ဒဏ္ဍာရီ

အပိုင်း ၁၂

ဒဏ္ဍာရီ  အခန်း ၁၂

       ယောင်ဆန်းကိစ္စနှင့် မီတစ်ယောက် မျက်နှာပူလို့မှ မဆုံးသေး၊ တစ်နေ့ နောက်ကိစ္စတစ်ခုနှင့် ကြုံရပြန်သည်။ မီ ထိုနေ့က ဆံပင် ဆေးသွားဆိုးသည်။

     ညိုဝါရောင် ဆံပင်တွေကို မီကျေနပ်စွာနှင့် ယုကို ကြွားဖို့ကြံသည်။ ထုံးစံအတိုင်း ဆယ်လ်ဖီရိုက်ကာ ယုဆီသို့ ပို့လိုက်သည်။ ရှည်ရှည်ကဲကဲနှင့် အင်္ဂလိပ်လိုပါ ရေးလိုက်သေးသည်။

“ How’s my hair colour? ”

မီ ဘာမှမစဉ်းစားမိသေးခင်မှာပဲ တစ်ဖက်မှ reply လေးရောက်လာသည်။

“ beautiful ~^^”

ထိုစာကို မီဖတ်မိချိန်တွင်တော့ ဖုန်းပင် ဂွပ်ကနဲ လွတ်ကျရသည့်အဖြစ်ရောက်တော့သည်။ မီ ပို့လိုက်တာ ယုဆီသို့ မဟုတ်။ Jun ဟုထင်သော အကောင့်ဆီသို့ ဖြစ်၍နေသည်။ အဖြစ်က ယောင်ဆန်းနှင့်တွေ့ရသည်ထက် အခြေအနေဆိုးသည်။ ကတုန်ကယင်နှင့် အန်ချင်သလိုပါ ဖြစ်လာသဖြင့် ဖုန်းကို ခဏဘေးတွင်ချကာ ထိုင်နေရသေးသည်။ အသက်ဝအောင်ရှူပြီး ရင်ခုန်သံမှန်အောင် မနည်းကြီးလုပ်ပြီးကာမှ ထုံးစံအတိုင်း ဆောရီးတွေ မိုးမွှန်ရတော့သည်။

“ ကိစ္စမရှိပါဘူး။ မရှက်ပါနဲ့ ။ ငါ မင်းပုံကို ဖျက်ပေးပါ့မယ် ”

မီဘာပြန်ပြောရမှန်းမသိ။ ခုချိန်ထိ အသက်ရှူမမှန်ချင်သေး။ သူမ မှားလုပ်လိုက်မိသောကိစ္စကို အသည်းအသန် စဉ်းစားနေမိသည်။

နံပါတ် ၁.. သူမ မက်ဆင်ဂျာက ချက်တင်တွေအကုန် ဖျက်ထားသည်က အမှား၏အစ။

နံပါတ် ၂.. ယုက သူမ အကောင့်ကို ဂျီဟို ဟု နာမည်ပြောင်းထားသည်က အလယ်..(အမှန်တော့ ယုမပြောင်းဘူးဟုဆိုသည်။ ယောင်ဆန်းဝင်ပြောင်းထားသည်ပေါ့) ၊

နံပါတ် ၃ Kim Hyung Jun ကလည်း JJunဟု ပြောင်းလိုက်သည်က အဆုံး..။    ရှပ်ပြာလွန်းသောမီက J ဟု နှိပ်လိုက်သည်နှင့် ပေါ်လာသော နာမည်ကို သေချာမကြည့်ဘဲ ပို့ပစ်လိုက်မိသည်က အကြီးဆုံးအမှား။ မီ ခေါင်းကို သွက်သွက်ခါပစ်လိုက်ပြီး တတောင်တောင်နှင့် မည်နေသော မက်ဆင်ဂျာ ချက်ဘောက်စ် ကို ကြည့်လိုက်သည်။