الحلقـة الثالثة والعشرون
طبع فياا بعد نرقد زعلانه ونبكي نقعد نحكي ف الي مزعلني وانا راقده واحياناً حاجات مش قادرة نحكيهن ونا. واعيه نلقي روحي حكيتهن ونا راقده ويومها شكلي حكيت وفتحت عيوني ف الصبح ونلقي انس فوق راسي ويبحت فياا بنظراات غريبه ومفنص
نا:: قمعزت كنك قاعد فوق راسي
انس:: نادمة انك اجوزتيني
نا:: نعم
انس:: قعد يعلي ف صوته جاااااوبينيي ناااادمة انك اجوزتيني
نا:: صبيت شن ساير لعقلك انت وجيت بنطلع م الدار
انس:: مسكني من مرفقي بالقوه وبرمني شوره وقعد يضغط علياا بعد نحكي معااكي معش تمشي وتسيبيني مااانيش كللب عنند حضرررتك
نا:: حسيت يدي لعند عيوني تعبن دموع انس يدي
انس:: زاد يضغط عليها حسيييتيهااا وجعاااتك صاااح تألمتي صاااح قوليلي انتي تشووووفي فيااا طرطور قدااامك مش راااجل ولا شنوووو مش انااا الي تخدعني مرااا تسمعي فيااا ولالا مش انااا
نا:: نبحت فيه ومنصدمة ومعرفتش كنه وولحظة خفت نكون حكيت حاجة وانا راقده بس معرفتش شن حكيت
انس:: دفني بالقوة لعند طحت المعااملة حتغير لان الطيب مايمشيش معااك وجك معش بنشووفه قدااامي تسمعي ولالا
نا:: نبكي وساكته ونبحت فيه كيف معصب وكأنه وحش
وطلع انس وطبق علياا باب الدار ونا قعدت نبكي معرفتش شن صاار وف لحظة حيااتي انقلبت فوق تحت وخش انس للدار وخذا شنطة وحط فيهاا دبش وخذا حاجاته المهمة وطله ومشا لحوشهم وخش لداره زمان وحط فيهاا حاجة وكان قدامه مراياا مصبيه دفها بيده لعند جابهاا طايحه وادششت ع الارض
عمتي:: جت تجري وخشت عليه كنك بسم الله شن في
انس:: ساكت ويهز ف كراعه وولع الدخان امتاعه ووجه حمر وصدره يركب وينزل من كثر مامعصب
عمتي:: رد علياا شن في وشنو الشنطة هذي
انس:: يااامي خطيني مش ناقصك خليني ف حالي
عمتي:: متعارك مع شريكتك
انس:: صبا وخبط السرير بكراعه استغفر الله ياربي يعني ضروري تكرهو الواحد ف عيشته ازززف وطلع
عمتي:: ربي يهديك ويهدي سرك
انس:: طالع معصب ومش شايف شي قدامه
سليم:: نازل من شقته قتلك ياانس
انس:: معبرش بكل وطلع وركب سيارته وطلعها م القوراج وعدا
سليم:: خش لقا امه كيف طالعه من دار انس امي كنه انس
عمتي:: مانندري عليه ياوليدي معصب وماداير اعتبار لحد
سليم:: كلمته تواا مكأنيش حكيت معاه
عمتي :: م الصبح حسه عالي انظر شن ساير معاه
سليم:: ربي يستر ولدك بعد ترقاله مايديرش خير
عمتي:: ان شاء الله غير مايكونش داير شي حاجة للوليه
سليم:: لالا مش للدرجة هذي عاد
عمتي:: وانت وين شريكتك
سليم:: قاعدة تلبس ف العيال عشان المدرسة
عمتي:: خليها تنزل. تعاوني بعدها والجنان الي يبي تسييق
سليم:: حاظر ياحاجّة حاظر
وطلع انس وهواا معصب م الحوش وقعد يسوق بسرعه ويخش يمين ويسار لعند قريب دار حادث وقعد يمشي ومش عارف وين ماشي ويولع دخان يطفي واحد ويولع واحد ويطفي واحد وحتي الدوام امتاعه فاته مامشلش اماا اناا ف قعدت نبكي وخصوصاً بعد سمعت انس طبق الباب وبعدها نسمع ف هرجته ف حوش عمي وصوته عالي وخشيت للدار لقيت الدولاب مفتوح وجزء من دبشه مش قاعد وقتهاا انهرت ومعش تحملت حسيت روحي وحيده من جديد ومحد معاياا ليش اي حد نحبه يسيبني ويمشي ليش ماعنديش حظ ف شي ليش مانفرحش زي باقي الناس مهاا انتي كنك ديماا تبكي خليكي قويه ضعفك هواا الي مخليكي هكي ديماا تبكي خليكي قويه ودافعي علي حقك ماتخليش حاجة تخصك تمشي من بين يديك
.
وصبيت غسلت وجي ودموعي ينزلن ونحاول نمسكهن وغيرت دبشي ولبست استرتش اسود وتيشيرت رصاصي ولميت الدار وفتحت رواشنها وطلعت برمت ع الحوش شويه وحكيت الحمامات وكان ف شويه غسيل ولعت عليه وخشيت المطبخ وقعدت اندير ف الغداء ونا دموعي حرام كان قالن نوقفوا ممكن تكون فياا لطقة طفولية من ابسط حاجة نبكي لدرجة كان تغيرت نبرة صوت حد لنبرة حادة وعصبيه نبكي ومهما حاولت نغيرها بس كانن دموعي يسبقن فيااا وطفيت ع الغداء وطلعت توضيت وصليت الظهر وقمعزت نقرا ف قرآن ونراجي ف انس يجي ومشت ساعة ورا ساعة وانس ماجش ولا اتصل حتي وغفيت شويه ونضت نسمع ف صوت اذان بحتت م الروشن نشوف الدنيا بتبدا اتظلم يعني هضاا المغرب وانس مازال ماروح يااربي شن اندير خذيت موبايلي وقعدت انرن عليه بس كان مقفل قمعزت وقعدت نبكي ومعش عرفت شن اندير صبيت صليت العصر والمغرب و قعدت مقمعزة قدام التي في ونبكي ونراجي فيه وهواا معش جاا معش عرفت هواا ليش تصرف هكي هل لاني امس مرقدتش معاه بس شن دخل هذي بكلامه ولا يكون سامع مني حاجة يااااربي كوون معاياا والله ماعد فهمت حاجة ومشا الوقت وجت الساعة 11 ف الليل وهواا ماجش وسيارته مش ف الشارع قررت اني نمشي نشوفه ف حوش عمي خشيت لبست بدلة الصلاة وخذيت مفتاح الحوش وطلعت ومشيت لحوش عمي وخشيت لقيت عمتي وعمي ف الصالة ومعاهم سليم
أنت تقرأ
#نقطة_أمل رواية شرقاوية بقلم الكاتبة #Bent_benghaziكاتبة رواية#لعبة_القدر
Romanceرواية ليبية شرقاوية مميزة بقلم الكاتبة Bent_benghazi
