"حدث بالفعل "قصص رعب حقيقيه

"part18"

النهاردة 1 نوفمبر 2016 ، جون خرج من أوضته الصبح و هو لسه لابس لبس التنكر بتاع الهالوين ، كان متنكر في زي قطة ضخمة بس شكلها كان مضحك ، ليلة الهالويين كانت 29 أكتوبر ... لما فضل لابس اللبس بوم 30 أكتوبر كنت فاكر الموضوع مضحك شوية خصوصًا إن اللبس كان شكله ظريف
يوم 31 أكتوبر كان الموضوع عادي ، مش مضحك خلاص بس بقي عادي
يوم 1 نوفمبر لما خرج من أوضته الصبح ... كده الموضوع بقي مقلق أكتر !!
.
جون كان زميلي في الشقة ، هو علي طول هادي و مالوش إصحاب كتير ... في العادي مش بيتكلم كتير و بيقعد علي طول لوحده ، لكن المرة دي كان مخيف ، الزي بتاعه كان بدأ يتوسخ ، البقع البيضا بدأت تصفر و الفرو بدأ يتقطع ، الخياطة بدأت تبان كأن جسم جون كبر شوية ، كنت بجهز نفسي عشان أنزل أروح المحاضرة بتاعتي لما لمحت جون قاعد يبصلي بصمت ، سألته : " إنت مش وراك محاضرات النهاردة ؟؟ "
هز راسه بدون و لا كلمة و هو لسه بيبصلي من ورا الماسك اللي لابسه ، لميت حاجتي و أنا علي الباب وقفت بصيتله و قلتله بصوت عالي : " الموضوع بدأ يبقي غريب يا جون ، بدأت أخاف منك "
قالي بصوت ميت و أجش مش شبه صوته : " أنا مبسوط كده ! "
جون مصمم يكمل لعبته السخيفة و يخوفني للآخر !
.
يوم 2 نوفمبر كنت بحاول أتجنبه تمامًا عشان ياخد باله إني متضايق منه
يوم 3 نوفمبر الوضع بقي أسوأ ... البقع البيضا اللي في الزي بقي لونها أصفر قذر و الريحة بقت قذرة أوي و بقت لا تطاق ، هو لابس اللبس ده بقاله إسبوع ، الموضوع أصبح لا يحتمل ، إتصلت بأخته و شرحتلها الوضع ، إستغربت جدًا و قالتلي إنه بطل يكلمها من يوم الهالويين لأنهم كانوا مختلفين و فكرت إنه مخاصمها بس الوضع ده غريب جدًا ، قالتلي إنها هتتصل بيه و تعرف منه إيه اللي بيحصل ده بالظبط !
.
كنت نايم لكن الريحة القذرة دي أجبرتني أصحي ، بصيت أدامي لقيته واقف جنب سريري بيتفرج عليا و أنا نايم ، لما شافني صحيت و فتحت عينيا ، قالي من ورا الماسك بتاع الزي بتاعه بصوت مخيف : " ملكش دعوة بيا ، متتدخلش في شئوني تاني أحسنلك ! "
حسيت بالغضب و الخوف سوا ، صرخت فيه و طردته برا و قلتله ميدخلش الأوضة تاني بدون إذن ، بكل برود مشي  و قبل ما يقفل الباب وراه وقف و بصلي و بكل برود  و بصوت مخيف قالي : " متتدخلش في شئوني تاني أحسنلك ! "
دي كانت أول مرة في حياتي أحس بالكمية دي من الرعب ، شكل الزي في الضلمة و صوته المخيف و حركاته الباردة و وقوفه يراقبني و أنا نايم ... كنت خايف أوي !!
.
تاني يوم و أنا في الكلية ، كنت بحضر محاضرتي الساعة 9 الصبح كالعادة لما 2 من ظباط الشرطة دخوا القاعة و سألوا عليا ، وقفت فإستدعوني عشان عاوزين يكلموني ، خرجنا للكافيتيريا و قعدنا سوا ، واحد منهم بصلي و سألني و عينيه مليانة شك : " مبلغتش ليه ؟؟ "
سألته : " أبلغ عن إيه ؟ "
كأنه مسمعش سؤالي كمل تاني بنفس النبرة : " مستغربتش لما إختفي ؟؟ "
سألته و صوتي إبتدا يتملي خوف : " مين اللي إختفي ؟ "
بدأ يحس إني خايف و مش فاهم حاجة فبدأت نبرة الشك تروح لكنه كان لسه صارم أوي و هو بيقولي : " جون ، زميلك ! "
حسيت إن هيغمي عليا من كتر الخوف و أنا بقوله : " جــ ... جون هناك في ... البيت و لابس اللــ ... اللبس السخيف بتاع القطة ده !!! "
شرحولي الموضوع بسرعة بعد كده ، جون يوم 29 أكتوبر يوم الهالويين مات ، حد إستدرجه للغابة طعنه 17 طعنة و دبحه و رمي جثته في مصرف ناشف ، الكلاب البوليسية بتاعة الشرطة لقت الجثة إمبارح و إستغربوا جدًا إن زميله في السكن ( أنا ) مبلغش عن إختفائه رغم مرور أكتر من أسبوع !!
حكيتلهم علي كل حاجة و قلتلهم إنه مكانش بيقلع الماسك خالص ، طلبوا الدعم و رحنا الشقة كلنا !!!!
.
دوروا كويس في الشقة كلها لكن ملقيناش أي حاجة ، لقينا بس زي القطة القذر مطوي بشكل مرتب فوق سريري و عليه ورقة مكتوب فيها كلمة واحدة بس : (( مخلصنـــاش ))