ركام قلبي

الجزء 73

#ركام_قلبي
الحلقة 73.     #بقلم_لينا
فليل كيجيت نرقد سمعت صوت اسحاق عالي باين هو وآسيا تلاصقو في بعض بصح شوي وسكت واحد فينا مادخل --لغدوا لبسنا ورحنا لدار جدي ربي يرحمو دخلنا سلمنا عليهم وعزيتهم وقعدنا وهاجيرة عينيها يزيغو لجيهة بابا وهو شفتو يشوف غير لجيهة خوالي اما هيا كانت قاعد فالجهة ثانيا _نطقت يما قالتلهم نتوما تخلو درك هاجيرة معلقة بابا راهو مات ماش راح يرجع ديرولها العرس وخلوها تتهنى في زواجها علاه معلقين فيها _ردتلها مرت جدي  ايه كنا نخمو وهدرنا فيها البارح برك  بالاك منا على شهرين ونديرولها عرس خفيف _نطقت هيا حابيت تزوجوني وبابا ماعندوش بزاف من مات _قالها خالي عندو شهور من مات لوقتاه نخلو راجل يستنى بزااف _نسفت وخرجت وهوما بقاو يحكيو شوي وخرجت لقيتها قاعدا فالحوش وتبكي _قربت ليها كيشافتني مسحت دموعها _علاواه راكي تبكي على جدي ولا على ...._اسكتي منار ماتجبديش إسمو _نتي منك بصح كنت طامعا في بابا _هو ليخلاني نطمع _ياااو حرام كبري عقلك _ماش حرام هو وعدني يدخلني لدارو و يطلق يماك _يااخااا علابالك ماش راح نلومك الله غالب عليك ماقريتيش بصح يما كون تسمعك ديرك شطيطة وتتعشا بيك _بصح باباك كان يقولي نحبك نتي خير من يماك_ايااا اسكتي علينا درك ولا أنا لينرخس بيك كترتي على ماوصاوك روحي أتزوجي وأنستري ونحي عليك هادا تخمام وادا هادا الإسان ماش حاباتو خليه ماتضلميهش معاك واستناي مكتوب خلاف بصح بابا موحال يطلق يما حطيها في راسك هادي خليتها ورجعت عندهم نشوف غير مع بابا ونخمم كون ماش مطمعها غي حاجة موحال هيا تتجرأ وتتبلاه طلع راسو لقاني نشوف معاه بصح ماقال والو باينا فهمها طايرا _بقينا تم حتا لعشية وخرجنا من عندهم قلتلهم وصلوني لدار كنزة نعزيهم _قبلو بابا رجع لدار وانا يما وآسيا واسحاق رحنا عندهم دخلنا لدارهم عزيناهم لقيت يماها جابت طابلية تاعها ليكانت تخدم فيها محضنتها وتهدر وتبكي قطعتلي قلبي تفكرتها من أول وجديد دموعي ماحبسوش وخصوصا كيشفت تصويرتها معلقة بلبسة تاع الخدمة وكاتبين تحتها شهيدة الواجب لن ننساكي كنزة رجعتني نشهق بلبكا فراقها جاني صعيب وزيد على غدرة يعد ماركحنا رحت غسلت وجهي ورجعت عدلت الخمار وخرجنا غير خرجنا قابلني فايز يحكي إسحاق ماعجبنيش الحال ورحت نفتح الباب لقيتها مغلوقة حتا لقيتها تفتحت دورت وجهي لقيتهم دايرين جيهتنا قالي خويا اركبو درك نجي _ركبت وقلتلهم هادا واش يدير مع فايز يمشي خلينا نروحو _نطقت آسيا خليه انا ليعارفا واش يدير _واش ليعارفا نتي _قريب تعرفو _دارت يما لينا وقالت آسيا واش كاين اهدري لواش راكي تمعني _خليه هو كيجي يخبركم تسمعوها منو خير ماش مني _انشاءالله فيها خير _كلامها وسوسني بقيت ندور نشوف معاهم كاش مانهز كلمة من شواربهم بصح والو شفت مع يد فايز لقيتو حاط خاتم في قلبي بصحتي الحشوة ليدارهالي _ركب وسقاتو يما واش كاين بيناتكم _علاه ماخبرتكمش آسيا _ايه قالت نتا خير تخبرنا _مالا نروحو لدار وتسمعو _رحنا لدار تعشينا وقعدنا ساهرانين وينطق اسحاق قال بابا يما تروحو تخطبولي هادو ليام _هنا وسعت عينيا وحليت فمي _يما خبطت صدرها بيدها وآسيا دموع هبطو من عينيها هزت روحها وخرجت _قالو بابا كيفاه نروحو نخطبولك ومرتك قابلا _ايه هيا حتمت عليا لبارح وليوم خيرت لعروسة تروحو تخطبوهالي _قاتلو يما نتا مريض تتزوج على مرتك واش خصها آسيا _يما انا راسي راح يطرطق اوك كامل تحوسو على لولاد وهيا معاكم قاتلي اتزوج ماش راح نزيد نحرمك كتر كيقلت اوك راحت تبكي ونتي تلومي فيا وهاديك لهيه فاتحا فمها خلاص مادام قررت نتزوج ماكانش رجعا واحد مايرفض لمرا ليخيرتها _قالو بابا شكون هادي طفلة نعرفوها _ايه تعرفوها ونعرفها من زمان منى _هنا نضت وقفت جايب منى ضرة على مرتك مالقيت غيرها قولي حاب نحرق قلبها والله انا في بلاصة آسيا نهز قشي ونروح ونديرلك الخلع _هنا ناض ليا هز يدو راح يضربني حبسو بابا بصوت عالي _إسحاااق راني عايش رد بالك تزيد تخمم تضرب ختك وزيد بحضوري _هيا ليراهي تزيد فالهدرة معايا _خليتهم ورحت طلعت عند آسيا بصح سمعت صوت بكاها من دروج دايرا حالا فتحت الباب ودخلت ليها كيشافتني غمت وجها فالمخدة لقيتها تشهق باينا عليها مسكينة تتوجع وماش حاملا واش راح يصرا فيها _آسيا صح نتي قابلا بهادا زواج _سكتت زمان وهزت راسها ايه خليه يتزوج لوقتاه يبقى محروم من حقو يعود أب ويفرح بولادو أنا ماقدرتش نجيبهملو والعيب راهو فيا أنا _بصح راكي عارفا بشكون راح يتزوح _ايه عارفا بمنى وراني قابلا تعيشي ماتزيدي تسقسيني والو ليفيا يكفيني _مالقيت مانقولك غير ربي يجيب ليفيه الخير _هبطت سمعتهم يحكو كملت لبيتي وحطيت راسي على لمخدة ونخمم دايما لمرا ليماتجيبش لولاد تتظلم وتتحقر ويبقى قلبها يتحرق وحدها اما راجل يجيب مرا خلاف ويعدل بيناتهم ويعرف كيفاه يقسم حبو بيناتهم وكل دورة يقولك ربي عطاني ربع نساء وماش عارفين بلي هوما تجيهم عادي وكل مرا تزهيه وتنسيه فثانيا أما نساء فكل وحدا ماش دالتها تبات تبكي وقلبها يتعصر وهو ولا علابالو بايت في نعيم غير لمرا ليتسلكها وحدها وبدون أي مقابل من غير الصبر .