بعد مرور ٤ اشهر .......
كانت شيرين تجلس وحيدة فى شقتها الجديدة وكانت تستمع لموسيقى كلاسيكية هادئة ،ترسم احدى لوحاتها فى المرسم الصغير الذى استقطعته من شقتها وشارده معها ، حتى انها لم تنتبه لجرس الباب ، بعدها قامت من مكانها ونظرت من العدسة السحرية الخاصة بالباب فوجدتها مربيتها (عواطف ) فابتسمت وفتحت لها الباب .......
شيرين مبتسمه : حبيبتى يادادة نورتى البيت .. ثم اخذت منها حقيبة ملابسها واحتضنتها ...
عواطف : انتى اللى وحشتينى يا قلب دادة ، ايه ده ساكنه بعيد قوى ده الراجل بتاع التاكسي اللى كنت فيه دوخنى السبع دوخات على بال ماوصلتلك هنا ، ثم نظرت للشقه بنظرة متفحصة سريعه وقالت : بس بسم الله ماشاء الله الشقه جميلة ، ومريحة كده وتفتح النفس ، وكبيرة ، ربنا يكتبلك الخير يارب .
شيرين: ربنا يخليكى يا طوفى ، يلا تعالى بقى عشان اوريكى اوضتك ترتاحى فيها ، عقبال ما اعملك اكلة انما ايه ، اه وشوفي اوضتك وقوليلى رايك ايه ولو معجبكيش فيها حاجه بلغينى فورا...
عواطف وهى تحتضنها : ربنا يباركلى فيكى يا بنتى ويحميكى يارب، بس لو بتحبى داده سيبينى انا اعملك الاكل ، قاطعتها شيرين : لاء ابدا استحالة، ولا انتى بقى مش عاوزه تاكلى من ايدى .
عواطف: يالهوى هو انا اطول القمر ده يطبخلى بايده بس انا مش اتعبك يا نور عينى ...
شيرين بحزن : تعبك راحه يا طوفى كفاية انك سيبتى البيت اللى عيشتى فيه عمرك كله وجيتى تقعدى معايا هنا .
عواطف وهى تربت على كتفها : معلش يا ضنايا ربنا يسامح اللى كان السبب لسه مش قادرة اصدق ان سليمان بيه يعمل كده فيكى ويسيب البنت تقعد لوحدها والولد هو يخليه يرمح فى البيت على كيفه ...
شيرين : كده افضل يا داده انا هنا مستريحه اوى ومبسوطه كمان .
عواطف: ربنا يريح قلبك ويبسطك دايما يارب...
شيرين : طب يلا بقى يا طوفى لاحسن انا هموت من الجوع ولو تاخرتى ثانية واحده هتلاقينى خلصتلك على الاكل كله .....
عواطف : بعد الشر عليكى من الموت انشاء الله اللى يكرهك يارب ..
دخلت عواطف لغرفتها، وتركت شيرين وهى تذهب للمطبخ لتحضر الطعام لهم ، واثناء تحضيرها للطعام ، شردت فى ذلك اليوم الذى خرجت به من الفيلا مكسورة وحزينه وهى غير مستوعبة ردة فعل والدها ، وعندما كانت ذاهبة وتاركه الفيلا وجدته امامها ينظر لها ساخرا وكانه يبلغها انه هو الاساس وصاحب هذا البيت وما هى الا مجرد ضيفة سوف ياتى عليها يوم لكى ترحل من هذا البيت ، فهذا البيت يعتبره ملك له هو وليس لأى احد غيره السُلطه او الامتلاك غيره هو .
معتز بسخرية: ههههه ايه يا جميل شايفك يعنى لامة شنطك وخارجه ايه تكونى سايبه البيت لاقدر الله .
أنت تقرأ
حب اعماه الانتقام ..
Romanceجمعهما الحب وفرقهم الانتقام عشقها من اللحظه الاولى وهى احبته بجنون ولكن ذلك لم يكن كافى ليردع حرب الانتقام ببنهم ........ فما الذى سيحدث لهما مع الايام ..........
