الحلقة الثامنة والأربعون
تميم :: اسمعي باهي بنقولك حاجة ومتردد
مريم:: قول
تميم:: عادي يعني اتقبليها
مريم:: تي احكي بديت تخوف فياا
تميم:: اليوم كلمت مراد وقتله نبي العرس بعد شهرين وقالي معندكش مشكلة
مريم:: شنوووووو
تميم:: كنك انفجعتي
مريم:: تي ليش ماقلتي اه
تميم:: كيف ماو مصيرنا حنديروا عرسنا
مريم:: عطيني العلم باهي مش هكي من راسك
تميم:: خلاص اسف تو بكرا نكلمه ونقوله معش في نصيب وورقتها حتجيها
مريم:: تي فيش تحكي انت من قال نبي نطلق
تميم:: هضاا معني كلامك
مريم:: لا مش هضا معناه
تميم:: سكري توا
مريم:: لالا نبيك
تميم:: وانا منبيكش
مريم:: هياا عاد بلا براده بعد شهرين حنقعدوا ف حوش واحد
تميم:: ضحك
مريم:: ايوه محلاها ضحكتك
تميم:: خلاص باهي
مريم:: ههههههههه نحبك
تميم:: نعليااا نا
وقعدوا يهدرزو وجوههم سمح ونا خذاني النوم ودمعتي علي خدي وانس روح للحوش مضايق وخش وكان الحوش هادي وهوا متعود علي هرجتنا ف الحوش وغير دبشه وخذا فوطة ومشا فرش ورقد ف دار المعيشة موقف انس كان صعب من جهة ولده الي من لحمه ودمه ومن جهة انا وبنته كان خايف من ردة فعلي ومشعارف كيف حيفاتحني ف الموضوع وكبف حنتقبل ولد طليقته اللي كلما حيشوفه حيذكرها ف النهاية هياا حب حياته ورقد وهوا يفكر ومش لاقي حل
.
اما عندي طول الليل انوض وخلاص مرقدتش. ساعه متواصله علي بعضها مش قادرة نرقد وانس مش جنبي ونفكر فيه. وصل الحوش ولالا تعشى ولالا ومتغطي ولالا كان خاطري وجعني منه بكل ان خبا علياا حاجة مهمة كيف هكي ونا عشت 10 شهور ونا نلاحظ ف تغير تصرفاته وجامطة وساكته ومن جوا نار وكل الي كان يدور ف عقلي ان رجع لجينا ولما يطول مايروح نقول اكيد معاها يعني الي عشته كله منقدرش ننساه ف يوم وبرضوا ولدها الي حيعيش معانا يعني طيفها حيعيش معانا واعره لنقنها واعره مش قادرة انتحملها لو صارحني من الاول كنت زعلت شويه ورضيت بس هواا دس علياا ولو معرفتش بالصدفه مكنش قرر ان يحكيلي
ملاك:: صباحو
معاذ:: صباح الورد
ملاك:: نوضتك صاح
معاذ:: لاعادي
ملاك:: قلت لماما اني معش نبيه زياد وحيجي بعدين ياخذ حاجاته
معاذ:: كذبه تحكي جد
ملاك:: والله كيف مانحكيلك
معاذ:: وشن دارتلك
ملاك:: شي معش تحكي معايا بس وقالتلي لاعد بنتي لانعرفك
معاذ:: هضاا كله وبس
ملاك:: خليها تعبر عن مشاعرها بنتها الوحيدة انا
معاذ:: باهي وباتك
ملاك:: بعدين نبي نحكيله
معاذ:: وشن حتقوليله
ملاك:: تو بعد نقوله تو تعرف
معاذ:: بديتي تخوفي
ملاك:: ههههههه لالا بس معش حنسمح لحد يمشيلي حياتي بلاك والله ماكنت عايشه راه
معاذ:: ربي يحفظك لياا ونقدر نسعدك
ملاك:: سعادتي اني نكون معاك ف حوش واحد وتحت اسمك الشي هضاا عندي بالدنيا ومافيها
معاذ:: الله الله شن فاطرة ع الصبح
ملاك:: ههههههه فاطرة علي صوتك
معاذ:: اخراا واجد علياا هكي
ملاك:: نوض يلا البس وتعال للجامعة رايفت عليك
معاذ:: نحبك
ملاك:: ونا نموت فيك
معاذ:: سكري سكري جايك
ملاك:: هههههع خلاص نستناك
معاذ:: تم
أنت تقرأ
#نقطة_أمل رواية شرقاوية بقلم الكاتبة #Bent_benghaziكاتبة رواية#لعبة_القدر
Romanceرواية ليبية شرقاوية مميزة بقلم الكاتبة Bent_benghazi
