"حدث بالفعل "قصص رعب حقيقيه

70

كومنتاتكم علي بوست الأطفال إمبارح كان فيها حاجات مرعبة أكتر من البوست ، فمساء الخير جدًا و قراءة سعيدة و نوم هانئ و أحلام مرعبة
1 / أنا بكره رُكن الأوضة بتاعتي عشان الراجل المحروق اللي بيقعد مربّع فيه
.
2 / بنت خالتي 4 سنين متابعة عند دكتورة أطفال عسولة ، ليها فترة تقول لنا الدكتورة فيها نونو ،
نقولها لا هي أصلا مش حامل ونحاول نقنعها يستحيل ، تقول والله فيها نونو !!
كان عندها كشف من كام يوم قالو لنا الدكتورة وضعت وفي أجازة !
.
3 / انا مبشوفش حاجه بس اللى حواليا اللى كانو بيشوفوا حد شبهى لونه أزرق و يتقالى بعد كده أنا شفت حد شبهك والصدفة إن كلها بتبقى فى أيام أنا قلقان فيها من حاجة كبيرة و لما كبرت قرينى الازرق ده مبقاش يظهر
.
4 / ابني الكبير وهو حوالي 3 سنين كان بيجي في طرقة الحمام قرب الفجر وهي ضلمة و يضحك يقول إزيك يا عمو تعالي يا ماما سلمي علي عمو اللي بجلابية بيضا
.
5 / أيام إمتحانات الثانوية العامة كنت مخلصة الإمتحان ، رجعت نمت بعد يوم كله تعب وقرف ، صحيت الساعه 12 بالليل علي تليفوني ، حد كان بيتصل ، كنت صحيت خلاص وقفلت الفون ، ببص جمبي لقيت واحد واقف قدامي ورجليه مش لامسة الأرض وملامحه متلغبطة ولما ركزت أوي إختفي
.
6 / مرة بنت خالي كنا بنتفرج علي التلفزيون لقيتها مرة واحدة بتبحلق ف السقف وبتصوت كتير ٱكلمها مبتنطقش ، ٱقومها مش قادرة تحرك رجلها ، عرفنا بعدين إنها كانت شايفة حاجة ولها عنين منعرفش إيه هيا لحد دلوقتي
.
7 / ماما بتحكي إن و إحنا صغيرين كانت سيباني أنا وأختي في الاوضة لوحدنا ، أختي كانت بتعيط وفجأة سكتت ، ماما جت تقولي هي سكتت إزاي ؟ ، أنا قولتلها مفيش هما جم سكتوها فسكتت
.
8 / ابنى كل ما يدخل الحمام يزعق ويقول امشي يا قطة !
.
9 / أختي عندها 4 سنين وبقالها فترة طويلة جدا الاقيها بتلعب وتتكلم مع حد مش موجود بلعبها وكده ، و لما بسألها بتلعبي مع مين تشاور علي حد مش موجود وتقولي دي !
.
