✨ الحلقـــة الرابعــــة✨
ومشت ساعة ورا ساعة ونا نعيط ونتألم وماما ومراد ونرجس يرجوا برا وبعدها سمعت صوت عيااط. بيبي صغير اوووا اووااااا اوواااااا وارتسمت علي وجي ضحكة نسيت فيهاا كل الألم الي حسيته وحسيت ان حياة جديدة قدامي انا وايهم الصغير وطيف ايهم حبيبي معاانا بس بعد دقايق تلاشت الضحكة هذي واختفى صوت العياط ونشوف فيهم كلهم يجروا وكأنه في حاجة صارت ونبي نحكي نبي نعيط نقول شن في بس معش حسيت بشي ودخت وفتحت عيوني لقيت روحي ف الدار وهلي كلهم جنبي خوتي وماما. ونرجس وقرب مني منذر
منذر:: الحمدلله علي سلامتك
نا:: وين ايهم
منذر:: شن تحسي تواا
نا:: متغيرش الموضوع قتلك وين اييهم رد علياا ولدي وين
ماما:: جتني تجري ومسكتني من يدي اهدي سلم بنتي مش كويس لكي التعصيب نافس انتي
نا:: قعدت نبكي قولولي باهي ولدي ويين
منذر:: عيونه تعبن دموع ووخر وعطاني بالظهر
محمد:: قرب مني اناا حنقولك بس
نا:: بس شنو
مراد:: يبحت فياا ومش قادر يجي شوري لان هوا الوحيد من خوتي مايحبش يشوفني نبكي لان بابا الله يرحمه موصيه علياا
نا:: قعدت نبكي رد علياا بس شنوو انا جبت وسمعت صوت ايهم سمعته شن درتو ف وليدي قوولو وقعدت نخبط ف يدياا ع السرير
نرجس:: معش تحملت وطلعت من الدار
محمد:: مسكلي يديا بين يديه قولي ان لله وان اليه راجعون انتي صح جبتي بس ربي مكتبلش ان يعيش
نا:: بمجرد ماسمعت كلامه حسيت زي الميه الساخنة انكبت علياا ودموعي قعدن يصبن كيف الشيشمة. ولساني حسيته ثقيييل معش قدرت نقول شي ليش ياربي هكي يسيرلي شن درت ف دنيتي بيش تجازيني هكي ف البداية بابا بعدها ايهم وتوا وليدي ليش ياربي
محمد:: مهاا استرجي سلم خيتي متقعديش ساكته هضا اختبار من ربي
ماما:: قعدت تبكي لما شافتني نبكي قولي لا اله الا الله سلم بنتي هضا قدر ربي
نا:: لميت كرعيا لصدري وحطيت عليهن راسي وقعدت نبكي وساكته وماتسمعش مني الا صوت شهقاتي وانا نبكي
مراد:: طلع من الدار ولحقوه منذر ومعاذ
معاذ:: عيونه دموع كنهاا ماحكتش ولا كلمة
منذر:: واااعر عليها وااعر هضا ثالث حد تفقده وهيا متحملش واعر
مراد:: قمعز ع الكرسي وحط وحط يديه علي راسه وضايع ومش عارف شن يدير
منذر:: جا قمعز جنبه وسع باالك يامراد ازمة وتعدي
مراد:: مهاا وصية باتي يامنذر ونا محافظتش عليها
معاذ:: جا قدام مراد وحط يديه علي ركبين مراد هضا قدر ربي ومحد فينا يقدر يغيرة بس نحنا لازم نخلوها اتخطى الحالة الي هياا فيهاا لازم
نرجس:: جت. من جهة الحمام وعيونها منتفخات من البكاء وبحتت فيهم وخشت للدار
ماما:: مهاا سلم بنتي ردي علياا
نا:: ...........
محمد:: خلاص ياأمي خليها براحتها
ومشن الايام وطلعت من المستشفى ودفنو وليدي الي مفرحتش بشوفته وعمتي انهارت بعد سمعت الخبر وخصوصاً ان كانت تستني فيه باليوم والليلة ونا علي حالي محكيتش ولا كلمة وعلي قد ماحاولو يخلوني نحكي بس انا مدويتش بكل كنت نحس ف لساني مربوط. ومافيش حاجة تستاهل اني نحكي عشانها ومر يوم ورا يوم واسبوع ورا اسبوع وشهر ورا شهر ونا علي حالي وخوتي ماخلو دكتور ماشالوني لاه وكلهم يقولو ان الي هياا فيه لاه علاقه بالوضع النفسي وان مفيش سبب يخليها تسكت ومرت سنة علي وفاة ايهم وليدي ونا مزلت علي نفس الحالة نرقد بدموعي ونا ماسكة صورة ايهم حبيبي وانوض منطلعش من الدار نقعد ف داري وخلاص وهلي معش عرفوا شن يديرولي
أنت تقرأ
#نقطة_أمل رواية شرقاوية بقلم الكاتبة #Bent_benghaziكاتبة رواية#لعبة_القدر
Romanceرواية ليبية شرقاوية مميزة بقلم الكاتبة Bent_benghazi
