الحـلقـة الثامـنة والخمسون
عمتي:: مش تقول الباب يدق
نا:: اهاا صاح يدق
رتاج:: تو نصبي نفتح
عمتي:: لا خليكي كلمي واحد من العيال يفتح
رتاج:: لييييث ياماما ليث
ليث:: نعم ياماما
رتاج:: الباب يدق عدي افتح
غيث:: انا تو نفتح وعدا يجري
وطلعوا فتحوا وخشو يجاوروا وخشت وراهم اسماء ومعاها ولدها وباين علي وجها ان مضايقه
عمتي:: يامرحبا يامرحبا
اسماء:: سلمت علي امهاا وباست علي راسها
عمتي:: جابك رؤوف
اسماء:: اهاا وجت سلمت علياا شن اخباارك واخبار السمحين
نا:: الحمدلله حال التعب انتي شن دايره
اسماء:: الحمدلله علي كل حال كيف حالك ياتويجه
رتاج:: الحمدلله لكي وحشه والله
اسماء:: انتو اكثر والله لياا فترة بنجي غير الواحد معش يفضي
عمتي:: وجك مش عاجبني كنك شن في
اسماء :: مافي شي ياماما
عمتي:: وليه طول ف عرض بولدك ومزلتي تكذبي
اسماء:: دمعتها حزت ف عينها
نا:: اسميه كنك شن في
اسماء:: قعدت تبكي
عمتي:: حيييي علياا كنك ف حد صايرلته حاجة
اسماء:: لو قعدت ع الوضع هضاا اناا الي حتصيرلي حاجة ونموت و نفتك
رتاج:: بعيد السو عليكي
اسماء:: اناا خلاص مانيش مروحه لعند ياخذلي حوش بروحي
عمتي:: يافضيحتي قصدك جايه حرجانه وماو عندك شقتك شنو حوش بروحك
اسماء:: غير اسمي عندي شقتي يدقن علياا من السبعة الصبح من اول مايطلع رؤوف ويخلني ننزل ونقعد كيف الشغاله عندها وعند بناتها اناا الي نطيب ونضم المطبخ ونسيق الجنان وتنهار بكاء تي والله حتي سرايرهن عمتي تخلي فياا نضمنهن
نا:: نبحت فيهاا ومصدومه معقوله ف ناس هكي
( طبعاً اسماء عندها 5 صبيات وكلهن مش متجوزات الا وحده بس وكبار ف العمر يعني ورؤوف هوا وحيد امه وباته متوفي )
عمتي:: قتلك ستين مره تجيني حرجانه من راجلك علي عيني وراسي بس عمتك وصبايتك لا
اسماء:: تبكي ( ونا ورتاج نبحتو فيهاا ووجعنا حالها )
حرام عليكي حسي بياا والله حياتي عذاب تي حتي راجلي منطقش نقعد معاه يومي كله نضم ونمسح ونسيق وهناا ولا علي بالهن وبعد نحكيله يقولي الله غالب امي شن نقدر انديرلها
عمتي:: صادق امه هذي
اسماء:: وانا مش مراته وام ولده ولالا مانركب الشقتي الا وانا واصله حدي تي حتي ولدي من التعب جبته قبل وقته وقريب عديت فيهاا خلاص معش نقدر انتحمل اكثر لياا سنتين ونا ع الوضع هضاا حسو بيااا
نا:: حبيبتي والله ف البدايه بعدها يملن ويخلنك ف حالك حتي منيوه اختي دارو فيها بهادل ف البدايه بس بعدها معش قعدن كيف قبل
اسماء:: والله انتن مش متخيلات حجم المعاناة الي انا فيها
رتاج:: حاسيين بيكي والله بس عشان راجلك وولدك ماتخربيش حوشك هناا هضاا الي يبن يوصلله
عمتي:: اسمعي كلامهن وردي لحوشك ماتخربيش حياتك وانتي عارفه ان حوش بروحك مستحيل يجيبلك بيسيب امه وخواته كذبه راجل ف النهاية هواا وبعدين ماعندهن حد غيره
اسماء:: واناا باهي نعيش خدامه طول عمري تحتهن
نا:: وسعي بالك حبيبتي والله الحياة كلهامشاكل بس لازم تعرفي كيف ترضي زوجك وتخليه ف صفك عشان مهما يصير تقعد صفحتك بيضا عنده
رتاج:: كلامها صاح والله
أنت تقرأ
#نقطة_أمل رواية شرقاوية بقلم الكاتبة #Bent_benghaziكاتبة رواية#لعبة_القدر
Romanceرواية ليبية شرقاوية مميزة بقلم الكاتبة Bent_benghazi
