الشيطانة الفاتنة

الجزء 150

خرجو ومليكة سابقاها وهي مثقلة ببنتها خرجو من الباب دالكوزينة كانت الدنيا كتصفر تعجلات فالاول ولكن مع الخلعة متسوقاتش بزاف قلبها كان كيضرب فالتسعين كتحس بيه غادي يخرج وصلوا للباب لي قالت ليها لقاوه خاوي حلات ليها الباب
مليكة:الله معاك
روح:شكرا بزاااف إلا هربت عمري نسا خيرك
باست مليكة حنين مات روح كتجري ودور فجنابها كانت الظنيا خااوية حي بني آدم مقطوع تكدب على راسها إلا مخافتش وخصوصا على بنتها بدات كتمشى وتزرب فمشيتها قلبها لي كيتسمع من غيرو الحس مقطووع شوية سمعات تخرشيش وراها حتا كانت اتغوت ولون مشا منها ضارت تشوف شكون مبان ليها والو مع الضلام طلقات رجليها للريح وكتنهج وكتسمع صوت كيقرب منها على شوية كانت اتبكي بدا كيبان ليها ضو بعيد زادت خففات رجليه وقلبها واقف ففمها بالخلعة وصلات للشانطي ووقفات كتنهج محيلتها لراسها ولا لبنتها داخت بقات كتنفس بجهد حيت سخفات ورجليها بظاو يعطيوها الصداع حيت فورصات عليهم بدات بنتها تفيق مفاهمة والو
حنين:مامي فين حنا
روح:شووت كبيدة متخافيش حنا غير خارجين باش نلعبو متخافيش الكبيدة
سمعات الصوت كيقرب منها باست بنتها
روح:مامي متخافيش وبقاي ورايا
حنين:اك مامي
حطاتها ودارتها ورا ضهرها جبدات الموس لي عطاتو ليها موجدة لداكشي لي ايخرج ليها وخوفها كلو على بنتها غادي وكيقرب وقلبها كيشطح بالخلعة وحنين مخبية وراها شادا ليها فرجلها
شوية وهو يخرج قدامها واحد رجل باين فيه سكران كان ضخم البنية وغير شوفا فين تخلع بدا كيقرب ليهم وكيدوي بالبرازيلية مفهمات حتا كلمة من لي كيقول يلاه ايشدها غرسات ليه الموس فعينو وهزات بنتها طارت بيها وهي كلها كترجف شافت ضو دواحد لوطو بعييدة بحال إلا شافت شي كنز عينيها بداو يبراو بدات تلوح بيديها ووقفات وسط الطريق حتا وقفات لوطو عند رجليها مشات كتجري عند لي سايق حل عليها زاجة كان شاب فمقتبل العمر وباين من ملامحو برازيلي
روح:(بالانجليزية وكلها كترجف)عفاك تقدر توصلني للمدينة
الشاب:واخا ركبي
مشات طايرة حداه جلسات وحطات بنتها فوقها معنقاها بجهد وخاشياها فيها وكتشوف فشاب بنص عين كتلقاه مخرج عينو فيها وفمفاتنها الشيء لي زاد من خوفها كثر تقنتاات فالجنب كتبعد منو قد ما قدرات
حنين:(بشوية)ماما شنو واقع فين هو بابا
روح:شووت ا ماما حنا غادين لواحد البلاصة اتعجبك بزاااف
حنين:اك ماما
روح:نعسي ا كبيدة
عنقاتها كطبطب عليها حتا نعسات وهي مغمضاتش خايفة من لي جاي كثر وقلبها مقبوط عليها ساعات وهما غاديين حلفو لا وصلو حتا بدا كيدخلها الشك
روح:خويا واش مزال الطريق بعيدة
الشاب:وي مزال شوية ا زين (غمزها)
خنزرات فيه ودورات وجهها معندها مدير خاصها تصبر شوية كيبان ليها بلاكة كاتبين فيها بالانجليزية المطار تقادات فالجلسة كضور فعويناتها
روح:فين جايبني نتا
مجوبهاش زادت تخلعات بحال إلا فهمات شنو واقع روح:(وجهها صفاار)دويي فين غادي وقف وقققف
فاقت حنين قافزة بدات تبكي
روح:صافي ا مامي بسم الله عليك مواقع والو
وقف فواحد الساحة خاصة بالطائرات الخاصة بانو ليها لي كارد مستفين وهو واقف داير النضاضر ومبتاسم حتا باينين ليه ضروس العقل قلبها بدا يرفرف بالخلعة معرفات باش تبلات شافت ببنتها ورجعات شافت فيه كتحس بدمها جمد بكثرة الرعب لي ركبها من لي جاي