"حدث بالفعل "قصص رعب حقيقيه

"part6"

4 نوفمبر 2017
إلي : جيك ستابو
إزيك يا جيك ، الأكيد إنك متعرفنيش لكن أنا عارفاك كويس جدًا و مُعجبة بيك ، بتابعك في كُل لحظة في المدرسة و حتي في الطريق من المدرسة لبيتك براقبك و حتي جوا بيتك براقبك ، و رغم إن ماليش في كُرة القدم إلا إني بحضر كُل تدريبات و مباريات الفريق عشان أشوفك و إنت بتلعب ، بكون أسعد إنسانة في الدنيا لمّا الفريق بيكسب بسببك ، و بدعيلك تكون أشهر لاعب كرة قدم في العالم ، هكتبلك عنوان  بيت مهجور تحت أرجوك تبعت ردك عليه و أنا هقدر أستلمه بطريقتي ، هستني ردك
من : مُعجبة بيك
.
18 نوفمبر 2017
إلي العزيز الرائع : جيك ستابو
إنت مرديتش عليّا ، بس مش مُشكلة إنت أكيد مشغول مع أصحابك و في الحفلات اللي بتحضرها بإستمرار
بشوفك كُل يوم في فترة الراحة بين الحصص و إنت بتاكل مع أصحابك و بتضحك معاهم ، نفسي يكون ليّا أصدقاء زيك بس للأسف أنا معنديش أي أصدقاء ، هستني ردك علي عنوان البيت المهجور عشان عندي مواضيع كتير عاوزة أكلمك فيها
و متقلقش أنا هرد عليك لو بعتلي رسالة ، هستني ردك
من : مُعجبة بيك
.
2 ديسمبر 2017
إلي : جاك ستابو
دا تالت جواب ابعتهولك ، بحط الجوابات جوا الخزانة بتاعتك في المدرسة و عارفة إنك بتشوفهم لأني شُفتك و إنت بتقرا الجوابين اللي قبل كدا ، صحيح إنت رميتهم في الخزانة تاني و إنت بتضحك و دا جرحني لكن مش مهم ، أنا بحبك و هستحملك
أنا عارفة إنك قلقان دا يكون مقلب لكن أنا فعلًا بحبك ، المُشكلة إن معنديش جرأة أعترف لك بشكل شخصي
عارف ...
أنا مصوراك صور كتير أوي و حاطاها تحت مخدتي ، بحضنها كل يوم و أنام في حضنك ، شُفت انا ببحبك أد إيه ؟
هستني ردك
من : مُعجبة بتحبك
.
16 ديسمبر 2017
جيك ستابو
هو إنت مبتردش عليًا ليه ؟
مش بكتبلك عنوان البيت في نهاية كُل رسالة ؟
عمومًا أنا هعذرك عشان إنت أكيد بتفكّر هتجيبلي هدية إيه في أعياد الميلاد ، تحب أغششك ؟ ، أنا بحب السكاكين ... هاتلي طقم سكاكين و أنا هطبخلك بيه
هطبخلك سمك السلمون عشان عارفة إنك بتحبه ، و بعد ما تخلص أكل هعملك مساج عشان برضه عارفة إنك بتحب المساج
صحيح ... إيه موضوع البنت اللي إنت ماشي معاها علي طول بقالك أسبوع ؟
و كانت بتعمل إيه في البيت عندك إمبارح ؟
من الأفضل ليك إنكم تكونوا بتذاكروا ... و إلا .....
من : واحدة بتحبك
.
30 ديسمبر 2017
جيك ..
هو إنت بتمسك إيد شيلا و بتحضنها  ليه ؟ ... إمبارح شُفتك بتبوسها في الفصل بعد الحصة
لازم تفهم إنك بتاعي ... إنت بتاعي لوحدي ... هي مش هتحبك أكتر مني ... ليه ... ليه ... ليه !!!!!!!!
تمام .. إنت مسبتليش أي فرصة .. أنا هتصرف
هنكون سوا يا جيك و مش هنفترق ، هحس بدفاك بيحاوطني و محدش هيقدر يفرقنا ، هنحتفل سوا لمّا تبقي بتاعي لوحدي ، الحاجة الوحيدة اللي بتمناها من سانتا هي إنه يهاديني بيك
إنت قريب مني و قريب مش هنفترق أبدًا
حبيبتك الوحيدة
.
3 يناير 2018
حبي الأول و الأخير جيك
شكرًا إنك قبلت تكلمني كلمة علي إنفراد في الشارع الجانبي المُظلم ، شكرًا إنك مصرختش بصوت عالي و أنا بحقنك بالمُخدر ، شكرًا إنك مقاومتنيش و أنا بدبحك
شكرًا إنك بتاعي دلوقتي
أنا و إنت دلوقت سوا ، محدش في الدنيا هيقدر يفرقنا عن بعض تاني
عارف .. جلدك طويل عليا .. لمّا بلبسه بيبقي واسع و مُترهل عشان أنت كُنت أطول و أعرض مني ، إنت بتاعي ، كان لازم تفهم دا و هي كمان كان لازم تفهم دا ، كُل يوم بلبس البدلة الجلدية اللي عملتها من جلدك ، بتدفيني و تحسسني بالأمان
أخيرًا حققت حلمي و بقينا سوا
حبيبة عُمرك
.
.