10 / كان عندي 5 سنين وعايشة في السعودية و ماليش اخوات ، كنت بنام بين بابا وماما ، ماما منقبه و بتعلق عبايتها ونقابها ورا باب الأوضة ، كل يوم قبل النوم أفضل صاحية وهم يناموا قبلي ، فكنت ديما بلاقي الهدوم دي بتتجسد و حد يلبسها ناس طوال ورفيعين ، رجالة وستات منقبات وبيتكلموا معايا ويقلولي : " تعالى معانا يا آية" ، و كانو بيتكلموا بحب فظيع ، أنا كنت بخاف جدًا وأجري على ماما أو بابا وأحضنهم لحد ما أنام
فضلوا كدا كتير والموضوع بدأ يكبر و أخاف أكتر وأعيط ومرضاش أنام وماما مرضتش برضه تشيل العبايات لحد ما في يوم من كتر عياطي وخوفي بابا قال خلاص هنشيلهم ، بعدها الموضوع خلص بعد ما إستمر شهور بس عمري في حياتي ما نسيتهم عشان دايمًا كنت بحس انهم داخلين عليا ف كل مكان مهما غيرنا البيت ، في مصر او السعوديه و إنهم هيرجعوا في يوم من الأيام ، لحد ما تيتا توفت و جم بيت تيتا و لابسين نقاب أبيض ، كنت هبدأ أنام لقيتهم داخلين من الباب بالراحة وبيمشوا بالراحة ، قالولي : " آية دي آخر مره هنيجي فيها ، فكري بسرعة هتيجي معانا ولا لا لو طلعنا من البلكونة دي ، مش هنرجع تاني أبدا ، آية الدنيا هتتعبك أوي ، إحنا هنعرف قيمتك أكتر ، هتتعبي ف الدنيا ، الناس وحشه "
كانت ساعتها نفسيتي تعبانة ، كنت هوافق و أروح معاهم بس صعبت عليا ماما اني أسيبها لوحدها و اني معرفش مصيري و معرفش رايحه فين فمروحتش بس كنت متضايقه اني مش هروح معاهم و كانت الكبيره بتاعتهم زعلانة و بتقولي : " ها يا آية بسرعه مش هتيجي برضه ، متأكدة ، دي آخر مره بقولك ، اخر مره "
كانت بتتكلم بحنية وهدوء ، أنا مرضيتش أروح و أول ما مشوا عيطت إني مروحتش
.
11 / أختي مره جت جري من برا ، جت جنبي وقالتلي : " ممكن تيجي معايا بره ، عايزة أجيب ماية بس خايفة "
قولتلها : " ماشي بس انتي خايفة من ايه "
كان عندها ساعتها 4 سنين ، قالتلي الولد والبنت قاعدين بره علي الكنبه و أنا خايفه منهم ...
.
12 / و انا صغيرة 3 سنين ماما كانت جايبالي بازل كدة على شكل كلبة جمبها جروين صغيرين ، كنت نايمة و حلمت بالبازل ، الكلبة دي وشها بيكبر بيكبر و سنانها بتبرز ، لحد ما قمت مشيت من السرير للدولاب حوالي 10 خطوات رجلين كبيرة و انا بطير رجلي متحركتش ولا لمست الارض ، رجعت من الدولاب للسرير و قعدت اصوت ، ماما دخلت عليا الاوضة و لما بنفتكر الموضوع ده ماما بتاكد اني كنت برفص و بصوت و انا طايرة فوق السرير فعلاً !
لحد هنا مش المشكلة المشكلة اني مكلمتش ماما في الموضوع ولا ماما اتكلمت لحد ما ماما خلفت اخويا و عزلنا من الشقة و البازل ضاع ماعدا قطعة واحدة ، اتبهدلت فالعزال و اخويا لقى القطعة دي و هو عنده 5 سنين يعني بعد 6 سنين من الحادثة ، لعب بيها و حلم في اليوم ده نفس الحلم و صحي يصوت و قال لماما نفس الحلم ، الكلبة اللي راسها بيكبر ، ساعتها فكرت ماما بالحادثة اللي مانستهاش رغم سني وقتها و هي اكدتلي على حالتي لما دخلت عليا الاوضة و رمينا القطعة اللي فاضلة فالبازل ، البازل ده كان مسكون فعلاً !
.
13 / ليا أخت و إحنا صغيرين كانت مجتهدة في المذاكرة ، في يوم لقت ماما داخلة عليها الأوضة نص الليل و بتقول لها بزعيق : " كفاية كده ونامي "
خافت ونامت ولما صحيت الصبح سألتها : " ليه يا ماما زعقتي ونيمتيني ؟ "
قالت لها : " ما حصلش وماقمتش من نومي إلا الصبح " ...!
.
14 / ماما بتقولي وانا عندي سنتين رحت عند بطنها وقلتلها هنا في محمد وماما مكنتش حامل بعد اسبوع راحت للدكتور وقالها انها حامل وفعلا بقي محمد زي ما انا سميته