الكلب بتاعنا هرب النهاردة
.
كذبة سهلة .. بسيطة .. كُل الناس بتصدقها و محدش بيدوّر وراك فيها ، كُل الناس عارفة تصرفات الكلاب
مُشكلة الكدبة دي إنها بتحتاج بعدها شوية شُغل و تعب ، بطبيعة الحال لازم تمشي في كُل أنحاء الحي و إنت بتتظاهر بالقلق و بتنده علي الكلب و بتصفر له عشان يرجع ، تسأل سُكّان الحي عليه و تعليق ورق عليه صورته و رقم تليفونك
علي أي حال أنا لازم أكمِّل في اللعبة دي للآخر عشان خاطر الأولاد ، حاجة حزينة أوي و أنا شايف الألم و الحُزن في عينيهم و هًمّا بيدوروا علي الكلب بتاعهم ، بس قولولي إيه البديل ؟
الحقيقة هتخليهم يحزنوا أكتر !
.
الكلب بتاعنا هرب النهاردة
و أنا بنظف الأدوات بتاعتنا في العُلية ( الصندرة )
.
دي مش كدبة أوي بصراحة ، و ميزتها برضه إن محدش هيسألك عن السبب ، مين فينا مفيش في الحديقة بتاعته جاروف عاوز يتنضف ، شاكوش عاوز يتظبط بعد ما إتعوج و إنت بتخبط صخرة جامدة شوية ، فاس عاوز يتسن عشان يبقي حاد ، ففطالما أنا في العلية ليه منضفش الأدوات بالمرة
ليه قفلت الستارة ؟
عشان الناس ميشوفونيش ، المهمة اللي بعملها محتاجة خصوصية شوية و مش محتاجة فضول و أسئلة الناس ، و كُل ما أسئلة الناس تقل كُل ما الموضوع يبقي أهدأ و أريح ، و كل ما فضول الناس هيقل كُل ما المتاعب هتفضل بعيدة عني
.
الكلب بتاعنا هرب النهاردة
و أنا بنظف الأدوات بتاعتنا في العُلية ( الصندرة )
أنا و أمكم مكُناش بنتخانق
.
أصل هتفهم الأطفال طريقة و تعقيد العلاقات بين الكُبار إزاي ؟
التوتر في العلاقة بين شخصين مش معناه أبدًا إنهم مبيحبوش بعض ، كُتر الخناق بين الإتنين معناه إنهم بيحبوا بعض بجنون ، أصل لو مبيحبوش بعض مش هيتخانقوا ، بالعكس يبقي ساعتها مفيش إهتمام كفاية
لكن من الصعب تشوف حد بتحبه و بتهتم بيه بيروح لطريق خاطئ ، أنا مُمكن أكون أي حاجة غير إني أكون مش مهتم بحد بحبه
مش مهم هي قالتلي إيه و إتهمتني بإيه ، المثهم الوقت و المجهود اللي أنا بذلتهم عشان إستقرار الأسرة دي ، التضحية اللي أنا ضحيتها عشانهم ، و هفضل كدا .. مُستعد أعمل أي شيء عشانهم
.
الكلب بتاعنا هرب النهاردة
هنجيب كلب تاني و أحسن منه
.
و أنا بنظف الأدوات بتاعتنا في العُلية ( الصندرة )
و القفل اللي علي باب الصندرة دا عشان محدش منكم يعوّر نفسه بالأدوات
.
أنا و أمكم مكُناش بنتخانق
هي بس راحت عند جدتكم عشان ترتاح شوية
.
هو ليه لازم الناس تعقد الأمور بالشكل دا ؟؟
الكدبة التالتة هدفها تقليل الأسئلة شوية ، كُلكم عارفين معني إن أمهم راحت لوالدتها ، الكلب هرب هعملهم إيه يعني ، كُلالناس بتتدخل في حياتي و في طريقة تربيتي لأولادي بطريقة تضايق
مكُنتش عاوز أعمِل كدا ...
لكن زي كُل و أي حاجة بعملها ، بعملها عشان مصلحة الأسرة دي ، الحفاظ علي الأسرة دي مُتماسكة ، مش عارف إزاي مش قادرين تشوفوا دا ! ، مكُنتش عاوز أعمل كدا
الحمد للله إننا في الشتا ، و الريحة مش هتطلع من العُلية بسُرعة
.
كانت هتاخد مني أولادي !
.
لمّا بتشتت الناس بأكاذيب كتير بينسوا تفاصيل مُهمة ، الكلب لسّه مرجعش ، نسوا موضوع الأدوات و بطلوا يسألوا عليها ، المُشكلة لمّّا حد بيسألني علي الكلب ، بنسي هو بيتكلم عن إيه ، و بعدها بفتكر فبضحك بإرتباك و بقوله لسّه مرجعش
أخيرًا وقتي بقي ملكي بعيدًا عن المشاكل ، بتفرج علي التليفزيون براحتي ، بشتغل في الحديقة براحتي ، بحفر حفر كبيرة طول الوقت و لو حد سألني بقوله إني بقلِّب التُربة
.
مش المفروض الأسر تكون مع بعض طول الوقت ؟
من ساعة ما هي مشت و إحنا أسعد و أحسن ، مرتاحين أكتر ، الحاجة الوحيدة اللي بتخليني أعيّط كل يوم إني في وقت من الأوقات تخيلت أن أنا و هي هنكون سعداء سوا و طول العمر
.
رفعت قضية بعد إختفائها و كسبت حضانة الأولاد بشكل كامل
و الكلب لقيت جُثته و دفنته في الحديقة
الشُرطة شكوا فيّا و قرروا يحفروا قبر الكلب و يشوفوا إيه جواه ، حفروا شوية و لقوا جُثة الكلب المُتحللة ، دفنوه تاني
لو واحد بس فيهم ذكي كان فكر يشيل جُثة الكلب و يحفر تحتها ، يمكن ساعتها كانوا هيعرفوا راحت فين
.
أنا أذكي منهم كُلهم
.
.
.
أنت تقرأ
"حدث بالفعل "قصص رعب حقيقيه
Horrorقصص رعب ،،قمه الرعب، #8_Horror كلها حقيقيه وحدثت بالفعل لعشاق الرعب،،الاثاره والغموض منقوله ومترجمها محمد عصمت استمتعووا
