ဒဏ္ဍာရီ အခန်း (၄၆)
မီသည် အလန့်တကြားနှင့် ယုလက်လေးကို တင်းတင်းဆုပ်ကိုင်ထားသည်။
“ ဘာမှမဖြစ်ပါဘူးဟ။ မကြောက်ပါနဲ့ ”
“ ဘာမှမဖြစ်မှန်းတော့ သိတာပေါ့။ နားအူပြီး ရင်ထဲ လှပ်ကနဲဖြစ်သွားတာကို မခံနိုင်တာ”
မီပြောနေစဉ်မှာပဲ သူမတို့စီးနင်းလာသော လေယာဉ်ကြီးသည် အင်ချွန်း အပြည်ပြည်ဆိုင်ရာ လေဆိပ်သို့ ဆင်းသက်ခဲ့ပြီဖြစ်သည်။
“ ကဲ- ဂျန်းမီရေ…ငါ့လက်လည်း ကျိုးကြေကုန်ဦးမယ်။ လေယာဉ်လည်း အောက်ရောက်နေပြီ လွှတ်ပါဦးဟ။ ပစ္စည်းတွေ ချရအောင် ”
ပစ္စည်းဟုဆိုသော်လည်း တစ်ယောက် ကျောပိုးအိတ် တစ်အိတ်နှင့် လတ်ဂေ့ဂ်ျ တစ်လုံးစီသာ။ ၁၀ ရက်သာ ကြာမည်ဖြစ်သော သည်ခရီးစဉ်အတွက် မီ နှင့် ယု ၂ လလောက် အချိန်ယူ စီစဉ်ခဲ့ရသည်။ ကံကောင်းသည်က ကိုရီးယားတွင် ပူနေပြီဖြစ်သဖြင့် ယုတို့ အနွေးထည်ဝယ်ရခြင်းမှ လွတ်ကင်းသွားသည်။ မီဆိုကတော့ အ၀တ်အစားတွေပင် ယူမလာနှင့်ဟု ဆိုသည်။ သူမအ၀တ်အစားတွေ ယူဝတ်ဖို့ ပြောသော်လည်း သည်လောက်အထိတော့ ယုတို့လည်း မလုပ်နိုင်တော့။ သည်မြေကို နင်းခွင့်ရအောင် လုပ်ပေးတာနှင့်ပင် လွန်လွန်းနေပြီ။
“ အစ်မ မီဆိုကို မျက်စိရှင်ရှင်နဲ့ရှာပါဟဲ့ မီရဲ့ ”
ရေမြေခြားသည့်အသိတစ်ခုက အားငယ်စိတ်ကို ချက်ချင်းဖြစ်သွားစေသည်။ ယု နှင့် မီသည် လူအုပ်ကြီးကြားတွင် မီဆိုကို အသည်းအသန်ရှာကြသည်။
“ ဂျီဟို…. ဂျန်းမီ ”
အသံစူးစူးလေးလာရာသို့ အမောတကော ရှာကြည့်ကြတော့… တွေ့ပါပြီ။ ယုတို့ကသာ စိတ်လှုပ်ရှားလွန်းနေ၍ မမြင်ခြင်းဖြစ်သည်။ မီဆိုရေးထားသော ဂျီဟို နှင့် ဂျန်းမီ ဆိုသည့် မြန်မာစာလုံးကြီးတွေက ထင်ထင်ရှားရှား။
“ အစ်မ မီဆို ”
မီကတော့ ပြေးမဖက်ရုံတမယ် မီဆိုရှိရာသို့ ပြေးလေ၏။
“ လာ လာ… ဒီဘက်က ထွက်ရမှာ ”
ယုက တစ်ဖက် မီက တစ်ဖက်နှင့်မို့ မီဆိုခင်မြာမှာ ကလေးအမေတစ်ယောက်လို့ တို့လို့တွဲလောင်း ဘိုသီဘတ်သီနှင့်။ သည်နှစ်ယောက်နှင့်ကျမှ ဆယ်တန်းအောင်ကတည်းက ကိုရီးယားနိုင်ငံသားဖြစ်နေသော မီဆိုတစ်ယောက် terminal အပေါက်တွေ မှားလိုမှား၊ မျက်စိတွေလည်လိုလည်။
ESTÁS LEYENDO
ဒဏ္ဍာရီ
Fanficဤfiction ကို မီဆိုနှင့်အတူ TS များ အားလုံး ပိုင်ပါတယ်။ ပြင်ပ အဖြစ်အပျက်တချို့ နှင့်အမှန်တရား တချို့ ပါပါတယ်။ Not BL . Just fanfiction
