#ركام_قلبي
الحلقة 75. #بقلم_لينا
لغدوا لعشية لبس إسحاق كوستيم و مشا الكورتاج باه يجيبو منى وحنا وجدنا حاجة خفيفة شوي ولقيت آسيا هبطت غير شفناها تخلعنا هبطت بكل أناقتها شعرها طويل ودايرا بالياج جاها تحفة ومكياج راسماتو كما لعروسة ولابسا غوب طويلة فالغوج انا طفلة وتيهت فيها وعجبتني كيفاه كون يشوفها خويا راح يهبل اكيد خرجت قنبلة بصح كانت برك راسما إبتسامة مصطنعة وقلبا لداخل راهو يحرق وفيه ألف كية وحسرة رحت مام أنا لبست وتحفت روحي عارفا بلي العقرب هاديك تجي وتسمملي نهاري وتشمت فيا .شوي سمعنا لكلاكسون برا يعني وصلو خرجت يما مع خوالتي وعمتي راحت آسيا عندها قالتها هاتي سينية تاع لحليب وتمر أنا نستقبلهم تخلعنا فيها ومدتهتلها رحنا فتحنا الباب شفت منى مكروشيا في إسحاق و لابسا لاغوب بلونش وإسحاق مركز عينيه في آسيا باسنا تخلع في تصرفها وفي زينها شربتلهم لحليب وكلاو تمر ودخلو وللأسف شفت وراهم فايز ورومسية وهوما حاكمين يدين بعض ويضحكو مع بعض هنا آسيا زغرتت عليهم في هادي اللحظة تمنيت كون هادا شيئ كامل ماصرا فيا ولا فيها هيا راهي تحارب في قلبها وانا نفس شيئ بصح لألم ليراني نحس بيه انا مايتقارنش بشعرة بشي ليراهي عايشاتو آسيا درك .شعور لا يوصف دخلو وحطلها لاليونس وتصورو وخرج بقيت نشوف مع منى كيفاه فرحانة وزاهيا بصح كيتشوف مع آسيا تغبرلها الضحكة حبيت نقرب نباركلها بصح ماعطانيش قلبي نديرها روميسة شفتها لابسا غوب فالأبيض وكل دقيقة تزغرت جات ليا قاتلي لبارح دخلت لدارو ولحياتو ولقلبو أما نتي بقيتي نزوة فاتت على فايز ونساك _ربي يهنيكم مع بعض وخلي كرامة نفسك وماتزيديش تجبدي سيرة راجلك قدامي خليتها ورحت عند آسيا نتي منك صح عاجبك الحال علاه دايرا لعمرك هكدا وتضحكي وتزغرتي روحو ديريلو الخلع وتهناي منو انا في بلاصتك دقيقة مانزيديها معاه راهو خويا ونهدر فيها _بعقلك علاه شاعلا فيك نار ياك راجلي ليتزوج وانا قابلا ماش نتي _نتي شكون ليحاكم يدك حتا راكي قابلا هادا الذل _لقيت وجها تبدل قاتلي منار ماتزيديش تذخلي روحك فيا وفي اسحاق خلينيا نعيشو كما كتبلنا ربي هيا راحت طلعت وانا بقيت تم حتا جاء اسحاق قالنا استرو رواحكم راح يدخل خوها وعمها وجدها رحت لبست عليا ودخل فايز معاهم هدرو مع منى ودارو باه يخرجو جات عيني فيه بصح هبطت راسي كمل مشا وراحت وراه رومسية كروشات فيه وخرجو وزاد اسحاق هز منى وراحو فواياج وحتا دار عمي وعمتي وخوالي راحو وتفرقت دار وبقينا غير انا ويما وبابا وآسيا في دارها لفوق فليل جيت نرقد قلت نطلع نتفقدها طبطبت فتحتلي عينيها دم حومر باينا كانت تبكي بقيت نحكي معاها شوي وهيا بسيف تخرج الكلمة تقول ماش هيا ليكانت لتحت ليوم قاتلي قبل مايروح طلع عندي وعدني بلي موحال راح ينقص حبو ليا نهار وراح نبقى عزيزة عليه طول لعمر بصح يامنار خايفا تديه علسا صح _مادام خايفا علاه قبلتي من الاول _قبلت باسكو حرام عليا نحرمو من لولاد _مالقيت مانقولك بقيت معاها شوي وخليتها وهبطت وبقا بالي معاها علابالي ليلة تاع ليوم عليها كحلة بصح مادام من الاول قابلا راح ترضى بواش مكتبلها ربي وخلاص _يعد سمانة رجعو قعدهم بابا قدامو وقالهم مادام عدتو ضراير كل واحد يحكم قدرو لنفسو وصوتكم العالي جامي نسمعو في حضوري ولا غيابي تعيشو هانيين وهو راح يعدل بيناتكم وكل وحدا تدي حقها ماديا ومعنويا وادا كاش وحدا خصتها حاجة ولا صرا مشكل تجو عندي أنا نتصرف متفاهمين _هززو براسهم وتفرقو شوي وانا فاكوزينة دخلت عندي منى قاتلي لهادي درجة كرهتيني حتا ماقدرتيش تباركيلي _منى ماقدرتش وماتسنايش مني نرجع معاك عادي وكما كنت _ماعليش راني هنا وراح تتقبليني مع ليام شفت معاها وخرجت من كوزينة سمعت بابا يهدر فلجنينة جيت راح نخرج عندو لقيت آسيا معاه سمعتها قاتلو فكني خليني نروح والله ماقدرت هو قالها بنتي بلاصتك هنا مع راجلك والله زواجو لمصلحتو ومصلحتك انتي ماقدرتيش تجيبولو لولاد خليه يفرج وادا كتب ربي ومنى جابتلو لولاد تعتبريهم كما ولادك _واش يضمن بلي منى تخليني نقدم لولادها واكيد راح تضلمني وتشمت فيا وتبعدني على إسحاق _مادامني عايش وفيا نفس نضمنلك بلي موحال يصرا واش راكي تخمي فيه ماش راح نخلي واحد يضرك اتقبلي مكتوبك وتقربي لراجلك كتر ماتبعديهش عليك وأبقاي في دارك كما متفاهمين .
أنت تقرأ
ركام قلبي
General Fictionمنار بطلة القصة تعيش حياة هادئة حتا تدخل للجامعة باه تكمل دراستها فالدكتوراه واختصاصها بيولوجيا كانت تقرا وتخدم في نفس الوقت فالمستشفى وفي عامها الأخير من دراسة توقع في حب أستادها وتوقع في مشاكل كبيرة من الجيهتين مصير دراستها ومصير حبها .وتبقى المشا...
