ما ان تركته ودخلت لابيها ليجده يخرج اليه ...
تيج : اهلا يا شيفاي ... ها مستعد ...
شيفاي : ما تخافش ... انا محضر نفسي كويس اوي ...
تيج : انا عارف ان الفكرة مجنونة بس انا عارف انك هتحميها من نفسها قبل ما تحميها من نفسك ...
شيفاي : خالي انا عارف انك خايف عليها ... هي بنتك وليك الحق تخاف بس صدقني دا لمصلحتها ... طول ما هي شايفانا قدامها مستحملينها وساكتين علي كل عمايلها مش هتتغير ... مهما قالت ووعدت بترجع في كلامها ... وانا بقي ...
تيج : عارف ناويت تعيد تأهيلها ...
شيفاي : بالضبط ... يعني الفترة اللي هتبعد عنكم فيها اعتبرها فترة اعادة تأهيل وتهذيب ...
تيج : ربنا معاك ... اهي هتبقي مراتك وانت حر فيها ...
شيفاي : وانا عند وعدي ليك ... مهما كانت النتيجة اللي هوصلها... هترجعلك زي ما اخدتها ...
تيج : انت عارف علي قد ما انا مرتاح ان مهمة تغيرها مش هتكون مسئوليتي ومش انا اللي هتحملها لاني اب وانت عارف يعني ايه اب وقلبي ممكن يحن في اي وقت ... علي قد ما انا زعلان من اللي هيحصل في الاخر لان مفيش اب في الدنيا يتمني ان بنته ترجعله تاني ... بس نعمل ايه ...
شيفاي : انا اسف يا خالي ... انت اكتر واحد عارف ان جرحي لسي ما طاب ومع اني بحبها بس مقدرش اظلمها معايا ... وبعدين هي حبت تعمل كدا من الاول وانا فهمتك ...
تيج : فهمت ... بس انت هتعمل ايه في مسالة امها دي ...
شيفاي : انا هعرف ازاي اعرفها الحقيقة ... وربنا يستر ...
تيج : طيب انا هاخد بافيا وانزل اخد مليكة والست والدتك ونسبقكم علي المأذون ...
شيفاي : وانا هجيبها وهتلقوني وراكم علي طول ...
وتركه واتجه الي ابنته بافيا التي كانت تنتظره عند باب الشقة فهي تعلم ما سيتم في هذا اليوم وكيف ستسير الاحداث ...
كانت بافيا تنزل مع والدها وقبل ان تصل الي شقة عمتها وقفت في وجهه ...
بافيا : بابا ... انت شايف ان اللي هيحصل دا صح ...
تيج : انا عارف انك مش موافقة علي اللي هيحصل وشايف في عينيكي نفس النظرة اللي هربت منها اول ما لمحتها في عيون اختي وبنتها ... بس اعمل ايه ... اختك خلاص مفيش حد قادر عليها ... مش عاملة حساب لاي حد ... حتي انا زي ما تكون بتنتقم مننا علي حاجة هي بس اللي عارفاها ورافضة تفهمنا ... انا كنت ممكن اعمل فيها اللي ناوي عليه شيفاي بس انا غير شيفاي ... انا مهما قسيت انا في النهاية ابوها هضعف وهحنلها وهسامحها ...
بافيا : انما شيفاي مهما قسي عليها مش هيسامح ولا هيحن الا لما يغيرها ... مش كدا ...
تيج : بالضبط ... وهو وعدني انه مش هيوصلها للعذاب ... هو هيخليها بعيد عننا عشان ما تصعبش علينا ونخليه يرجع في كلامه ...
