الشيطانة الفاتنة

الجزء 130

صرب:رووووووووح
مشا دغيا طل كتبان ليه هابط وشعرها طاير وكتحرك يديها تسمعات رداااااخ مع الارض والغوات ديال ناس مقدرش يتيق للحظة ضن واش كيحلم رمش عينو كيحاول يدخل لمخو اش عاد وقع كيتفكرها مني يلاه كانت بين يديه فشلوا عليه رجليه جلس فالارض لحظات كيهضم الصدمة ضربات ليه طن فراسو ناض كيجري بحر جهدو وغير فالكلاكيطا وصدرو عريان كيجري ويغوت
صرب:لا ميمكنش ميمكنش مغاديش تموتي مخصكش تموتي روح روح
معرفش كيفاش حتا نزل للتحت لقا ناس مجمعين وكيغوتو كاين لي مغمض عينو مقادش يشوف كاين لي ساد فمو بهول الصدمة كاين لي كيبكي وكاين لي كيصور كانو مغطيينها نزلوا دموعو أول مرة تيكون بهاد الضعف معندو حتا ذرة شجاعة يقرب حيد واحد وهو يبان ليه شوية من شعرها قلبو تهز وتحط دخل بيناتهم كيجري ويبكي تخلط عليه كلشي بانت ليه ناعسة على كرشها ومغمضة عينيها ودم دايز من فمها
صرب:روح فيقي روح ياك غير كضحكي روح روح
حط يدو على يدها
صرب:لاش ا روح لاش درتيها (دموعو سايلين) لاااااش ا روح لاااش لاااش مجمعين عليا هنا عيطو لشي واحد عيطو رووح متموتيش لا لا متموتيش لا ا روح (بدا يترعد سد فمو)
قاس نبضها من عنقها لقاها مزال كتنفس يلاه بغا يهزها وجا واحد راجل كبير فلاج حبسو
الشخص:لا ا سيدي متقربش ليها ممكن تزيد تعرض حياتها للخطر عيطت للاسعاف هما ايعرفو يهزوها صبر اولدي
شاف فيه وعاود شاف فيها تحنا حتال يديها وباسها وحط راسو فالارض اونفاس مع وجهها مبقاش عارف كيدير
صرب:روح حبيبي فيقي يلاه فيقي وأنا انعوضك على كلشي عطيني غير فرصة انتاقم من كاع لي دمرك كنواعدك (دموعو كيزيدو ينزلوا) لاش درتي هاكا لاش ا روح
حط فمو على يديها مقرب وجهو ليها كثر باش يحس بالنفس ديالها ويطمأن بلي مزال متقطع
دازت خمسة دقايق جات لومبيلونس غير سمعها جمع نوضة والعافية شاعلة فيه جاو كيجريو مشا صرب شنق على وا منهم
صرب:لاش تعطلتو لااش يحرق جد طاسيلة بوكم الكلب توقع ليها شي حاجة نمحيكم
جروه شي وحدين من لي كانو واقفين هنا هدنوه وخلاوهم يديرو خدمتم هزوها وحطوها بعناية حيت ممكن يكون مهرس فيها شي حاجة ولا مقيوسا ليها شي حاجة ركبوها فلومبيلونص وزادو طايرين مشا ركب معاهم صرب حيت مخلي سوارت لوطو فالابارطومون طريق كلها وهو شاد يديها بيد واليد لاخرة ساد بيها فمو قطعوا ليها احوايجها وركبو ليها سيروم واجهزة لي كيقيسو النبضات ودواو معا المستشفى باش يوجدو غرفة العمليات
صرب:شنو عندها
الممرض:مزال معرفنا ولكن غالبا نزيف فالدماغ وفالقفص الصدري عاد خاصها دير لي سكانير على العمود الفقري
صرب:غادي تعيش ياك
الممرض:كلشي ممكن ولكن منضمنش ليك حيت نسبة كبيرة تكون تقاست ليها الكلية ولا غيرها المهم دعي معاها
بقا يشوف فيها قلبو كان كينزف مقادش يطلع نفس حاس براسو مخنوق شحال صعيب تكون كتشوف شخص عزيز على قلبك فحالة مقاد دير فيها وااالو من غير تبقا تشوف فيه
وصلوا للكلينيك وهبطوها كيجريو بيها والجهزة جارينهم وراه صرب حرف لاطلق يديها حتا دخلواها للغرفة وحبسوه بقا واقف فالباب ديال البلوك مكيرمش كيحس براسو عايش شي كابوس يعطي حياتو باش يفيق منو نزل على ركابيه منهار تماما مفيه حتا حاجة مقادة بكثرة الالم حتا جمسمو ركد عليه كيحس بروحو خارجة من بلاصتها نزلو دموعو حتا حس بيد تحطات عليه قفز وضار شاف شكون لقاه واحد البوليسي مسح دموعو وناض مخنزر
صرب:كاين منقضيو
البوليسي:عندنا رخصة باش نفتشو دارك اسي صرب ونديرو تحقيق على مكان وقوع الحادث
صرب:سيرو
البوليسي:علمنا عائلتها غا...
شتق عليه
صرب:أنا عائلتها فهمتي انااااا بوحدي عائلتها
بانو ليه جايين كحل بالعما ولا بحال الثور لاح البوليسي ومشا قاصدهم وقفهم كلهم مبقا كيبان ليه لا كبير لا صغير لامها لا باها لا جابر حيت كانت واصلة فيه للعضم
صرب:اش كديييرو نتوما هنا القحاااب والله ينعل طب** مكم داااابا عاد بانت ليكم سيرو قودو من هنا قودووووو هاديك لي تم دنوبها على رقبتكم ياويل ويلكم توقع فيها شي حاجة قسما بلي خالقني وخالقكم حتا تبعوها واحد واحد هاديك(دموعو بداو ينزلو وصوتو بح) هاديك بنتي أما وختي أنا ومرتي انا بوووحدي فهمتو بوحدي القحااب