ركام قلبي

الجزء 5

#ركام_قلبي💗
الحلقة 5        #بقلم_لينا
بعد هدرتو معايا هكدا ماقدرتش نكمل درس ونركز حتا كنزة فاقتلي .منار وشبيك تترعدي وجهك راهو موف _سخانة برك _ماتقوليش صراتلك هكدا كيقرب ليك وشرحلك _ايه بالاك _ضحكت وقاتلي العاشقة الولهانة _اششش اسكتي يسمعوك .دورت ليا روميسة وقالت سكتونا شوي خلونا نركزو ردتلها كنزة زعما ليوم ظهرتلك تركزي _شنفت عليها وجه شر بيك بلي كيفك _اسمعي احترمي روحك لانوض نعميك بالمجهر _شغل خايفا منك حطي نواظرك في عينيك باه تشوفي مليح مع من راكي تهددي _كنت راح نوض ليها نجرها من هاداك شعر بصح  قاطعنا الأستاد وسكتنا _ بسيف لاكمل درس تاعو ونطق قال رميسة ومنار ومنى ابقاو هنا نحتاجكم_قاتلي كنزة مادام يحتاجكم نسناكم برا _ايه نخلصو ونجيو . خرجو الطلاب كامل وبقينا غير في ثلاثا والاستاد قالنا رميسة ومنى عندكم مدكرة تاعكم عندنا شحال من بدينا فيها لازمكم تمدو كتر ماعندكم لانو مابقاش بزاف . ردتلو منى ايه راني زدت بعتلك لبارح باه تصححلي _ايه من بعد نشوفو ونتي منار راح نكون انا المشرف تاع المدكرة تاعك واكيد ادا تقبلي _هدرتو هادي زادت شوكاتني ودخلتني في حيط اكيد حابا نقبل يكون هو الاستاد المشرف للمذكرة تاعي وفي نفس الوقت خايفا غير نزيد نتعلق فيه ونعدب روحي ماعرفتش حتا نجاوبو .لقيت رميسة نطقت وهزت صبعها ليا قاتلو هادي راح تشرف عليها نتا _ردلها ايه واش خصها منار راهي من الاوائل فالجامعة واي استاد يتمنى يخدم معاها وزيد تقدرو نتوما تدو منها الخبرة وعارف بلي موجدا وحدها ولا واش قلتي منار _ايه استاد راني ديجا وجدت بصح كان خاصني الاستاد برك _مالا متفاهمين هاد ليام بعتيلي واش وجدتي ونقرا الموضوع ليختارتيه باه نصححلك وقولي لمنى تمدلك الامايل تاعي وبعتيلي ليه وبون كوراج ليكم كامل وخرج _بقيت حالا فمي حطني تحت الامر الواقع وتقدم بطلب تاعو وقبل وحدو في وحدو حتا رأيي ماسمعوش ورميسة قاتلي ياوحد الحشرة وين تروحي يبقاو جناحك يطيرو فوق راسي _قلتلها الحمدلله جناحي راهم يطيرو بسبة تعبي واجتهادي مادايرا حتا معرفة في حياتي ماشيا غير بقرايتي  والمعدلات تاعي العاليا وزيد نتي واش وجعك ياك كل واحد والمذكرة تاعو لهادا ألتاي بروحك وانا خليكي بعيدة عليا هنا وفسبيطار _وهزيت صاكي وخرجت قلقتني دايما جايبتها ورايا غيرتها مني فسبيطار واضحة اما هنا فالجامعة بانت كيتقربت مني فايز .ايه وهاداك حكايتو درك وحدها لبارح يحوس عليا وليوم قالي هاديك الهدرة ودرك اشرف على الميموار تاعي وقالي بعتيهالي اوووف تيهت وماعرفتش واش ندير مالقيت غير كنزة خبطتني على كتفي _منار وقتاه نتي تهدري وحدك وزيد فتي عليا وماهدرتيش معايا ولا عبرتيني _اسكتي برك راني في دوامة _غير لخير _ارواحي لهادو لكراسا ونحكيلك _رحنا قعدنا وحكيتلها وهيا ناضت تضحك قاتلي حمارة راهو بدا يتقرب منك مافهمتيش بالاك عدتي تعجبيه _كنزة  يخلي رومسية والف طفلة مورايا وغير زين ولاطاي ونعجبو انا خلينا واقعيين وماكلاه طمعيني في حاجة موحال تصرا _هنا هكاك نهدرو ومنى جات قاتلي علاه موحال تصرا كلشيئ ممكن في هاد الدنيا ونتي تاني الزين ولاطاي وناجحا في قرايتك ويتمناك الف واحد وهو منهم _نتي وقتاه وصلتي وسمعتينا ديجا _ايه ودنيا يسمعو من بعيد ونتي علاه قبيل ماجاوبتيهش وبقيتي فاتحا في فمك لاهي جاتك فرصة من دهب اتقربي ليه وخليه يعرف عقليتك اكيد ماراحش يزيد يشوف مع العقرب تاع رميسة _نطقت كنزة انا منك ندير واش قاتلك عليه منى _بركاو ماتخلطو فيا كتر ماراني مخلطا نتوما راكم تشوفو لقريب وماش شافين لبعيد علابالكم كون نزيد نتقرب ليه كتر راح نعدب روحي برك وانا راح نبقى في نظرو دايما طالبة متفوقة برك لا أكثر ولا أقل _قاتلي منى مالا خليني أنا نظمنلك بلي فايز حاب يكون معاك ويتقرب والمذكرة راهي غير سبب _شفت مع كنزة لقيتها عاقدا حواجبها من هدرتها . منى على واش تلمحي تعرفي كاش حاجا ولا قالك _هززت براسها لالا مانعرف ماندري بحتا حاجة نتي برك مكبرتيها وهيا حاجة تافهة امشيو خلونا نروحو لسبيطار راح لحال علينا توخرنا _نضنا وقفنا ومشينا بصح كلام منى وسوسني شغل حابا تلمح وقاصدا حاجا وماش حابا تفهمني بصح ماتعيا وتبان .