الحلقـة الخامسة عشر
نا:: انس لو سمحت متخطش حدودك
انس:: تي مراتي وحقي هضاا
نا:: نزلت م السرير وبحتت فيه ونأشر بصبعي مستحيل نكون مرات واحد سكار وميصليش وكون متأكد اني مستحيل نقعد مراتك لعند تقعد بني ادم كيف الناس وطلعت
انس:: صبا استني استني
نا:: عطيته بالظهر ومبحتش ف وجه خير
انس:: كيف تسمحي لروحك تحكي معايا بالطريقة هذي
نا:: برمت عليه ونبحت فيه بنظرة استهزاء كيف مش عاجبتك طريقة دوتي معاك
انس:: قرب مني وقعدت نوخر لعند لصقت ف الساس وخبط يده بالقوه ف الساس جنب راسي لا مش عاجبتني وهذي مش طريقة تحكي بيها المرا المحترمة مع راجلها
نا:: كنت ميته م الخوف بس حاولت نقوي روحي ودفيته باقوا ماعندي ونحكي بصوت مرتفع شويه بعد يقعد راجلها محترم ويستحق الاحترام عشان تحترمه تي كيف تبيني نكون مراتك ونأمن علي روحي معاك وانت متخافش ربي فهمني كذا
انس:: مصدوم من كلامي لان شخصيته قويه وعصبي وطول عمره متعود ماحد يرد عليه او يناقشه الي يقولها تمشي والي يبيها ياخذها
نا:: ماتبحتش فياا هكي تحساب روحك تخاف من ربي تي راجل عمرك 34 سنة حتي صلاة ماتصلي تي شن بنزيدوك طول ولا عرض ولا شنابات مؤيد خوياا الي ف اولي اعدادي اعقل منك
انس:: يبحت فيااا ومعصب وجنونه قريب يطلعن
نا:: خير في حاجة كنك تبحت هكي غلط كلامي مثلاً مش كان عشت مع الاجانب كم سنة تقعد زيهم مسلم راك مسلم
انس:: مسكني من مرفقي بالقوه ويفنص لعند عيونه بيطلعن تي انتي من سمحلك تحكي هكي تي انكسرلك راسك لو تعاوديها
نا:: فكيت يدي منه بالقوة وقعدت نخبط بصبعي ( السبابة) علي صدره يدك مترتفعش علياا مره اخرا والا والله مايصير طيب مش اناا الي يرتفعن علياا يدين
وخذيت مخدتي والورغان اقعد فيهاا وطلعت
انس:: قعد منصدم ويحك ف لحيته وكلامي يرد ف عقله مره واتنين وتلاته وخبط السرير بكراعه. وقعد يعيط بصوت عالي مش اناا الي ينحكي معاياا هكي مش اناااا
.
.
نا:: خذيت الورغان والمخدة وخشيت لدار المعيشة ونسمع فيه يخبط هه خبط لين تشبع تحسابني بنخاف ورحمة ايهم ماحنقعد مراتك لعند اتعدل وتقعد كيف الناس والايام بينا يااسيد انس
ورقدت يومها وانا حاسه بشعور غريب حاسه بقوه غريييبه الثور هضاا الي تجوزته واكبر مني بعشر سنين قلت. عاقل وراجل وطلع بع كله كلامه مانقعد مهاا كان ماخليته يتعدل
هبة:: من امبدري وناا نرن عليك
منذر:: سامحيني والله كنت مشغول عندي حالة ولادة
هبة:: وتقول فيهاا لياا حالة ولادة
منذر:: هضاا شغلي وين المشكلة
هبة:: قصدك انت الي تجيّب فيهن
منذر:: ههههههه تغاري
هبة:: شن رايك
منذر:: لا ياهبلة اصلاً من الليبي الي يرضى مراته يجيّبها دكتور
هبة:: ها مالا
منذر:: حالات الولادة الطبيعية شور الدكتورة اسراء اناا حالات الولادة القيصيريه والي يقعد عندها صعوبة ف الولادة الطبيعية نساعد فيهاا بأنّي نعدل وضعية الجنين من جهة البطن
هبة:: بس
منذر:: وتواا حالياً بنتخصص ف العقم رجال ونساء
هبة:: ماشالله شن خليت
منذر:: ههههه كنك معيطة معاياا
هبة:: شي بس مشعارف حاسه كأني من زمان نعرفك
منذر:: تصدقي ان الشعور هضاا نفسه نحس فيه تي انا نفسي مستغرب ف روحي كيف تقبلتك وقعدتي ف عقلي
هبة:: كيف يعني
منذر:: انا بعد وفاة هبة الله يرحمها كرهت جنس حواء عارفه شن معني وقفت حياتي من بعدها كرهت اي حاجة كنت نحبها وتذكرني بيهاا هلي معش عرفوا شن يديروا بيش يطلعوني من الحالة الي انا فيهاا ومع الوقت قعدت انتعود بس محد كان يقدر يجيب سيرتها قدامي ولا يجيب سيرة بنت اخراا عارفه لدرجة لما حد يحكي عليهاا يومي كله يخرب انتنكد انرد بالزمان لليوم الي توفت فيه تصدقي كرهت الشتاء والمطر وكرهت نسوق طول الشتاء ويسوق بيا سفيان صاحبي
هبة:: تسمع فيع وساكته ووجعتها ان يحكيلها علي خبيبته وكأنه يقوللها مش حتقعدي كيفها باهي حسيتك انسجمت وانت تحكي عليها
منذر:: ههههه غرتي مثلاً متخافيش انتي الوحيدة الي قدرت ببراءتها وملامحها الطفولية تخلي قلبي الي كان ميت ينبض من جديد انا جد تعقلت بيك وبديت نحبك
هبة:: من اول ماقال نحبها قلبها قعد يدق بالقوة بككل وحست ان لقت الراجل الي يخاف عليها حق الي ينقال عليه راجل مش عيل يلعب بمشاعر البنات
منذر:: وين رحتي
هبة:: تصدق اني خايفه منك
منذر:: منّي!!!
هبة:: اهاا منك
منذر:: وليش
هبة:: خايفه انك تتعامل معايا علي اني هبة الله يرحمها لانك زي ماقلت نشبهلها واخرا نفس الاسم
منذر:: من حقك تخافي بس صدقيني الشي هضاا مش صح والايام حيثبتنلك كلامي
هبة:: ان شاء الله
منذر:: خلاص عدي ارقدي ونا وراياا شغل نروح وتو نحكو
هبة:: امتا مروح
منذر:: عندي مناوبة اليوم حنروح 6
هبة:: باهي ربي يعونك. ف عونك سلام
منذر:: سلام
أنت تقرأ
#نقطة_أمل رواية شرقاوية بقلم الكاتبة #Bent_benghaziكاتبة رواية#لعبة_القدر
Romanceرواية ليبية شرقاوية مميزة بقلم الكاتبة Bent_benghazi
