع ليجان ليفنص عرفتو هو و هادوك زوج فهمت بلي خاوتو _قعد قدامي وقالي هادو هوما خاوتي في هاد لافوطو كنا فلفيرما _الله يبارك جيتو فوق راس بعضاكم _ايه ماش بيناتنا بزاف فلعمر بصح انا صغير فيهم _ماتو في عام واحد ؟_ايه اسوء عام فات علينا هاداك العام واحد فينا ماقدر ينسا واش صرا الحاجة تقريبا هبلت بقات مدة طويلة وهيا من لفراش ماتنوضش وانا كنت نشوف فيها قدامي تدوب مام الحاج نفس الشيئ انا عدت من دار مانخرجش خايف عليهم خايف نزيد نخسر واحد فيهم باسكو موت خاوتي دمرني ودمر العايلا كامل عليها هبطنا لتحت كامل وعشنا معاهم ومازادتش غفات عيني عليهم _مالك ادا حاب نروحو نعيشو معاهم ماعنديش مشكل راني قابلا ونقدر نتحملهم ادا ماش قابليني ومع الوقت يحبوني _شاف معايا وكانو دموع في عينيه وتبسم وقالي منار حبيبي انا درتلك دارك وحدك علابالي هكدا خير لينا وكما سبق وقتلك والديا راهم قدامي كما نحب نروح نشوفهم _ماعرفت مانقولك من جيهة راني شايفك متعلق بزاف بيهم وتحبهم ومن جيهة بعدت عليهم _ايه عندك حق متعلق بيهم كتر ماتتصوري وفي نفس الوقت قلبي وبالي راهم عندهم وخبارهم عندي ودرك ارواحي عندي خلينا نعيشو فرحتنا ومانفسدوهاش بالماضي  _نزلت ثلفون من يدي وقربت ليه وصح نسيت افكاري السلبية وأسئلتي ومستقبلي المجهول ودخلت معاه في عالم ثاني بعيد على الواقع المر .