"حدث بالفعل "قصص رعب حقيقيه

54

إزيكم ..
أنا بشتغل في برنامج تعليمي خاص بإحدي المدارس الإبتدائية ، مُلتحق في البرنامج معايا طلبة من الصف الأول و حتي الصف الرابع ، كُل يوم بعد إنتهاء البرنامج بطلب منهم ياخدوا قطعة ورق بيضاء فاضية و يرسموا حاجة من خيالهم تكون بتعيّر عن يومهم أو حالتهم النفسية ، ساعات بيرسموا حاجات أو أنشطة مارسوها في عطلات نهاية الأسبوع ، بعد ما بيخلصوا بحُط الرسم في ملف خاص بكُل طالب علي حدة ، بصراحة مش بهتم في مُعظم الأحيان أشوف هُمّا رسموا إيه و أقارنه ببقية الرسوم القديمة لكن علي الأقل باخد فكرة عن خواطرهم و أنشطتهم
أغلبهم بيرسم حاجة عن حيوان أليف هو مربيه زي الكلاب أو القطط ، و ساعات عن أسرهم ، ساعات كمان بيرسموا نفسهم بيلعبوا فيديو جيم أو رياضة من الرياضات
.
لكن مؤخرًا رسومات إيريكا و هي واحدة من أحسن و أشطر الطالبات المُلتحقين بالبرنامج التعليمي بدأت تلفت نظري ، إيريكا عندها 9 سنين ، بنت لطيفة و رقيقة ، مالهاش أي سابقة في إختلاق المشاكل سواء مع زمايلها أو مع مُدرسينها ، بتذاكر دروسها و متفوقة في دراستها ، إيريكا بتستني وقت الرسم بحماس و بتكون حريصة علي رسم لحظة من اللي عملته أثناء عُطلة نهاية الأسبوع
في بداية السنة كانت بترسوم رسوم متقنة و بتنم عن موهبة كبيرة ، لكن بعد عودتها من أجازة مُنتصف العام بدأ مستوى الرسم بتاعها ينحدر للأسوأ ، رسوماتها بقت سطحية .. مفيهاش تفاصيل و مؤخرًا بقت مُخيفة ، بطلت تلونهم و بقت بتسيبهم بالأبيض و الأسود ، بطلت ترسمهم بالقلم الرُصاص و بدأت تستعمل قلم حبر جاف
في البجاية إعتقدت إنها زهقت من الرسم و مبقتش تحب الوقت المُخصص للرسم في نهاية كُل حصة ، دا أنا مُتفهمه جدًا و معنديش معاه مُشكلة
لكن الموضوع مكانش كدا .. بالعكس الموضوع خد مُنحني مُخيف !
.
إيريكا فجأة بدأت تختلق المشاكل بدون سبب ، بتتخانق مع بقية الطلاب ، مبتسمعش كلامي و لا كلام أي مُدرس تاني غيري ، سرحانة طول الوقت و مُمكن تقعد بدون حركة مُحملقة في الفراغ لمُدة تزيد عن الرُبع ساعة ، مابتردش علي حد و كأنها مش سامعانا نهائيًا ، بتغضب لو أي حد لمسها ، بتتضايق لو حد حط إيده علي كتفها و هو بيكلمها
بدأت تبقي عنيفة ، الأسبوع اللي فات تشاجرت مع واحد من التلاميذ مرتين ، و كانت عنيفة جدًا معاه ، حاولت أتكلِّم مع والدتها لكن والدتها كانت سلبية و بتتمتع بلا مبالاة غريبة !
.
عادةً حصص البرنامج التعليمي بتنتهي الساعة 6:30 مساءً ، إيريكا آخر طفل بيتحرك من المدرسة ، كُل الأطفال بيخرجوا يلاقوا أهلهم مستنينهم إلا إيريكا هي الوحيدة اللي بتقعد في الفصل مستنية والدتها تيجي ، و والدتها مش بتيجي قبل الساعة 7 مساءً
الموضوع مش مضايقني لأني باخد مرتبي بالساعة فكل دقيقة بتمر بتحاسب عليها لكن بتصعب عليّا البنت ، أنا مُدرِك إن والدتها بتربيها لوحدها بعد وفاة والدها لكن برضه أنا حاسس إنها مُهملة جدًا و مش بترعى بنتها بالقدر الكافي
كتبتلها أكتر من تقرير عن تدني مستوي بنتها الدراسي لكن كانت بتاخد مني التقارير بملل و في بترميه في الشنطة بتاعتها من غير إهتمام ، مش مُهتمة تسمعني هقول إيه عن بنتها و طول الوقت في حالة لا مُبالاة !
.
أنا هوريكُم الصور و هشرحهالكم لأني بفكّر أتصل بالشُرطة و أقولهم إن الأم مش بتراعي بنتها بشكل كافي و هخليهم يجبروها تهتم ببنتها أكتر من كدا ( الصور في الكومنتات )
محتاج آخد رأي أكتر من حد قبل ما أتصرف ، لو حد فيكم غيري شايف الصور مُخيفة هبلغ الشُرطة ، أما لو شُفتوا الصور طبيعية فأنا ببالغ و هحاول أهدي نفسي شوية
الصورة الأولي : صورة ليها مع صديقها و مكتوب عليها
" ( هو ) بيحِس ناحيتي بمشاعر لطيفة "
الصورة التانية : صورة ليها ماشية مع صديقها و بتفكّر في إنها هتقع علي الأرض و مكتوب عليها
" السقوط علي الأرض ( بيؤذيني ) "
الصورة التالتة : ماشية مع صديقها و ماسكين إيدين بعض و مكتوب عليها
" ( أنا ) و صديقي "
الصورة الرابعة : واقفة مع صديقها و ضهرها للصورة و هو باين عليها الغضب و مكتوب عليها :
" بيعلمني أتكلم بأدب و لُطف و أقول كلمات زي ( أرجوك )
الصورة الخامسة : صورة لصديقها ماسك صينية عليها كوكيز و مكتوب عليها
" ( ساعدني ) أعمل كوكيز لذيذة "
الصورة السادسة : صورة ليها قاعدة علي إيديها و رجليها علي الأرض أدام صليب و وراه واقف صديقها رافع إيده لفوق و مكتوب عليه
" ( أنا ) و صديقي بنلعب "
.
مُمكن حد منكم يساعدني و يقولي هل الموضوع طبيعي أنسـاه و لا أبلغ الشُرطة عن إهمال الأم ؟
.
تحديث 1 : مكُنتش آخد بالي من الكلام المكتوب بخط كبير لكن أكتر من حد منكُم لفت نظري إن لو رتبنا الكلام اللي بين القوسين هنكون جُملة مُرعبة ... ( هو بيؤذيني .. أرجوك ساعدني )
واضح إن فيه راجل في حياة أمها بيضربها و بيؤذيها .. أنا هتصل بالأم شُكرًا ليكم ..
.
تحديث 2 : مفيش أي راجل في حياة الأم !
الأب ميت و هي مش مُرتبطة ، بيتهم في منطقة نائية و مفيش حواليهم جيران نهائيًا
يا تري مين الراجل دا ؟!
.
تحديث 3 : واحد منكم أخد باله من ملحوظة مُرعبة مكُناش واخدين بالنا منها !
الراجل اللي في الصور اللي هي بتقول عليه صديقها بقرون !!
الموضوع شكله أكبر من أم مهملة !!
.
.
.