الحلقة 105
#بقلم_لينا
بعد ماراحو بقات غير سندس حبت تحضر تصديرتي وفوطوغراف بقات تصور فيا دير هكدا زيدي هكدا حتا كملت من القطيفة رحت نحيتها منى مرة على مرة تجي تطل عليا حتا هيا عدلت روحها وقاعدا فلبلاصة قدام فاميلتها آسيا برك تتحرك شوي معايا حتا تجي يما تقعدها بسيف _بديت نتصدر لبسة وراء ختها لبست كاراكو تونسي وهراني شاوي قبايلي قفطان لونسومبل ماخليت والو كلشي لبستو نص منهم شريتو ونص كريتو وكل لبسة حطولي فيها غنية شطحت فيها وتصورت دارو لعشا سلاطة وكفتة وشربة وشخشوخة طاجين العين واكيد ديسار سهرة فاتت علكيف من تصديرة ولعشا وتصاور وغنا وشطيح وزغاريت عرس ولا أروع وربي يدوم الفرحة في هادي الدار _سندس راحت بعد لعشا وكيكملت السهرة ديراكت طيحت سبة رقدت حتا كيعيطلي هزيت عليه ليشفيت عليه بقا يتغزل شوي وكوبا الله غالب ماقدرتش نهدر من لعيا _لغدوا نضت بكري طلعت لدار آسيا دخلت لدوش دوشت مليح ونقيت روحي وكيكملت لبست وهبطت دخلت لبيتي لقيتهم عدلوها باسكو بنات خالي زوج رقدو معايا جابولي فطرت غير بسيف حتمت عيطلي قالي على 4 نجي ندي عروستي _انشاءالله _كيكوبا مور لغدا بدات الحفافة في وجهي تنيطوايي ومبعد المكياج ليوم دارتلي مكياج ضاوي مع لاغوب بلونش دارتو فالغوز كلار كيكملت جابتلي يما لاغوب لبستهالي الحفافة ويما فوق راسي توكلي فلحم وانا قريب نتقياه مع الخلعة حاكمتني والتوتر عدت نفيبري وحدي وزيد ماكملتش بكري _بسيف كملت روحي وزادت عدلتلي مليح خرجت لصالو دارتلي كامرا مان ليفوطو وحدي شوي ودخل بابا وخويا لعندي حضنوني لزوج فالأول ماقدرتش حتا نطلع وجهي ليهم بصح تحتمت نشوف معاهم لقيت في عينيهم دموع هنا ماحكمتش روحي وبكيت قالي بابا وراس بنتي ماتبكيش راكي عروسة أفرحي وحنا رانا قدامك في أي وقت تجينا _زاد نطق خويا قالي ايه ختي رانا غير هنا وتبقاي دايما لعزيزة تاعنا _انشاءالله _قابلني بابا وطلعلي وجهي ليه بنتي نتي راح تروحي لدار راجلك درك نقولك غير صوني شرفو واحترميه قادريه واسمعي كلامو هو راجل محترم وحتا فاميلتو ناس ملاح درك راح تعيشي وحدك معاه إيفتي عليك المشاكل ماش على مشكل صغير تنوضي حرب أعرفي تسيري حياتك بيدك وراكي كبيرة وقاريا وواعيا خلي دايما لغة الحوار قبل المشاكل وأي حاجة تسمعيها ماتعجبكش سقسيه ولا سقسيني قبل ردة الفعل ووالديه حطيهم في عينيك وخليهم يهدرو واش يحبو نتي اسكتي عليهم ماتجاوبيش لأنو لقلوب كنوز ولكنوز دايما مغلوقة بالمفتاح وشيئ ليداخلو ماش محتمة نعرفوه كامل فهمتي _ايه بابا فاهما عليك _باسلي راسي وقالي ربي يفرحك ويهنيك زاد خويا نفس الشيئ ومسحلي دموعي وتصورنا وخرجو دخلت يما عندها ماوصات ودمعتها ماحبستش حتا سمعنا لكلاكسون رحت لبيتي عدلتلي المكياج وانا مازلت نبكي ماقدرتش نحبس دموعي منى فوق راسي تركح فيا حتا حبست وعاودتلي شوي مكياج سمعت زغاريت فدار قاوي ولغنا دخلت سندس كيلعادا دايما باهتا فيا زدت شفت روحي مليح عجبتني روحي مام أنا لبست لاغوب بلونش طويلة وغونفيلي ويديها بدرعين بتيلو والاكسسوار وخليت شعري مطلوق بوكلي خفيف تحت مع لبلياج برك ولاماش على جنب مع تاج شوي وخرجو وأنا غير خوفي يزيد غمضت عينيا سمعتهم كيقالولو ادخل خرجها فتحت عينيا وقابلت الباب ودخل هو بالكوستيم لكحل وبابيونا وساعة وصباط وشعرو لرطب كلما يتحرك يتحرك معاه وعينيه من بعيد يبرقو قرب ليا باسلي راسي كل يوم نتي تقتليني الله يبارك _مام نتا الله يبارك جيت تهبل ومدوبني كما عادتك _واجدا نروحو باه ندوبك في حياتي_ايه واجدا وهيا على بركة الله _كروشيت فيه وفتح الباب بقاو يزغرتو ويصورو _رحنا عند جدة دعاتلنا دعوة الخير وبسنا راسها وكملنا حتا وصلنا للباب لبسولي لبرنوس وغطاوني مليح حضنت يما قبل مانخرج و دعاتلي بالخير ولهنا كيقريت لبابا حط يدو عند الباب وخرجت تحت جناحو دورت ليه بست راسو وقال لمالك هادي أمانة عند اتهلا فيها ووفي بوعدك ليا _ردلو مالك الماضي غلقناه ومنار ليوم هيا حاضري وراح نتهلى فيها كما عينيا _زاد قرب خويا ووصاه ومشينا ركبني فطونوبيل وسكر طلعت شوي برنوس على وجهي شفت معاهم كامل يشوفو ليا كاين ليراح يروح معايا وكاين ليبقا كما منى ماتقدرش دورت شفت طونوبيل مقابلني بعيدة شوي مانعرف علاه شبهتها لتاع فايز بصح بقيت موسوسة منها اصلا خبارو من هاداك نهار مازدتش عرفتهم حتا دخل مالك لطونيبل _طلع كارو وباسلي يدي _قالي ليوم حلال عليا نخطفك علابالي ناقصين البارود و الخيالا بصح الله غالب كورونا غلبتنا ومنعتنا _هادوك مايهموش المهم وعدك ليا أني نخرج عروسة من دار والديا والهمة والشان راك درتو والباقي غير شكليات مايهموش_نحبك منار _نموت عليك مالك.
أنت تقرأ
ركام قلبي
Narrativa generaleمنار بطلة القصة تعيش حياة هادئة حتا تدخل للجامعة باه تكمل دراستها فالدكتوراه واختصاصها بيولوجيا كانت تقرا وتخدم في نفس الوقت فالمستشفى وفي عامها الأخير من دراسة توقع في حب أستادها وتوقع في مشاكل كبيرة من الجيهتين مصير دراستها ومصير حبها .وتبقى المشا...
