الحلقة 130
#بقلم_لينا
_هنا زادو ناضو يتعايطو كامل هدى وندى عادو يجبدو في شعورهم لعجوز كيف قاعدا فالارض وتخبط في رجليها راحت ختي مااااتت و الحاج وباباه ماقدروش حتا يوقفو سندس ورانيا كيفكيف يبكيو هاداك الهول معمر بناس من كان فرح وعرس رجع موت وكلشي تعكس أما حالة مالك ماخلاهمش يدوها بقا فوق راسها يبكي دموعو ماقدرش يسيطر عليهم يقول يمااا راكي موتي بلا ماترضي عليا ياااما نوضي سامحيني ورضاي عليا ياما حياتي بلا بيك ماتسواش ماتخليش وليدك وبناتك وحدهم حالتو شقتلي قلبي خلاتني نفشل بسيف خلاهم يهزوها وداوها وهوما وراها يتباكاو حاسا بنفس راح يتقطع من كترة لبكا بعد ماداوها مالك عاد يخبط في روحو وفالحيط ياناس يما راحت بلا ماترضى عليا ماتت وهيا غضبانة كيفاه نقدر نكمل حياتي بلا بيها وزيد وهيا اخر كلمة قاتهالي ماش مسامحاتك يااربي العالي قدرني بقاو يهدنو فيه بسيف تهدن شوي وقعد شربولو الماء حط راسو على الفوتاي وطلع راسو وغمض عينيه قدمت ليه حطيت يدي على كتفو مالك _طلع راسو شاف معايا نظرة حطام وانكسار رجعت نظرة تاعو ليفيها حقد وشر زدت شفت معاهم كامل لقيتهم حاكمين عليا نظرة ماش مليحة قتلو البركة في راسك _منااار رااحت لميمة ودات معاها حياتي وجرحي عمرو ماراح يداوا حياتي راح تبقى ظلمة من ليوم _كيقال هكدا فهمتو مجروح بزاااف لقيتو ناض خرج. وبقى هادا نهار راسخ في راسي ويتبعني طول حياتي لأنو بالنسبة ليا وليهم صدمة حقيقية ماكناش متوقعينها وحتا نظرتو ليا خوفتني وحاسا راح تكون هيا سبب في ركام قلبي الأخير.
وفراق الام يبقى الألم الأصعب على كل واحد .
إن لله وان اليه راجعون
#يتبع في الحلقات القادمة
أنت تقرأ
ركام قلبي
General Fictionمنار بطلة القصة تعيش حياة هادئة حتا تدخل للجامعة باه تكمل دراستها فالدكتوراه واختصاصها بيولوجيا كانت تقرا وتخدم في نفس الوقت فالمستشفى وفي عامها الأخير من دراسة توقع في حب أستادها وتوقع في مشاكل كبيرة من الجيهتين مصير دراستها ومصير حبها .وتبقى المشا...
